சென்னை : இந்தியக் கிரிக்கெட் வரலாற்றில் மிக வெற்றிகரமான மற்றும் செல்வாக்குமிக்க கேப்டன்களில் ஒருவரான மகேந்திர சிங் தோனி (MS Dhoni), இன்று தனது பிறந்தநாளைக் கொண்டாடுகிறார். 1981 ஆம் ஆண்டு ஜூலை 7 அன்று ஜார்கண்ட் மாநிலம் ராஞ்சியில் பிறந்த தோனி, இன்று உலகெங்கிலும் உள்ள மில்லியன் கணக்கான கிரிக்கெட் ரசிகர்களின் இதயங்களில் 'தல' மற்றும் 'கேப்டன் கூல்' ஆகக் கொண்டாடப்படுகிறார்.

எளிய தொடக்கமும் அசாத்திய வளர்ச்சியும் :

ஒரு நடுத்தரக் குடும்பத்தில் பிறந்து, ஆரம்பத்தில் ரயில்வேயில் டிக்கெட் பரிசோதகராக (TTE) பணியாற்றிய தோனியின் பயணம், அசாத்திய உழைப்பாலும் விடாமுயற்சியாலும் செதுக்கப்பட்டது. 2004 ஆம் ஆண்டு இந்திய அணியில் விக்கெட் கீப்பராகவும், அதிரடி பேட்ஸ்மேனாகவும் நுழைந்த அவர், மிக விரைவிலேயே தனது தனித்துவமான ஹெலிகாப்டர் ஷாட் மற்றும் மின்னல் வேக ஸ்டம்பிங் மூலம் ரசிகர்களைக் கவர்ந்தார்.

சாதனை நாயகன்: 

2007 ஆம் ஆண்டு இந்திய டி20 அணியின் கேப்டனாகப் பொறுப்பேற்ற தோனி, இளம் வீரர்களைக் கொண்டு முதல் டி20 உலகக்கோப்பையை வென்று வரலாற்றுச் சாதனை படைத்தார். சர்வதேச கிரிக்கெட்டில் இருந்து 2020 ஆம் ஆண்டு ஓய்வு பெற்ற போதிலும், இந்தியன் பிரீமியர் லீக் (IPL) தொடரில் சென்னை சூப்பர் கிங்ஸ் (CSK) அணியின் முகமாகத் திகழ்கிறார். சிஎஸ்கே அணிக்கு 5 முறை சாம்பியன் பட்டத்தைப் பெற்றுத் தந்துள்ள தோனியை, தமிழக ரசிகர்கள் தங்களது சொந்த வீட்டுப் பிள்ளையாகக் கருதி 'தல' என்று அன்போடு அழைக்கிறார்கள்.

இன்று தனது பிறந்தநாளைக் கொண்டாடும் இந்த கிரிக்கெட் ஜாம்பவானுக்கு சமூக வலைத்தளங்களில் ரசிகர்களும், சக வீரர்களும், திரைத்துறையினரும் தங்களது வாழ்த்துகளை தெரிவித்து வருகின்றனர். இந்நிலையில் தோனியின் பிறந்த நாளை முன்னிட்டு தமிழக முதல்வரும், தவெக தலைவருமான விஜய்யும் எக்ஸ்தள பக்கத்தில் பிறந்த நாள் வாழ்த்து பகிர்ந்துள்ளார். அவர் தனது பிறந்த வாழ்த்தில், 

" உங்கள் பெயரை எதிரொலிக்கும் ஒவ்வொரு விசில் சத்தத்திலிருந்தும், நீங்கள் ஊக்கமளித்த எண்ணற்ற இதயங்கள் வரை, உங்கள் பயணம் தமிழ்நாட்டின் விளையாட்டு உணர்வின் ஒரு பொக்கிஷமான பகுதியாக மாறியுள்ளது! எங்கள் 'கேப்டன் கூல்' மகேந்திர சிங் தோனிக்கு இனிய பிறந்தநாள் வாழ்த்துக்கள்! உங்களின் அசாதாரணமான கிரிக்கெட் பாரம்பரியம், அமைதியான தலைமைத்துவம் மற்றும் பணிவான குணம் ஆகியவை இன்றைய தலைமுறைகளைத் தொடர்ந்து ஊக்கப்படுத்துகின்றன. உங்களுக்கு நல்ல ஆரோக்கியம், மகிழ்ச்சி மற்றும் இன்னும் பல ஆண்டுகள் வெற்றி கிடைக்க வாழ்த்துகிறோம். உங்களுக்கான விசில் சத்தங்கள் மேலும் மேலும் ஒலிக்கட்டும்!" என குறிப்பிட்டுள்ளார்.