கெளதம் அதானி வீட்டில் டும் டும் டும்.. இளைய மகன் ஜீத் அதானி நிச்சயதார்த்தம்.. !

Mar 17, 2023,10:18 AM IST

மும்பை: பெரும் கோடீஸ்வரர் கெளதம் அதானியின் இளைய மகன் ஜீத் திருமண நிச்சயதார்த்தம் நடந்துள்ளது. வைர வியாபாரியின் மகளை மணக்கவிருக்கிறார் ஜீத்.

அதானி ஏர்போர்ட்ஸ், அதானி டிஜிட்டல் லேப்ஸ் ஆகியவற்றை நிர்வகித்து வருகிறார் ஜீத் அதானி. அகமதாபாத்தில் இந்த திருமண நிச்சயதார்த்தம் நடந்துள்ளது. மிகவும் எளிய முறையில், பெரிய அளவில் யாருக்கும் சொல்லாமல் இதை நடத்தியுள்ளனர். மிகவும் நெருங்கிய நண்பர்கள், நெருங்கிய உறவினர்கள் மட்டுமே இதில் கலந்து கொண்டனராம்.

பிரபல வைர வியாபாரி ஜெய்மின் ஷாவின் மகள் திவா ஜெய்மின் ஷாவைத்தான் மணக்கவிருக்கிறார் ஜீத் அதானி. திருமண நிச்சயதார்த்தம் குறித்து எந்தத் தகவலையும் அதானி குடும்பத்தினர் வெளியிடவில்லை. சமூக வலைதளங்களில் இவர்களது திருமண நிச்சயதார்த்த புகைப்படங்கள் வெளியான பின்னர்தான் ஜீத் அதானிக்கு நிச்சயதார்த்தம் நடந்ததே தெரியவந்தது.

அமெரிக்காவின் பென்சில்வேனியாவில் படித்தவர் ஜீத் அதானி. அதானி குரூப்பில் துணைத் தலைவராக இருக்கிறார்.

கெளதம் அதானிக்கு இரண்டு மகன்கள் உள்ளனர். மூத்த மகன் கரண் அதானி போர்ட்ஸ் மற்றும் சிறப்பு பொருளாதார மண்டலங்களுக்கான தலைமை செயலதிகாரியாக இருக்கிறார். இவருக்கு ஏற்கனவே திருமணமாகி விட்டது. மனைவி பெயர் பரீதி ஷிராப். சிரில்அமர்சந்த் மங்கள்தாஸ் என்ற சட்ட நிறுவனத்தின் நிறுவனர் சிரில் ஷிராப்பின் மகள்தான் பரீதி. கரண் அதானியை விட 10 வயது இளையவராம் ஜீத் அதானி.