சென்னை: தவெக தலைமையில் அமையும் கூட்டணி திமுக மற்றும் பாஜகவிற்கு எதிரானதாகதான் எப்போதும் இருக்கும். அதில் சமரசம் என்ற பேச்சுக்கே இடமில்லை என்று தவெக தலைவர் விஜய் தெரிவித்துள்ளார்.

தமிழக வெற்றிக் கழகத்தின் செயற்குழு கூட்டம் பனையூரில் உள்ள கட்சி அலுவலகத்தில் கட்சியின் தலைவர் விஜய் தலைமையில் இன்று தொடங்கியது. இந்த கூட்டத்தில் செயற்குழு உறுப்பினர்கள், மாவட்ட செயலாளர்கள் மற்றும் சிறப்பு அழைப்பாளர்கள் கலந்து கொண்டனர். இந்த கூட்டத்தில் ஆகஸ்ட்டில் தமிழக வெற்றிக்கழகத்தின் 2வது மாநில மாநாடு நடைபெறும் என்றும், செப்டம்பர் முதல்  டிசம்பர் வரை விஜய் சுற்றுப்பயணம் நடைபெறும் என்றும் . சட்டமன்றத் தேர்தலில் விஜய் தான் முதல்வர் வேட்பாளர் என்றும். கூட்டணி தொடர்பாக அனைத்து முடிவுகளையும் எடுக்க விஜய்க்கு தான் முழு அதிகாரம் போன்ற பல முக்கிய தீர்மானங்கள் தவெக செயற்குழு கூட்டத்தில் நிறைவேற்றப்பட்டுள்ளது.

இதனையடுத்து தவெக தலைவர் விஜய் பேசுகையில், கொள்கை எதிரிகள் மற்றும் பிளவுவாத சக்திகளுடன் நேரடியாகவோ, மறைமுகமாகவோ என்றும் கூட்டணி இல்லை. சுயநலத்திற்காக பாஜகவுடன் கூட்டணி போக தமிழக வெற்றிக் கழகம் திமுகவோ, அதிமுகவோ இல்லை. அரசியல் ஆதாயங்களுக்காக மக்களை மதரீதியாக பிளவு படுத்தி அதில் குளிர்காய்கின்ற பாஜகவின் விசமத்தனமான வேலைகள் தமிழ்நாட்டில் இனி எடுபடாது.

தந்தை பெரியாரை அவமதித்தோ, அறிஞர் அண்ணாவை அவதூறுக்கு உள்ளாக்கியோ எங்கள் மதிப்பு மிக்க தலைவர்களை வைத்து தமிழ்நாட்டில் அரசியல் செய்ய நினைத்தால் அதில் பாஜக ஒரு போதும் வெற்றி பெற முடியாது.  தவெக தலைமையில் அமையும் கூட்டணி திமுக பாஜாவிற்கு எதிரானதாகத்தான் எப்போதும் இருக்கும் அதில் சமரசம் என்ற பேச்சுக்கே இடம் இல்லை.

 முதல் அமைச்சர் பரந்தூர் மக்களை சந்திக்கவில்லை எனில், நானே பரந்தூர் மக்களை தலைமைச் செயலகத்திற்கு அழைத்துச் செல்வேன். அப்படி ஒரு சூழல் உருவானாலும் அதை எதிர்கொள்ள நான் தயார்.பரந்தூரில் உள்ள 1,500 குடும்பங்களின் நிலை முதலமைச்சருக்கு அவ்வளவு சர்வசாதாரணமாக போய்விட்டதா? என்று கூறியுள்ளார்.