- சிவ.ப.மாலதி ராஜாராம், ஜெயங்கொண்டம் 

விநாயகர் துதி

அல்லல் போம், வல்வினை போம், அன்னை வயிற்றில்

பிறந்த தொல்லை போம், போகாத் துயரம் போம், - நல்ல

குணமதிகமாம் அருணைக் கோபுரத்தே மேவும்

கணபதியைக் கைத்தொழுதக் கால்.

---

சிவபுராணம் (தொடர்ச்சி)

[பாடல்]

36. வெய்யாய்! தணியாய்! இயமானனாம் விமலா!

[பொருள்]

வெம்மையுடையவனே! குளிர்ச்சி பொருந்தியவனே! (இயமானன்) வேள்வியின் தலைவனாகவும் விளங்கும் குற்றமில்லாதவனே!

---

[பாடல்]

37. பொய் ஆயின எல்லாம் போய் அகல வந்து அருளி

[பொருள்]

பொய்யானவை அனைத்தும் (எண்ணம், சொல், செயல்) என்னை விட்டு அகலும்படி, குருவாக வந்து எழுந்தருளி அருள் செய்தவனே!

---

[பாடல்]

38. மெய்ஞ்ஞானம் ஆகி மிளிர்கின்ற மெய்ச்சுடரே!

[பொருள்]

மெய்யுணர்வாகி (உண்மை அறிவாகி) என்னுள் திகழ்கின்ற பேரொளியே!

---

[பாடல்]

39. எஞ்ஞானம் இல்லாதேன் இன்பப் பெருமானே!

[பொருள்]

எந்தவிதமான (ஞானம்) அறிவும் இல்லாத எளியேனுக்கு இன்பம் தரும் பெருமானே!

---

[பாடல்]

40. அஞ்ஞானம் தன்னை அகல்விக்கும் நல் அறிவே!

[பொருள்]

அறியாமை என்னும் அக இருளை நீங்கச் செய்து, நன்மை தரும் அருளுருவே!

---

[பாடல்கள்]

41. ஆக்கம் அளவு இறுதி இல்லாய்! அனைத்து உலகும்

42. ஆக்குவாய் காப்பாய் அழிப்பாய் அருள் தருவாய்

43. போக்குவாய் என்னைப் புகுவிப்பாய் நின் தொழும்பில்

[பொருள்]

தோற்றம் (ஆக்கம்), நிலைபேறு (அளவு), முடிவு (இறுதி) ஆகிய எல்லைகள் இல்லாதவனே! அனைத்து உலகங்களையும் நீயே படைப்பாய் (ஆக்குவாய்); அவற்றை நீயே காப்பாய்; நீயே அழிப்பாய் (ஒடுக்குவாய்). ஆணவம், கன்மம், மாயை என்ற மும்மலங்களை அழித்து, இவற்றையெல்லாம் செய்து உன் பேரருளைத் தருவாய்! என்னை இப்பிறவியில் செலுத்தி (மறைத்தலின் மயக்கம் தருவாய்); அதன்பின் உன் (தொழும்பில்) திருத்தொண்டில் புகும்படி செய்வாய்! (இவற்றில் படைத்தல், காத்தல், அழித்தல், மறைத்தல், அருளல் என்ற ஐந்து தொழில்களும் அடங்கியுள்ளன).

---

[பாடல்]

44. நாற்றத்தின் நேரியாய்! சேயாய்! நனியானே!

[பொருள்]

(நாற்றம் என்றால் நறுமணம் என்பதைக் குறிக்கும்). மலரின் மணம் போல் நுட்பமானவனே! உன்னை வணங்காதவர்களுக்குத் தொலைவிலும் (சேயாய்), வணங்குபவர்களுக்கு மிக அருகிலும் (நனியானே) உள்ளவனே!

---

[பாடல்]

45. மாற்றம் மனம் கழிய நின்ற மறையோனே!

[பொருள்]

சொல்லிற்கும் (மாற்றம்), மனத்திற்கும் அப்பாற்பட்டு நின்று மறைப்பொருளாய் விளங்குபவனே!

தொடரும்...

திருச்சிற்றம்பலம்

(மாலதி ராஜாராம்,  உழவாரப்பணி மற்றும் தேவாரம் திருவாசகம் முற்றோதுதல் செய்தல் தையல் மற்றும் கைவினைப் பொருட்கள் செய்தல் பொழுதுபோக்கு ஆகும். இல்லத்தரசி)