மயிலாடுதுறை: கலை என்பது வெறும் பொழுதுபோக்கு மட்டுமல்ல, அது ஒரு சமூகத்திற்கான ஆழமான கருத்துக்களைச் சொல்லும் ஒரு சக்திவாய்ந்த ஊடகமும் ஆகும். 

சீர்காழி, அரசு இசைப்பள்ளியில் அண்மையில் நடைபெற்ற 'தமிழிசை விழா மற்றும் ஆண்டுவிழா - 2026' இந்த உண்மையை மீண்டும் மெய்ப்பித்தது. இந்நிகழ்வின் ஒரு முக்கியப் பகுதியாக, சுபாஷினி இளங்கோவன் மற்றும் குழுவினரால் வழங்கப்பட்ட பொம்மலாட்ட நிகழ்ச்சி, கலை வழி சமூக மாற்றத்திற்கு ஒரு மிகச்சிறந்த எடுத்துக்காட்டாய் அமைந்தது.

இந்த நிகழ்வின் பிரதான நோக்கம், நம் பாரம்பரியக் கலைகளைப் போற்றுவதும் வளர்ப்பதும் ஆகும். கலை பண்பாட்டுத் துறை, மண்டல கலை பண்பாட்டு மையம், தஞ்சாவூர் மற்றும் மாவட்ட அரசு இசைப்பள்ளி, சீர்காழி ஆகியவற்றால் ஒருங்கிணைக்கப்பட்ட இந்நிகழ்வு, 21.04.2026 அன்று நடைபெற்றது.

இவ்விழாவில் வழங்கப்பட்ட பொம்மலாட்டக் கதை, இன்று ஒவ்வொரு வீட்டிலும் சந்திக்கும் ஒரு முக்கியப் பிரச்சனையை மையமாகக் கொண்டிருந்தது. அதுதான், குழந்தைகளின் கைபேசி அடிமைத்தனம்.

கலையின் அழகியல் மூலம், சுபாஷினி இளங்கோவன் இக்கதையை மிக அழுத்தமாகப் பதிவு செய்தார். ஒரு சிறு குழந்தைக்கு உணவூட்டுவது முதல் அனைத்து தேவைகளுக்கும் பெற்றோர் கைபேசியைக் கொடுக்கிறார்கள். இதனால் கைபேசி இல்லாமல் எதுவும் செய்ய முடியாத நிலைக்கு அக்குழந்தை அடிமையாகிறது.

ஸ்கூலுக்குச் செல்லும்போது கூட கைபேசி கேட்டு அடம் பிடிக்கிறது. ஆசிரியர் மறுத்ததும், தரையில் விழுந்து கதறி அழுகிறது. அதன் தீவிர பாதிப்பைக் காட்டும் விதமாக, தன் கைகளால் கைபேசித் திரையைத் தொடுவது போலவும், டைப் செய்வது போலவும் பாவனை செய்வது காண்போரைக் கண்கலங்கச் செய்தது.

மருத்துவ ரீதியான பாதிப்புகளைக் கதை விளக்கியது. நரம்பு மண்டலம் பலவீனமடைவது, சிறு வயதிலேயே கண் பார்வை இழந்து கண்ணாடி அணியும் நிலை என பல சிக்கல்களைக் கதை சுட்டிக்காட்டியது.

"நல்ல வேளை, சரியான நேரத்தில் குழந்தையை அழைத்து வந்தீர்கள்" என்று மருத்துவர்கள் எச்சரிக்கும் நிலை இன்று அதிகரித்துள்ளது. இதற்குத் தீர்வாக, குழந்தைகளின் கைகளில் கைபேசிகளைக் கொடுப்பதைத் தவிர்த்து, அவர்களுக்குப் பயனுள்ள நல்ல புத்தகங்களை வாங்கிக் கொடுக்க வேண்டும் என சுபாஷினி இளங்கோவன் அவர்கள் மிகத் தெளிவாக வலியுறுத்தினார்.

"கைபேசித் திரைகளுக்குப் பதில் புத்தகங்களின் பக்கங்களை அவர்கள் புரட்டட்டும். அதுவே அவர்களின் எதிர்காலத்தை வளமாக்கும்"

ஆண்டுவிழாவின் ஒரு பகுதியாக வழங்கப்பட்ட இந்த விழிப்புணர்வு பொம்மலாட்டம், சமூகப் பொறுப்புணர்வு மிக்க ஒரு படைப்பாக அமைந்தது. கலையும் சமூகமும் ஒன்றிணைந்த இத்தகைய நிகழ்வுகள், ஆரோக்கியமான எதிர்காலத் தலைமுறையை உருவாக்க மிக அவசியம்.

இதுகுறித்து சுபாஷினி இளங்கோவன் கூறுகையில்,இன்றைய நவீன உலகில், குழந்தைகளுக்கு உணவூட்டுவது முதல் அவர்களை அமைதிப்படுத்துவது வரை அனைத்திற்கும் கைபேசியே (Smartphone) முதன்மைத் தீர்வாகிவிட்டது. ஆனால், இந்தத் தற்காலிகத் தீர்வு எதிர்காலத்தில் எவ்வளவு பெரிய பாதிப்புகளை ஏற்படுத்தும்.

குழந்தைகளுக்குச் சாப்பாடு கொடுக்கும்போது கைபேசியைக் காட்டிப் பழக்குவது இன்று பல வீடுகளில் வழக்கமாகிவிட்டது. இதன் விளைவாக, குழந்தைகள் கைபேசி இல்லாமல் எதையும் செய்ய மறுக்கும் நிலைக்குத் தள்ளப்படுகிறார்கள். பள்ளிக்குச் செல்லும் போது கூட, ஆசிரியரிடம் கைபேசி கேட்டு அடம் பிடிக்கும் அளவிற்கு அவர்கள் அதற்கு அடிமையாகிவிடுகிறார்கள்.

கைபேசி கிடைக்காதபோது குழந்தைகள் தங்களை அறியாமலேயே மன அழுத்தத்திற்கு உள்ளாகிறார்கள். ஒரு நிகழ்வில், கைபேசி தர மறுத்ததால் ஒரு குழந்தை தரையில் விழுந்து அழுதுகொண்டே, தன் கைகளால் கைபேசியைத் தொடுவது போலவும் (Touch Screen), டைப் செய்வது போலவும் பாவனை செய்தது அதன் தீவிரத்தைக் காட்டுகிறது. 

மருத்துவ ரீதியாகப் பார்த்தால், கைபேசிப் பயன்பாட்டால்: குழந்தைகளின் நரம்பு மண்டலம் பலவீனமடைகிறது, கண் பார்வை பாதிக்கப்பட்டு, சிறு வயதிலேயே கண்ணாடி அணியும் நிலை ஏற்படுகிறது, பலவிதமான உடல்நலப் பிரச்சனைகளைச் சந்திக்க நேரிடுகிறது.

பாடல்கள், கதைகள் மற்றும் பொம்மலாட்டம் போன்ற கலைகள் வழியாக குழந்தைகளுக்கு இந்த விழிப்புணர்வைக் கொண்டு செல்வது காலத்தின் கட்டாயமாகும். குழந்தைகளை டிஜிட்டல் அடிமைத்தனத்திலிருந்து மீட்டு, அவர்களை ஆரோக்கியமான பாதையில் வழிநடத்துவோம் என்றார் அவர்.