ஸ்டாக்ஹோம்: நோபல் பரிசு அறிவிப்புக்கு முன் திடீரென அதிகரித்த சூதாட்ட நடவடிக்கை குறித்து நார்வே நோபல் நிறுவனம் விசாரணை நடத்துகிறது. 

2025 ஆம் ஆண்டுக்கான நோபல் அமைதிப் பரிசு அறிவிக்கப்படுவதற்கு சில மணி நேரங்களுக்கு முன்பு, வெனிசுலா எதிர்க்கட்சித் தலைவர் மரியா கொரினா மச்சாடோவுக்கு ஆதரவாக சூதாட்ட விகிதங்கள் திடீரென உயர்ந்தன. இது வெற்றியாளர் பற்றிய ரகசியத் தகவல் கசிந்திருக்கலாம் என்ற சந்தேகத்தை எழுப்பியுள்ளது.

Polymarket என்ற கிரிப்டோகரன்சி அடிப்படையிலான கணிப்புத் தளத்தில், மரியா கொரினா மச்சாடோவுக்கான சூதாட்ட விகிதங்கள் நான்கு சதவீதத்திற்கும் குறைவாக இருந்து திடீரென எழுபது சதவீதத்திற்கும் மேல் உயர்ந்தன. ஒரு புதிய கணக்கிலிருந்து செய்யப்பட்ட ஒரு பெரிய பந்தயம் சந்தையின் மனநிலையை மாற்றியதாக ஆய்வாளர்கள் குறிப்பிட்டுள்ளனர்.

அதிகாரப்பூர்வ அறிவிப்புக்கு சற்று முன்பு நடந்த இந்த திடீர் உயர்வு, நோபல் அமைப்புக்குள்ளிருந்து யாரேனும் தகவலைக் கசிய விட்டிருக்கலாமோ என்ற சந்தேகத்தை எழுப்பியுள்ளது. நோபல் குழுவின் தலைவர் ஜோர்கன் வாட்னே ஃப்ரைட்னெஸ், இந்த அசாதாரணமான நடவடிக்கையை ஒப்புக்கொண்டாலும், ரகசியத்தன்மையைப் பேணுவதில் குழு உறுதியாக இருப்பதாக வலியுறுத்தினார். வழக்கமான நடைமுறையின்படி, மச்சாடோ அறிவிப்புக்கு சில நிமிடங்களுக்கு முன்புதான் இது குறித்து தெரிவிக்கப்பட்டதாகக் கூறப்படுகிறது.

Polymarket போன்ற தளங்கள், வழக்கமான சூதாட்ட தளங்களை விட நிதிப் பரிவர்த்தனை தளங்களைப் போல செயல்படுவதாக நிபுணர்கள் கூறுகின்றனர். நோபல் நிறுவனத்திலிருந்து யாரேனும் தகவலை கசிய விட்டிருப்பது உண்மையாக இருந்தால், 123 ஆண்டு கால நோபல் அமைதிப் பரிசின் வரலாற்றில் மிக மோசமான சம்பவமாக இது அமையும். 

நோபல் நிறுவனம் தனது விசாரணையின் விவரங்களை வெளியிடவில்லை. விரைவில் இதுகுறித்த உண்மை தெரிய வரலாம் என்று தெரிகிறது.