சென்னை: காமராஜர், இளைய காமராஜர்னு சொல்லாதீங்க. தேர்தல், அரசியல் பற்றியெல்லாம் இந்த மேடையில் பேச வேண்டாம். தங்களின் பள்ளி, ஆசிரியர்கள் பற்றி பேசுங்கள் என்று தவெக தலைவர் விஜய் வேண்டுகோள் விடுத்துள்ளார்.

கடந்த இரண்டு வருடங்களாக 10 மற்றும் 12 ஆம் வகுப்பு பொதுத் தேர்வில் முதல் மூன்று இடத்தை பிடித்த மாணவ மாணவிகளுக்கு பரிசு வழங்கி கௌரவித்து வருகிறார் நடிகர் விஜய். விஜய் கையால் பரிசு பெற வேண்டும் என்ற நோக்கிலும், அவரை நேரில் சந்திக்க வேண்டும் என்ற நோக்கிலும் இந்த நிகழ்ச்சி மாணவர்கள் மத்தியில் நல்ல வரவேற்பு கிடைத்துள்ளது.

அந்த வகையில் மூன்றாவது வருடமாக 2025 ஆம் ஆண்டு கல்வி விருது வழங்கும் விழா மூன்று கட்டங்களாக நடைபெற திட்டமிடப்பட்டுள்ளது. அதன்படி,10 மற்றும் 12ம் வகுப்பு பொதுத் தேர்வில் முதல் 3 இடங்களை பிடித்த மாணவர்களுக்கான கல்வி விருது வழங்கும் விழா இன்று 3வது கட்டமாக நடைபெற்று வருகிறது. சென்னையை அடுத்த மாமல்லபுரத்தில் இன்று விழா நடைபெற்று வருகிறது. இந்த விழாவில் நடிகர் விஜய் பேசுகையில்,

எல்லாருக்கும் வணக்கம். நேற்று குஜராத்தில் மிகப்பெரிய சோகமான விமான விபத்து நடந்துள்ளது. விபத்து நடந்த இடத்தில் எடுக்கப்பட்ட சில வீடியோக்கள் புகைப்படங்களை பார்க்கும் போது மனம் பதறுகிறது. அடுத்த நொடி நிச்சயம் இல்லாத வாழ்க்கை இது. இருந்தவர்கள் எல்லாருக்காகவும் இரண்டு நிமிடம்  மவுனஅஞ்சலி செலுத்துவோம்.

இங்கு வந்திருப்போருக்கு ஒரு சின்ன வேண்டுகோள், இன்றைய நிகழ்ச்சியில் பேச்சை மட்டும் கொஞ்சம் குறைத்துக் கொள்ளலாம். யாரும் இதை தவறாக எடுத்துக் கொள்ள வேண்டாம். 2026 ஆம் ஆண்டு தேர்தல் பற்றியோ, என்னை காமராஜர், இளைய காமராஜர் அப்படி எல்லாம் ஏதும் சொல்லாதீர்கள். நீங்கள் உங்களுடைய ஆசிரியர்கள், உங்கள் பள்ளி பற்றி பேசுங்கள். மற்ற விஷயங்கள் பற்றி பேசுங்கள். தயவு செய்து இது மாதிரியெல்லாம் பேசாதீர்கள். நன்றி என்று தெரிவித்துள்ளார்.