சென்னை: கரூர் விவகாரம் தொடர்பான விசாரணையை டெல்லியில் இருந்து சென்னைக்கு மாற்றக் கோரி, தமிழக வெற்றிக் கழகத்தின் (தவெக) தலைவர் விஜய் சிபிஐ (CBI) அமைப்பிற்கு கடிதம் எழுதியுள்ளார். இந்த விவகாரம் தற்போது தமிழக அரசியலில் பெரும் பரபரப்பை ஏற்படுத்தியுள்ளது.

பின்னணி என்ன? : 

கரூர் சம்பவம்  தொடர்பாக மத்திய புலனாய்வுத் துறை (CBI) விசாரணை நடத்தி வருகிறது. இந்த விசாரணை தொடர்பாக தவெக தலைவர் விஜய் ஏற்கனவே மூன்று முறை டெல்லிக்கு நேரில் சென்று ஆஜராகி, அதிகாரிகளின் கேள்விகளுக்கு விளக்கம் அளித்துள்ளார். ஓய்வுபெற்ற நீதிபதி ஒருவரின் தலைமையில் இந்த உயர்மட்ட விசாரணை நடைபெற்று வருவது குறிப்பிடத்தக்கது.

விஜய்யின் கோரிக்கை கடிதம் :

இந்நிலையில், சிபிஐ அதிகாரிகளுக்கு விஜய் எழுதியுள்ள கடிதத்தில் சில முக்கிய கோரிக்கைகளை முன் வைத்துள்ளார். அதன் விபரங்கள்,

சென்னைக்கு மாற்ற கோரிக்கை: டெல்லிக்குச் சென்று விசாரணையில் பங்கேற்பதில் உள்ள நடைமுறைச் சிக்கல்களைக் கருத்தில் கொண்டு, இந்த விசாரணையை இனி சென்னையிலேயே நடத்த வேண்டும் என்று அவர் வலியுறுத்தியுள்ளார்.

நீதிபதிக்கு கடிதம்: சிபிஐ மட்டுமின்றி, இந்த விசாரணையை முன்னெடுக்கும் ஓய்வுபெற்ற நீதிபதிக்கும் விஜய் இது தொடர்பாக ஒரு தனிப்பட்ட கடிதத்தை அனுப்பியுள்ளார்.

ஒத்துழைப்பு உறுதி: விசாரணைக்கு முழு ஒத்துழைப்பு வழங்கத் தயாராக இருப்பதாகவும், ஆனால் பயண நேர விரயத்தைத் தவிர்க்கவே இந்த கோரிக்கையை வைப்பதாகவும் அதில் கூறப்பட்டுள்ளதாகத் தெரிகிறது.

தமிழக சட்டசபைக்கு தற்போது தேர்தல் தேதி அறிவிக்கப்பட்டு விட்டதால் தீவிர தேர்தல் பணிகளை கவனிக்க வேண்டி உள்ளதால் விஜய் தரப்பில் இந்த கோரிக்கை முன் வைக்கப்பட்டுள்ளதாக சொல்லப்படுகிறது. மூன்றாவது முறையாக நேற்று டில்லியில் உள்ள சிபிஐ அலுவலகத்தில் விசாரணைக்கு ஆஜரான விஜய்யிடம் தொடர்ந்து 7 மணி நேரம் விசாரணை நடத்தப்பட்டதாக சொல்லப்படுகிறது. இந்நிலையில் இன்று சிபிஐ.,க்கு கடிதம் எழுதி உள்ளது குறிப்பிடத்தக்கது. ஏற்கனவே விசாரணையை சென்னையில் நடத்தும் படி விஜய் தரப்பில் முன் வைக்கப்பட்ட கோரிக்கையை சிபிஐ ஏற்க மறுத்து விட்டது.