டெல்லி: 2025-ம் ஆண்டு இந்தியர்கள் கூகுளில் (Google) அதிகம் தேடிய விஷயங்கள் குறித்த 'Year in Search 2025' பட்டியலை கூகுள் நிறுவனம் அதிகாரப்பூர்வமாக வெளியிட்டுள்ளது. 

இந்த ஆண்டு இந்தியர்களின் தேடலில் விளையாட்டு மற்றும் செயற்கை நுண்ணறிவு (AI) ஆகிய இரண்டும் சரிசமமாகப் போட்டியிட்டுள்ளன.

இந்திய அளவில் முதலிடம் பிடித்த 'IPL'

வழக்கம் போலவே இந்தியர்களின் கிரிக்கெட் மோகம் இந்த ஆண்டும் எதிரொலித்தது. 2025-ல் ஒட்டுமொத்தத் தேடலில் IPL (Indian Premier League) முதலிடத்தைப் பிடித்தது. விளையாட்டுப் பிரிவில் அதிகம் தேடப்பட்டது கிரிக்கெட் குறித்த செய்திகள்தான் என்பது குறிப்பிடத்தக்கது.

விளையாட்டுத் துறையில் டாப் 5 தேடல்கள்:

IPL (இந்தியன் பிரீமியர் லீக்)

ஆசிய கோப்பை (Asia Cup)

ICC சாம்பியன்ஸ் டிராபி (ICC Champions Trophy)

புரோ கபடி லீக் (Pro Kabaddi League)

மகளிர் உலகக் கோப்பை (Women’s World Cup)

தொழில்நுட்பத்தில் 'Gemini' ஆதிக்கம்

2025-ம் ஆண்டை 'செயற்கை நுண்ணறிவு ஆண்டு' என்றே சொல்லலாம். கூகுளின் தேடல் வரலாற்றில் இந்த ஆண்டு 'Google Gemini' (கூகுள் ஜெமினி) என்ற வார்த்தை ஒட்டுமொத்தப் பட்டியலில் இரண்டாவது இடத்தை பிடித்து சாதனை படைத்தது. 

தொழில்நுட்பப் பிரிவில் ஜெமினி தவிர, Grok, Deepseek மற்றும் ChatGPT போன்ற வார்த்தைகளும் அதிகளவில் தேடப்பட்டன.

அதிகம் தேடப்பட்ட மனிதர்கள் (People)

விளையாட்டு வீரர்கள் இந்த ஆண்டு தேடல் பட்டியலில் ஆதிக்கம் செலுத்தினர். குறிப்பாக, 14 வயதிலேயே ஐபிஎல் போட்டியில் சதம் அடித்து சாதனை படைத்த வைபவ் சூர்யவன்ஷி (Vaibhav Suryavanshi) முதலிடம் பிடித்தார். அவரைத் தொடர்ந்து பிரியான்ஷ் ஆர்யா, அபிஷேக் சர்மா மற்றும் ஜெமிமா ரோட்ரிக்ஸ் ஆகியோர் அதிக தேடப்பட்ட மனிதர்கள் பட்டியலில் இடம்பெற்றனர்.

சினிமா மற்றும் கலாச்சாரம்

2025-ல் இந்திய அளவில் அதிகம் தேடப்பட்ட திரைப்படமாக 'சயாரா' (Saiyaara) உருவெடுத்தது. தமிழ்ப் படங்களைப் பொறுத்தவரை ரஜினிகாந்தின் 'கூலி' (Coolie) மற்றும் 'காந்தாரா: ஏ லெஜண்ட்' ஆகிய படங்கள் அதிக ஆர்வத்தைத் தூண்டின.

ஆன்மீகம் மற்றும் கலாச்சாரம் சார்ந்த தேடலில் மகா கும்பமேளா முதலிடத்தைப் பிடித்தது.

இந்தியர்கள் அதிகம் தேடிய வார்த்தைக்கான அர்த்தம் என்று பார்த்தால் "Ceasefire" (போர்நிறுத்தம்) என்ற வார்த்தையை அதிகமாக தேடியுள்ளனர். மேலும், Gen-Z இளைஞர்கள் பயன்படுத்தும் "Pookie" என்ற வார்த்தையின் அர்த்தத்தையும் பலரும் தேடியுள்ளனர்.