டெல்லி:  காங்கிரஸ் இளம் தலைவர் ராகுல் காந்திக்குப் பிறந்த நாள் வாழ்த்து தெரிவித்திருந்தார் முதல்வர் மு.க.ஸ்டாலின். அதற்கு ராகுல் காந்தி பதிலுக்கு கலகலப்பான பதிலைப் போட்டு ரசிக்க வைத்துள்ளார்.

ராகுல் காந்திக்கு இன்று பிறந்த நாள். சமீபத்தில் நடந்த லோக்சபா தேர்தலில் காங்கிரஸ் கட்சிக்கு புத்துயிர் கொடுத்தது ராகுல் காந்தியின் தீவிரப் பிரச்சாரம். கடந்த 10 ஆண்டுகளில் இல்லாத அளவுக்கு அதிக அளவிலான தொகுதிகளில் இந்த முறை காங்கிரஸ் ஜெயித்துள்ளது. இதற்கு ராகுல் காந்தி மேற்கொண்ட பாரத் ஜோடோ யாத்திரை மற்றும் அவரது அதிரடியான பிரச்சாரங்களே.

இந்த நிலையில் இன்று ராகுல் காந்தி பிறந்தநாளை காங்கிரஸார் உற்சாகமாகக் கொண்டாடினர். பல்வேறு தலைவர்களும் ராகுல் காந்திக்கு வாழ்த்து தெரிவித்திருந்தனர். அந்த வகையில், முதல்வர் மு.க.ஸ்டாலினும் வாழ்த்து தெரிவித்திருந்தார். தனது வாழ்த்தில், என் அன்புச் சகோதரருக்கு, நாட்டு மக்களுக்காக நீங்கள் காட்டும் அர்ப்பணிப்பு உங்களை மிகப் பெரிய உயரத்திற்கு இட்டுச் செல்லும். உங்களது தொடர் வளர்ச்சிக்கும், வெற்றிக்கும் எனது வாழ்த்துகள் என்று கூறியிருந்தார்.

முதல்வர் ஸ்டாலினின் வாழ்த்துக்கு நன்றி கூறியுள்ளார் ராகுல் காந்தி. இதுதொடர்பாக அவர் போட்டுள்ள பதில் டிவீட்டில், உங்களது வாழ்த்துகளுக்கு நன்றிகள் சகோதரரே.. இன்று உங்களிடமிருந்து  ஸ்வீட் பாக்ஸ் வரும் என்று காத்திருக்கிறேன் என்று கூறியுள்ளார் ராகுல் காந்தி. இந்த டிவீட் கலகலக்க வைத்துள்ளது.

லோக்சபா தேர்தல் பிரச்சாரத்திற்காக கோவைக்கு ராகுல் காந்தி வந்திருந்தபோது ஸ்டாலினுக்கு தருவதற்காக ஒரு ஸ்வீட் கடைக்கு போய் அவரே ஸ்வீட் பாக்ஸ் வாங்கி வந்து கொடுத்து அசத்தினார். இது முதல்வரை நெகிழ வைத்திருந்தது. இதைத்தான் சமீபத்தில்  கூட கோவையில் நடந்த திமுக வெற்றி விழாவில் குறிப்பிட்டு ஒரே ஒரு ஸ்வீட் பாக்ஸால் பாஜகவினரின் கனவுகளைத்  தகர்த்தவர் ராகுல் காந்தி என்று கூறியிருந்தார் முதல்வர் ஸ்டாலின். 

இதைக் குறிப்பிடும் வகையிலேயே இன்று முதல்வருக்கு நன்றி தெரிவித்த டிவீட்டில் ஸ்வீட் பாக்ஸுக்காக காத்திருப்பதாக கூறியுள்ளார் ராகுல் காந்தி. எப்படியும் இன்று இரவுக்குள் ராகுல் காந்திக்கு ஸ்வீட் பாக்ஸ் வந்து சேர்ந்து விடும் என்று நம்பலாம்.