சென்னை: நார்வே செஸ் தொடரில் சாம்பியன் பட்டம் வென்று வரலாற்று சாதனை படைத்துள்ள தமிழகத்தைச் சேர்ந்த இளம் கிராண்ட்மாஸ்டர் ஆர்.பிரக்ஞானந்தா, சென்னை தலைமைச் செயலகத்தில் தமிழக முதல்வர் சி.ஜோசப் விஜயைச் சந்தித்து வாழ்த்துப் பெற்றார். 

இந்தச் சந்திப்பின் போது, உலகப் புகழ்பெற்ற சதுரங்க வீரரான பிரக்ஞானந்தாவுடன் முதல்வர் விஜய் செஸ் விளையாடி மகிழ்ந்ததுடன், அவரை வெகுவாகப் பாராட்டி தனது வாழ்த்துகளையும் தெரிவித்துக் கொண்டார்.

சமீபத்தில் நார்வேயின் ஓஸ்லோ நகரில் நடைபெற்ற 'நார்வே செஸ் 2026' (Norway Chess 2026) தொடரில் பிரக்ஞானந்தா அபாரமான ஆட்டத்தை வெளிப்படுத்தினார். உலகத் தரம் வாய்ந்த வீரர்கள் பங்கேற்ற இத்தொடரில், உலகத் தரவரிசையில் முதலிடத்தில் இருக்கும் மேக்னஸ் கார்ல்சனை இருமுறை வீழ்த்தி ஒட்டுமொத்த செஸ் உலகையும் தன் பக்கம் திருப்பினார். இறுதிச் சுற்றில் ஜெர்மனியின் வின்சென்ட் கெய்மரை வீழ்த்தியதன் மூலம், இத்தொடரின் வரலாற்றிலேயே சாம்பியன் பட்டம் வென்ற முதல் இந்திய வீரர் என்ற மாபெரும் சாதனையை பிரக்ஞானந்தா படைத்துள்ளார்.

முதல்வருடன் சுவாரசியமான செஸ் ஆட்டம் :

இந்த வரலாற்றுச் சிறப்புமிக்க வெற்றியைத் தொடர்ந்து, சென்னை திரும்பிய பிரக்ஞானந்தா இன்று தமிழக முதல்வர் விஜயைச் சந்தித்தார். அப்போது அவர், தான் வென்ற நார்வே செஸ் கோப்பையை முதல்வரிடம் காண்பித்து வாழ்த்துப் பெற்றார். 

இந்தச் சந்திப்பின் போது ஒரு சுவாரசியமான நிகழ்வாக, முதல்வர் விஜய் மற்றும் பிரக்ஞானந்தா ஆகிய இருவருக்கும் இடையே ஒரு நட்பு ரீதியிலான செஸ் போட்டி நடைபெற்றது. உலகின் டாப் வீரர்களையே அதிர வைக்கும் பிரக்ஞானந்தாவின் வியூகங்களை எதிர்கொண்டு முதல்வர் விஜய் ஆர்வத்துடன் விளையாடினார். விறுவிறுப்பாக நடைபெற்ற இந்த ஆட்டத்தின் இறுதியில் பிரக்ஞானந்தா வெற்றி பெற்றார். உலக சாம்பியனுடன் முதல்வர் செஸ் விளையாடிய இந்தத் தருணம் அங்கிருந்தோரை வெகுவாகக் கவர்ந்தது.

முதல்வர் விஜய் பாராட்டு :

பிரக்ஞானந்தாவின் அசாத்திய திறமையைப் பாராட்டிய முதல்வர் விஜய், தனது சமூக வலைதளப் பக்கத்திலும் வாழ்த்துச் செய்தியைப் பகிர்ந்துள்ளார். அதில் அவர் குறிப்பிட்டதாவது, "நார்வே செஸ் தொடரில் சாம்பியன் பட்டம் வென்று, உலக அரங்கில் இந்தியாவிற்கும், குறிப்பாக தமிழகத்திற்கும் பெருமை சேர்த்துள்ள தம்பி பிரக்ஞானந்தாவிற்கு எனது மனமார்ந்த வாழ்த்துகள். உலக சாம்பியன் கார்ல்சனை இருமுறை வீழ்த்தி, தொடர்ச்சியாக 4 போட்டிகளில் வென்று அவர் படைத்த சாதனை இளைய தலைமுறைக்கு ஒரு மிகப்பெரிய உத்வேகம்."

நார்வே செஸ் கோப்பையை வென்று தமிழக மண்ணிற்குப் பெருமை சேர்த்துள்ள பிரக்ஞானந்தாவிற்கு விளையாட்டு ஆர்வலர்களும், பொதுமக்களும் தங்களது வாழ்த்துகளைத் தொடர்ந்து தெரிவித்து வருகின்றனர்.