சென்னை: தமிழக சட்டசபை தேர்தல் காரணமாக சென்னையில் நடைபெறவுள்ள ஐபிஎல் (IPL 2026) கிரிக்கெட் போட்டிகளை வேறு தேதிக்கு மாற்றக் கோரி தாக்கல் செய்யப்பட்ட மனுவை சென்னை உயர்நீதிமன்றம் இன்று தள்ளுபடி செய்து உத்தரவிட்டுள்ளது. 

இந்தியாவில் தற்போது 19-வது ஐபிஎல் கிரிக்கெட் தொடர் விறுவிறுப்பாக நடைபெற்று வருகிறது. இதுவரை 12 போட்டிகள் நிறைவடைந்துள்ள நிலையில், இன்று 13வது போட்டி நடைபெற உள்ளது. தமிழகத்தின் தலைநகரான சென்னையில் உள்ள சேப்பாக்கம் மைதானத்தில் பல போட்டிகள் நடத்த திட்டமிடப்பட்டுள்ளன. 

இதற்கிடையில், 2026-ம் ஆண்டுக்கான தமிழக சட்டசபை தேர்தல் ஏப்ரல் 23ம் தேதி நடைபெற உள்ளது. தேர்தல் பாதுகாப்புப் பணிகள் மற்றும் மக்கள் நடமாட்டத்தைக் கருத்தில் கொண்டு, சென்னையில் திட்டமிடப்பட்டுள்ள ஐபிஎல் போட்டிகளைத் தள்ளி வைக்க வேண்டும் அல்லது வேறு தேதிகளுக்கு மாற்ற வேண்டும் என சென்னை உயர்நீதிமன்றத்தில் பொதுநல வழக்கு ஒன்று தொடரப்பட்டது. தேர்தலின் போது காவல்துறை பாதுகாப்பு மற்றும் பொது அமைதிக்கு இது இடையூறாக அமையும் என மனுதாரர் தரப்பில் வாதிடப்பட்டது.

நீதிமன்றத்தின் அதிரடித் தீர்ப்பு:

இந்த வழக்கை இன்று (ஏப்ரல் 07, 2026) விசாரித்த நீதிபதிகள் அமர்வு, மனுதாரரின் கோரிக்கையை ஏற்க மறுத்து வழக்கை தள்ளுபடி செய்தது.சென்னையில் ஏற்கனவே ஒரு ஐபிஎல் போட்டி வெற்றிகரமாக நடத்தி முடிக்கப்பட்டுள்ளது. அந்தப் போட்டியில் எந்த விதமான பாதுகாப்பு விதிமீறல்களோ அல்லது சட்ட ஒழுங்கு சிக்கல்களோ ஏற்படவில்லை என்பதை நீதிமன்றம் சுட்டிக்காட்டியது.

"ஏற்கனவே ஒரு போட்டி சிறப்பாக நடந்து முடிந்துள்ள நிலையில், தேவையற்ற அச்சம் கொள்ளத் தேவையில்லை. ரசிகர்கள் 2-வது போட்டியையும் எவ்வித இடையூறுமின்றி கண்டு ரசிக்கலாம்" என்று நீதிபதிகள் உற்சாகமூட்டும் வகையில் தெரிவித்தனர்.

ரசிகர்கள் உற்சாகம் : 

போட்டிகளுக்கான பாதுகாப்பு ஏற்பாடுகளை அந்தந்த மாவட்ட நிர்வாகமும் காவல்துறையும் கவனித்துக் கொள்ளும் என்பதால், இதில் நீதிமன்றம் தலையிட வேண்டிய அவசியம் இல்லை எனக் கூறி மனு தள்ளுபடி செய்யப்பட்டது. 

சென்னை உயர்நீதிமன்றத்தின் இந்த அறிவிப்பால் சென்னை சூப்பர் கிங்ஸ் (CSK) ரசிகர்கள் மற்றும் ஐபிஎல் ரசிகர்கள், கிரிக்கெட் ஆர்வலர்கள் பெரும் மகிழ்ச்சி அடைந்துள்ளனர். இந்தத் தீர்ப்பின் மூலம், திட்டமிட்டபடி சென்னையில் ஐபிஎல் போட்டிகள் எவ்வித மாற்றமுமின்றி நடைபெறும் என்பது மீண்டும் ஒருமுறை உறுதி செய்யப்பட்டுள்ளது.