- சு.தா.அறிவழகன்
கடந்த 35 ஆண்டுகளாகப் பயங்கரவாதத்தின் பிடியிலும், இரத்தக்களரியிலும் சிக்கித் தவித்த காஷ்மீர் பள்ளத்தாக்கு, ஒரு புதிய விடியலைக் கண்டிருக்கிறது.
தெற்கு காஷ்மீரின் குல்காம் மாவட்டத்தில் நடைபெற்ற துல்லியமான என்கவுண்டர் நடவடிக்கையில், லஷ்கர்-இ-தொய்பா பயங்கரவாத அமைப்பின் முக்கியத் தளபதியான லத்தீப் பட் வீழ்த்தப்பட்டதன் மூலம், காஷ்மீரில் உள்ளூரில் பிறந்து பயங்கரவாதிகளாக மாறியவர்களின் எண்ணிக்கை முற்றிலும் பூஜ்ஜியமாகியுள்ளது.
"35 ஆண்டுகளுக்குப் பிறகு ஒரு சாதனை படைக்கப்பட்டிருக்கிறது. இந்தியாவில் பிறந்த பயங்கரவாதிகளற்ற காஷ்மீர் உருவாகியுள்ளது" என மத்திய உள்துறை அமைச்சர் அமித் ஷா அறிவித்திருப்பது, இந்தியாவின் உள்நாட்டுப் பாதுகாப்பு வரலாற்றில் பொன் எழுத்துக்களால் பொறிக்கப்பட வேண்டிய ஒரு மைல்கல்லாகும்.
இந்த மாபெரும் வெற்றி ஒரே நாளில் சாத்தியமாகிவிடவில்லை. நவம்பர் 11-ஆம் தேதி சி.ஆர்.பி.எஃப் (CRPF) முகாம் மீது நடத்தப்பட்ட தாக்குதலுக்கு மூளையாகச் செயல்பட்ட லத்தீப் பட்டை, எட்டு நாட்கள் விடாப்பிடியாகத் தேடி, பொதுமக்களுக்கு எவ்வித பாதிப்பும் ஏற்படாத வகையில் பாதுகாப்புப் படையினர் வீழ்த்தியுள்ளனர். இந்திய ராணுவம், மத்திய ரிசர்வ் காவல் படை (CRPF), ஜம்மு-காஷ்மீர் காவல்துறை மற்றும் உளவுத்துறை ஆகியவற்றின் அசாத்திய ஒருங்கிணைப்பும், துல்லியமான வியூகமுமே இந்த வெற்றிக்கு அடித்தளமிட்டது.
பல தசாப்தங்களாக எல்லை தாண்டிய பயங்கரவாத சக்திகள், காஷ்மீர் இளைஞர்களை மூளைச்சலவை செய்து, அவர்களின் கைகளில் துப்பாக்கிகளைத் திணித்து வந்தன. ஆனால், கடந்த சில ஆண்டுகளாக மத்திய அரசு கடைப்பிடித்து வரும் 'பயங்கரவாதத்தைத் துளியும் சகிக்காத' (Zero Tolerance) கொள்கையும், பயங்கரவாதிகளுக்கு நிதி மற்றும் புகலிடம் அளிக்கும் கட்டமைப்புகளை வேரோடு அறுத்தெறிந்த நடவடிக்கைகளும் பயங்கரவாதத்தின் ஆணிவேரை அசைத்துவிட்டன. பயங்கரவாத அமைப்புகளில் உள்ளூர் இளைஞர்கள் இணைவது தடுக்கப்பட்டதுடன், எஞ்சியிருந்தவர்களும் சட்டத்தின் முன் நிறுத்தப்பட்டனர் அல்லது களத்தில் வீழ்த்தப்பட்டனர்.

உறைபனியிலும், கரடுமுரடான மலைப்பகுதிகளிலும் இரவு பகல் பாராமல் கண்விழித்து, தங்கள் இன்னுயிரைப் பணயம் வைத்து தேசத்தைக் காக்கும் நமது பாதுகாப்புப் படையினரின் தியாகத்திற்கு ஈடு இணை எதுவுமில்லை. ஒவ்வொரு வீரரின் வியர்வையும், தியாகமுமே இன்று காஷ்மீர் பள்ளத்தாக்கில் அமைதியையும், வளர்ச்சியையும் விதைத்துள்ளது.
உள்ளூர் பயங்கரவாதிகள் முற்றிலுமாக ஒழிக்கப்பட்டிருப்பது மிகப்பெரிய நிம்மதியைத் தந்தாலும், எல்லை தாண்டிய அச்சுறுத்தல்கள் முற்றிலுமாக ஓய்ந்துவிடவில்லை என்பதால் நமது விழிப்புணர்வு தொடர வேண்டும். பயங்கரவாதத்தின் நிழல் நீங்கி, அமைதிப் பூங்காவாக மாறிவரும் காஷ்மீர், இனி வளர்ச்சிப் பாதையில் பீடுநடை போடும் என்பதில் ஐயமில்லை.
நாட்டின் இறையாண்மையையும், மக்களின் பாதுகாப்பையும் உறுதி செய்த நமது வீரமிகு பாதுகாப்புப் படையினருக்கு ஒட்டுமொத்த தேசமும் தலைவணங்கி தனது நன்றியையும் பாராட்டுகளையும் தெரிவித்துக் கொள்கிறது!
காஷ்மீர் இளைஞர்கள் மீண்டும் தவறான பாதைக்குப் போய் விடாத வகையில் அவர்களுக்குத் தேவையான அனைத்தையும் செய்து தர வேண்டியது, அவர்களுக்கான சீரமைப்புத் திட்டங்களை உருவாக்கி அவர்களை வளப்படுத்த வேண்டியது மாநில மற்றும் மத்திய அரசுகளின் பொறுப்பு. வளமான காஷ்மீரை இனி நாம் காண்போம் என்பதில் ஐயமில்லை.
தென்தமிழ் தலையங்கம்: பயங்கரவாதத்தின் நிழல் நீங்கிய காஷ்மீர் - வரலாற்றுச் சாதனை!
ஊஞ்சல் ஆடுவது ஏன் தெரியுமா?
உன் விழியில் மலர்ந்த முதல் கவிதை!
கொளத்தூர் தவெக எம்எல்ஏ வி.எஸ்.பாபு காலமானார்: மருத்துவமனை நிர்வாகம் அதிகாரப்பூர்வ அறிவிப்பு
‘GTA 6’ ட்ரெண்டில் இணைந்த பிரதமர் மோடி: சமூக வலைத்தளங்களில் வைரலாகும் பதிவு!
வி.எஸ்.பாபு மறைவு: ஆளுநர்,முதல்வர் விஜய், மு.க.ஸ்டாலின் உள்ளிட்ட தலைவர்கள் இரங்கல்!
கார்த்திகை மாதத்தில் தீபம் ஏற்றி வழிபடுவது ஏன் தெரியுமா?
கண்ணீரை வரவழைக்கும் சின்ன வெங்காய விலை: ஒரு கிலோ ரூ.230-க்கு விற்பனை!
‘ஓம்’ படத்தின் காலை 6 மணி காட்சிக்கு அனுமதி: முதலமைச்சர் விஜய்க்கு தனுஷ் நன்றி
{{comments.comment}}