சென்னை: நடிகையும், டிவிட்டரில் பிரபலமானவரும் ஆன வினோதினி வைத்தியநாதன் திடீர் அரசியல் பிரவேசம் மேற்கொண்டுள்ளார்.

நடிகையாக வலம் வரும் வினோதினி சமூக அவலங்கள் குறித்து அக்கறை கொண்டவர். மனதுக்குப் பட்டதை டக்கென தேங்காய் உடைப்பது போல போட்டு உடைத்து விடுவார். நாட்டு நடப்புகளை வைத்து அவர் போட்ட வீடியோக்களும், டிவீட்டுகளும் பெரும் அளவில் விவாதங்களை எழுப்பியுள்ளன. பலரது பாராட்டுக்களையும் கூடவே பெற்றுள்ளன.

இந்தநிலையில் கமல்ஹாசனின் மக்கள் நீதி மய்யம் கட்சியில் தன்னை இணைத்துக் கொண்டுள்ளார் வினோதினி. இதுதொடர்பாக அவர் ஒரு டிவீட் போட்டு கலகலப்பை ஏற்படுத்தியுள்ளார். அதை நீங்களே படியுங்களேன்.

கடவுள் டு அஞ்ஞானவாதி: நான் உன்ன படைச்சேன்… நீ எனக்கு என்ன செஞ்சே?

அஞ்ஞானவாதி: நீ படைச்ச எல்லாருக்கிட்டையும் போயி டேய் நீங்க எல்லாரும் கடவுள்தாண்டா, அதுக்கு எதுக்குடா உங்களுக்குள்ள சண்ட போட்டுக்குறீங்கன்னு சொல்லிட்டிருக்கேன் சாமி.

கடவுள் டு அஞ்ஞானவாதி: மய்யத்துல என்ன பொறுப்புல இருக்க?

அஞ்ஞானவாதி: இருக்கேங்குற பொறுப்புல இருக்கேன் சாமி.

கடவுள் டு அஞ்ஞானவாதி: சரி, நீ பிறப்பால் இந்து.. இந்து மதக்கொள்கைய அடிப்படையா கொண்ட கட்சிக்குப் போயிருக்கலாமே?

அஞ்ஞானவாதி: வாரத்துக்கு ஒரு முறை கள்ள ஆடியோ வீடியோ ரெக்கார்டிங் இருக்கான்னு வீட்ட, காரெல்லாம் debug பண்றதுக்கு காசில்ல சாமி.

கடவுள் டு அஞ்ஞானவாதி: அப்போ பகுத்தறிவு பேசுற கட்சி?

அஞ்ஞானவாதி: பகுத்தறிவா? அப்படினா என்னன்னு கேக்குறாங்க சாமி. அதுலயும் யாகம்லாம் செய்யுறாங்க.

கடவுள் டு அஞ்ஞானவாதி: அப்போ கரப்ஷன்? மதவாதப் பிரிவினை?

அஞ்ஞானவாதி: எந்தப்பக்கம் நடந்தாலும் குரல் கொடுப்பேன் சாமி.

கடவுள் டு அஞ்ஞானவாதி: சரி, அப்போ ஏன் மய்யம்? ஒரு சீட்டுகூட இல்லையே?

அஞ்ஞானவாதி: சீட்டு குலுக்கிப்போட்டு இந்த பதவி எடுத்துக்கோ அந்தப்பதவி எடுத்துக்கோங்குறதுக்கு இங்க வாரிசு அரசியல் இல்லையே சாமி. சார்ஜ் சீட் செய்யப்பட்ட ஆளுங்களும் இல்லையே சாமி… சீட்டு விளையாடுறத ஆதரிக்கிற கூட்டமும்…

கடவுள்: போதும் போதும்… சீட் என்று மூன்று முறைக்கு மேல் சொல்லியதால் நீ ஆட்டத்திலிருந்து விலக்கப்பட்டாய்.

அஞ்ஞானவாதி: இப்போதான் ஆட்டமே ஆரம்பிக்கிறது சாமி.

ஆரம்பிக்கலாங்களா?

மய்ய அரசியல…

ஏற்கனவே திரைத்துறையைச் சேர்ந்த ஸ்ரீபிரியா, கோவை சரளா, சினேகன் போன்றோர் மக்கள் நீதி மய்யம் கட்சியை அலங்கரித்துள்ளனர். இப்போது வினோதினி இணைந்துள்ளார். கலகல வினோதினியால் மய்யம் எப்படியெல்லாம் எகிறி அடிக்கப் போகிறது என்பதைப் பொறுத்திருந்து பார்ப்போம்.