கோடைகாலம் என்றாலே நம் நினைவுக்கு வருவது சுட்டெரிக்கும் கத்திரி வெயிலும், வெளியில் செல்லும் போது ஏற்படும் அனல் காற்றும் தான். "வெயிலில் அதிகம் அலைய வேண்டாம், வீட்டுக்குள்ளேயே இருங்கள்" என்று மருத்துவர்கள் அறிவுறுத்துவது வழக்கம். ஆனால், நாம் வீட்டுக்குள் பாதுகாப்பாக இருக்கும் போதும் சில தவறான பழக்க வழக்கங்களால் உடலின் வெப்பம் அதிகரித்து, வெப்பவாதம் (Heatstroke) மற்றும் நீர்ச்சத்து குறைபாடு (Dehydration) போன்ற ஆபத்துகள் ஏற்படும் என்று நிபுணர்கள் எச்சரிக்கின்றனர்.

வீட்டில் தவிர்க்க வேண்டிய 10 தவறுகள்:

1. தாகம் எடுக்கும் வரை காத்திருப்பது 

நம்மில் பலர் தாகம் எடுத்தால் மட்டுமே தண்ணீர் குடிக்கும் பழக்கம் கொண்டிருக்கிறோம். ஆனால், மருத்துவர்களின் கூற்றுப்படி, உங்களுக்கு தாகம் எடுக்கிறது என்றாலே உங்கள் உடலில் ஏற்கனவே நீர்ச்சத்து குறையத் தொடங்கிவிட்டது என்று அர்த்தம். எனவே, தாகம் எடுக்காவிட்டாலும் குறிப்பிட்ட இடைவெளியில் தொடர்ந்து தண்ணீர் குடிப்பதை வழக்கமாக்கிக் கொள்ளுங்கள்.

2. காபி, டீ மற்றும் ஆல்கஹால் அதிகம் குடிப்பது

கோடை வெயிலுக்கு குளிர்ந்த ஐஸ் காபியோ அல்லது குளிர்பானங்களோ குடிப்பது இதமாக இருக்கலாம். ஆனால், காஃபின் (Caffeine) மற்றும் ஆல்கஹால் கலந்த பானங்கள் உடலில் உள்ள நீரை வேகமாக வெளியேற்றி, நீர்ச்சத்து குறைபாட்டை (Dehydration) தீவிரமாக்கும்.

3. இறுக்கமான மற்றும் கரும் நிற ஆடைகளை அணிவது

கருப்பு மற்றும் அடர் நிற ஆடைகள் வெப்பத்தை அதிகமாக உறிஞ்சும் தன்மை கொண்டவை. அதேபோல், இறுக்கமான ஆடைகள் உடலில் காற்று புகுவதைத் தடுத்து, வியர்வையைத் தேக்கி வைக்கும். இதனால் உடல் வெப்பநிலை அதிகரிக்கும். கோடையில் பருத்தி (Cotton) மற்றும் லினன் போன்ற லேசான, வெளிர் நிற ஆடைகளையே தேர்வு செய்ய வேண்டும்.

4. மின்விசிறிகளை (Fans) மட்டுமே முழுமையாக நம்புவது

வெப்பநிலை 35°C அல்லது 40°C-ஐத் தாண்டும் தீவிரமான கத்திரி வெயில் காலங்களில், வெறும் மின்விசிறிகள் மட்டுமே உடலைக் குளிர்விக்கப் போதாது. மின்விசிறிகள் அறையில் உள்ள வெப்பக் காற்றையே சுழலச் செய்யும். எனவே, அறையின் காற்றோட்டத்தை உறுதி செய்வதுடன், தேவைக்கேற்ப ஏர் கூலர் அல்லது ஏர் கண்டிஷனர்களைப் பயன்படுத்துவது நல்லது.

5. எலக்ட்ரோலைட்டுகளை (Electrolytes) மறந்துவிடுவது

அதிகப்படியான வெயிலால் வியக்கும் போது நம் உடலில் இருந்து தண்ணீர் மட்டுமல்லாமல் சோடியம், பொட்டாசியம் போன்ற அத்தியாவசிய எலக்ட்ரோலைட்டுகளும் வெளியேறுகின்றன. வெறும் தண்ணீர் மட்டும் குடிப்பது இதனை ஈடுகட்டாது. எலுமிச்சை சாறு, மோர், இளநீர் அல்லது ஓ.ஆர்.எஸ் (ORS) போன்றவற்றை எடுத்துக் கொள்வதன் மூலம் சோர்வு மற்றும் தசைப்பிடிப்பைத் தவிர்க்கலாம்.

6. அனல் பறக்கும் மதிய வேளையில் சமைப்பது

மதிய நேரங்களில் (பகல் 12 மணி முதல் 3 மணி வரை) சமையலறையில் கேஸ் ஸ்டவ் முன் நின்று சமைப்பது, வீட்டின் உள் வெப்பநிலையை பல மடங்கு உயர்த்தும். போதிய காற்றோட்டம் இல்லாத சமையலறைகளில் சமைப்பது வெப்பவாதம் ஏற்பட வழிவகுக்கும். எனவே, சமையலை அதிகாலையிலேயே முடிப்பது நல்லது.

7. கடினமான உணவுகளை உட்கொள்வது

கோடைகாலத்தில் பிரியாணி போன்ற மசாலா நிறைந்த, எண்ணெய்யில் பொரித்த கடினமான உணவுகளை ஜீரணிக்க உடல் அதிக ஆற்றலைச் செலவிட வேண்டியிருக்கும். இது உடலின் உள் வெப்பத்தை அதிகரிக்கும். அதற்குப் பதிலாக தர்பூசணி, வெள்ளரிக்காய் போன்ற நீர்ச்சத்து நிறைந்த பழங்கள் மற்றும் காய்கறிகளை அதிகம் சேர்த்துக் கொள்ள வேண்டும்.

8. காரை பூட்டிவிட்டு குழந்தைகளையோ, செல்லப் பிராணிகளையோ உள்ளே விடுவது

வெயிலில் நிறுத்தப்பட்டிருக்கும் காரின் உட்புற வெப்பநிலை, சில நிமிடங்களிலேயே ஆபத்தான அளவிற்கு உயர்ந்துவிடும். காரின் ஜன்னல் கதவுகள் சற்று திறந்து இருந்தாலும் இது ஆபத்தானதுதான். எனவே, குழந்தைகளையோ அல்லது செல்லப் பிராணிகளையோ சில நிமிடங்கள் கூட காரில் தனியாக விட்டுச் செல்லக் கூடாது.

9. காற்றோட்டம் இல்லாத அறைகளில் தூங்குவது

இரவு நேரங்களில் போதிய காற்றோட்டம் இல்லாத, வெப்பம் நிறைந்த அறைகளில் தூங்குவது உடலுக்குத் தொடர் அழுத்தத்தை (Heat Stress) ஏற்படுத்தும். குறிப்பாக முதியவர்கள் மற்றும் இதயப் பிரச்சனை உள்ளவர்களுக்கு இது மிகவும் ஆபத்தானது. படுக்கைக்குச் செல்லும் முன் அறையைக் குளிர்விப்பதும், தாராளமாகத் தண்ணீர் குடிப்பதும் அவசியம்.

10. வீட்டின் ஜன்னல்களைத் தவறான நேரத்தில் திறந்து வைப்பது

பகல் நேரத்தில் வெளியில் அனல் காற்று வீசும்போது வீட்டின் ஜன்னல்களைத் திறந்து வைத்தால், வெளி வெப்பம் வீட்டிற்குள் நுழைந்து அறையைத் தணலாக மாற்றிவிடும். பகல் நேரங்களில் ஜன்னல்களை மூடி, திரைச்சீலைகளைப் (Curtains) பயன்படுத்துங்கள். மாலை மற்றும் இரவு நேரங்களில் குளிர்ந்த காற்று வீசும்போது மட்டுமே ஜன்னல்களைத் திறந்து வைக்க வேண்டும்.

கோடைகால வெப்ப அலைகளில் இருந்து தப்பிக்க வெளியில் செல்வதைத் தவிர்ப்பது எவ்வளவு முக்கியமோ, அவ்வளவு முக்கியம் வீட்டுக்குள்ளும் இந்த எளிய ஆரோக்கிய விதிகளைப் பின்பற்றுவது. தகுந்த முன்னெச்சரிக்கையுடன் இந்த கோடையை ஆரோக்கியமாகக் கடப்போம்!