ஹரியானாவில் பரவும் கலவரம்.. போலீஸ் தடை உத்தரவு அமல்.. பலத்த பாதுகாப்பு!

Aug 01, 2023,11:48 AM IST

குருகிராம் : மணிப்பூரில் கடந்த 3 மாதங்களுக்கும் மேலாக வன்முறை, கலவரம் சம்பவங்கள் நடந்து நாட்டையே உலுக்கி வரும் நிலையில், தற்போது அரியானா மாநிலத்திலும் வன்முறை, கலவரம் வெடித்துள்ளது. இதனால் வட மாநிலங்களில் உச்சகட்ட பதற்றம் நிலவுகிறது.

அரியானாவின் நுஹ் பகுதியில் கடந்த இரண்டு நாட்களுக்கு முன் நடந்த மத ஊர்வலத்தை தடுக்க முயன்ற போலீஸ் ஒருவர் சுட்டுக் கொலை செய்யப்பட்டுள்ளார். இதனால் இரண்டு கோஷ்டியினர் இடையே மோதல் ஏற்பட்டது. இதன் எதிரொலியாக மசூதி ஒன்றில் இளைஞர் ஒருவர் அடித்துக் கொல்லப்பட்டுள்ளார். இந்த கலவரம் அடுத்தடுத்த மாவட்டங்களுக்கும் பரவி உள்ளது. இதனால் பல இடங்களிலும் இரு மதத்தினரிடையே மோதல் வெடித்து வருகிறது.

அரியானாவில் இது வரை நடந்த மத கலவரம், மோதலில் 4 பேர் கொல்லப்பட்டுள்ளனர். 30 க்கும் அதிகமானவர்கள் படுகாயம் அடைந்துள்ளனர். பேலீசாரின் வாகனங்கள், தனியார் வாகனங்கள் உள்ளிட்டவைகள் தீ வைத்து எரிக்கப்பட்டுள்ளன. இதனால் அரியானா முழுவதும் பதற்றம் நிலவுகிறது. போலீசார் அதிக அளவில் குவிக்கப்பட்டுள்ளனர். மத வழிபாட்டு தலங்களுக்கும் பலத்த பாதுகாப்பு போடப்பட்டுள்ளது.

மக்கள் அமைதி காக்க வேண்டும் என அம்மாநில முதல்வர் பொது மக்களை கேட்டுக் கொண்டுள்ளார். பல இடங்களில் கல்வீச்சு சம்பவங்கள் நடைபெற்று வருவதால் அதிகமானவர்கள் ஒரே இடத்தில் ஒன்று கூட போலீசார் தடை விதித்துள்ளனர். இந்த வன்முறை சம்பவம் தொடர்பாக இதுவரை 20 க்கும் அதிகமான வழக்குகள் பதிவு செய்யப்பட்டுள்ளனர்.