திடீர் உடல் நலக்குறைவு.. அப்போலோ மருத்துவமனையில் அமைச்சர் துரைமுருகன் அனுமதி

Jul 13, 2024,03:44 PM IST

சென்னை: அமைச்சரும், திமுக பொதுச் செயலாளருமான துரைமுருகனுக்கு திடீர் உடல் நலக்குறைவு ஏற்பட்டு அப்போலோ மருத்துவமனையில் அனுமதிக்கப்பட்டுள்ளார்.

விக்கிரவாண்டி இடைத்தேர்தலில் திமுக வேட்பாளர் அன்னியூர் சிவா வெற்றி பெற்றார். இன்று நடந்த வாக்கு எண்ணிக்கையில் அவர் அபார வெற்றி பெற்றார். இந்த வெற்றியினை திமுக கட்சியினர்களும், தொண்டர்களும் வெடி வெடித்து, இனிப்புகள் வழங்கி தமிழகம் முழுவதும் கொண்டாடி வருகின்றனர். முதல்வரும் அண்ணா அறிவாலயத்தில் இனிப்புகள் வழங்கி கொண்டாடினார்.

இந்த நிலையில் இந்தக் கொண்டாட்டத்தில் பங்கேற்பதற்காக நீர்வளத்துறை அமைச்சர் துரைமுருகனும் இன்று சென்னையில் உள்ள அண்ணா அறிவாலயம் வந்தார். அங்கு வந்த அவருக்கு திடீர் என உடல்நலக்குறைவு ஏற்பட்டது. இதையடுத்து அவருக்கு முதல் உதவி அளிக்கப்பட்டது. அதன்பின்னர் சென்னை அப்போலோ மருத்துவமனையில் அனுமதிக்கப்பட்டுள்ளார். அவருக்கு தற்போது சிகிச்சை அளிக்கப்பட்டு வருகிறது.