டெல்லி: உலகிலேயே சக்திவாய்ந்த பாஸ்போர்ட் பட்டியல் 2025 ஆம் ஆண்டுக்கான தரவரிசை வெளியிடப்பட்டுள்ளது. இந்த பட்டியலில், உலகின் ஐந்தாவது பெரிய பொருளாதார நாடாக இருக்கும் இந்தியா, 85வது இடத்திற்கு பின்தங்கியுள்ளது. 

சிங்கப்பூர் முதலிடத்தை பிடித்துள்ளது. அதன் பாஸ்போர்ட் மூலம் 193 நாடுகளுக்கு விசா இல்லாமல் செல்லலாம். இந்திய பாஸ்போர்ட் மூலம் 57 நாடுகளுக்கு விசா இல்லாமல் பயணிக்க முடியும். கடந்த ஆண்டு இந்த எண்ணிக்கை 62 ஆக இருந்தது நினைவிருக்கலாம். 

ஹென்லி பாஸ்போர்ட் இன்டெக்ஸ் (Henley Passport Index) எனப்படும் இந்த தரவரிசை, ஒவ்வொரு நாட்டின் பாஸ்போர்ட் மூலம் அதன் குடிமக்கள் எத்தனை நாடுகளுக்கு விசா இல்லாமல் பயணிக்க முடியும் என்பதை அடிப்படையாகக் கொண்டு கணக்கிடப்படுகிறது. இந்த ஆண்டு அக்டோபர் மாத தரவுகளின்படி, இந்திய பாஸ்போர்ட் 85வது இடத்திற்கு சரிந்துள்ளது. இந்த ஆண்டு தொடக்கத்தில் 77வது இடத்தில் இருந்த இந்திய பாஸ்போர்ட், தற்போது மேலும் பின்தங்கியுள்ளது. 

இந்திய பாஸ்போர்ட் வைத்திருப்பவர்கள் அங்கோலா, பார்படாஸ், பூடான், பொலிவியா, பிரிட்டிஷ் விர்ஜின் தீவுகள், புருண்டி, கம்போடியா, இந்தோனேசியா, ஈரான், ஜமைக்கா, கஜகஸ்தான், கென்யா, மலேசியா, மாலத்தீவுகள், பிலிப்பைன்ஸ், இலங்கை மற்றும் தாய்லாந்து போன்ற நாடுகளுக்கு விசா இல்லாமல் செல்லலாம்.

2025 ஆம் ஆண்டுக்கான உலகின் முதல் 10 சக்திவாய்ந்த பாஸ்போர்ட்கள் இதோ:

1. சிங்கப்பூர் - 193 நாடுகளுக்கு விசா இலவச அனுமதி.

2. தென் கொரியா - 190 நாடுகளுக்கு விசா இலவச அனுமதி.

3. ஜப்பான் - 189 நாடுகளுக்கு விசா இலவச அனுமதி.

4. ஜெர்மனி, இத்தாலி, லக்சம்பர்க், ஸ்பெயின், சுவிட்சர்லாந்து - 188 நாடுகளுக்கு விசா இலவச அனுமதி.

5. ஆஸ்திரியா, பெல்ஜியம், டென்மார்க், பின்லாந்து, பிரான்ஸ், அயர்லாந்து, நெதர்லாந்து - 187 நாடுகளுக்கு விசா இலவச அனுமதி.

6. கிரீஸ், ஹங்கேரி, நியூசிலாந்து, நார்வே, போர்ச்சுகல், ஸ்வீடன் - 186 நாடுகளுக்கு விசா இலவச அனுமதி.

7. ஆஸ்திரேலியா, செக் குடியரசு, மால்டா, போலந்து - 185 நாடுகளுக்கு விசா இலவச அனுமதி.

8. குரோஷியா, எஸ்டோனியா, ஸ்லோவாக்கியா, ஸ்லோவேனியா, ஐக்கிய அரபு அமீரகம், ஐக்கிய ராஜ்ஜியம் - 184 நாடுகளுக்கு விசா இலவச அனுமதி.

9. கனடா - 183 நாடுகளுக்கு விசா இலவச அனுமதி.

10. லாட்வியா, லீக்டீன்ஸ்டீன் - 182 நாடுகளுக்கு விசா இலவச அனுமதி.

ஆசிய நாடுகளின் பாஸ்போர்ட்கள் இந்த தரவரிசையில் ஆதிக்கம் செலுத்துகின்றன. சிங்கப்பூர், தென் கொரியா மற்றும் ஜப்பான் முதல் மூன்று இடங்களைப் பிடித்துள்ளன.

அமெரிக்காவுக்கு 12வது இடம்

அமெரிக்காவின் பாஸ்போர்ட் வலிமை குறைந்துள்ளது. அமெரிக்கா 12வது இடத்தில் உள்ளது. அதன் பாஸ்போர்ட் மூலம் 180 நாடுகளுக்கு விசா இல்லாமல் செல்ல முடியும். முதல் 10 இடங்களுக்குள் அமெரிக்கா வராதது இதுவே முதல் முறை. கடந்த ஆண்டு, பிரான்ஸ், ஜெர்மனி, இத்தாலி, ஜப்பான் மற்றும் சிங்கப்பூர் ஆகியவை 194 விசா இல்லாத நாடுகளுடன் முதலிடத்தில் இருந்தன. அப்போது அமெரிக்கா 7வது இடத்தில் 188 நாடுகளுடன் இருந்தது.

பாகிஸ்தான் 103

இந்தியாவின் அண்டை நாடுகளின் நிலைமையும் பரிதாபமாக உள்ளது. பாகிஸ்தான் 103வது இடத்தில் 31 நாடுகளுடன் உள்ளது. வங்கதேசம் 100வது இடத்தில் 38 நாடுகளுடன் உள்ளது. நேபாளம் 101வது இடத்தில் 36 நாடுகளுடன் உள்ளது. பூடான் 92வது இடத்தில் 50 நாடுகளுடன் உள்ளது. இலங்கை 98வது இடத்தில் 41 நாடுகளுடன் உள்ளது.

உலகிலேயே மிகவும் பலவீனமான பாஸ்போர்ட் ஆப்கானிஸ்தானுடையது. அதன் பாஸ்போர்ட் வைத்திருப்பவர்கள் வெறும் 24 நாடுகளுக்கு மட்டுமே விசா இல்லாமல் செல்ல முடியும். சிரியா 26 நாடுகளுடனும், ஈராக் 29 நாடுகளுடனும் அடுத்தடுத்த இடங்களில் உள்ளன.