சென்னை: நடிகர் விஜய் நடிப்பில் பெரும் எதிர்பார்ப்புகளுக்கு மத்தியில் உருவாகியுள்ள ‘ஜனநாயகன்’ திரைப்படத்தின் தணிக்கை தொடர்பான பணிகளில் புதிய சிக்கல் ஏற்பட்டுள்ளது. இன்று நடைபெறவிருந்த படத்தின் முக்கியமான மறுஆய்வு திடீரென ஒத்திவைக்கப்பட்டுள்ளதாகத் தகவல்கள் வெளியாகியுள்ளன.

விஜய் நடிப்பில் உருவான ‘ஜனநாயகன்’ திரைப்படம், அதன் அரசியல் கதையம்சம் மற்றும் வசனங்களுக்காகத் தொடக்கம் முதலே பேசுபொருளாக இருந்து வருகிறது. படத்தின் சில காட்சிகள் மற்றும் வசனங்கள் குறித்துத் தணிக்கைக் குழு (Censor Board) சில ஆட்சேபனைகளைத் தெரிவித்திருந்ததாகக் கூறப்படுகிறது. இதனால் இதனை எதிர்த்து படக்குழு சார்பில் கோர்ட்டில் வழக்கு தொடரப்பட்டது. பல கட்ட விசாரணைக்கு பிறகு படக்குழுவினர் மறுஆய்வுக்காக விண்ணப்பித்திருந்தனர்.

மறுஆய்வுக் குழுவின் கூட்டம் இன்று நடைபெறவிருந்தது. இதில் படத்தின் இறுதி வடிவம் மற்றும் தணிக்கைச் சான்றிதழ் (Censor Certificate) குறித்த முக்கிய முடிவுகள் எடுக்கப்பட இருந்தன. இருப்பினும், கடைசி நேரத்தில் இந்தக் கூட்டம் ரத்து செய்யப்பட்டுள்ளது. தணிக்கைக் குழுவில் உள்ள உறுப்பினர் ஒருவருக்குத் திடீரென உடல்நலக் குறைவு ஏற்பட்டதன் காரணமாகவே, இன்றைய மறுஆய்வு தள்ளிவைக்கப்பட்டுள்ளதாக அதிகாரப்பூர்வமற்ற செய்திகள் தெரிவிக்கின்றன.

மறுஆய்வுக்கு விண்ணப்பித்துள்ளதால், அது தொடர்பான பணிகள் 15 நாட்களுக்குள் நிறைவடைந்து மார்ச் இறுதிக்குள் ஜனநாயகன் படம் ரிலீசாகி விடும் என ரசிகர்கள் நம்பிக்கையுடன் காத்திருந்தனர். படத்தின் ரிலீஸ் தேதியை எதிர்பார்த்து ஆவலுடன் காத்திருந்த விஜய் ரசிகர்கள், இந்தத் திடீர் ஒத்திவைப்பால் சற்று ஏமாற்றம் அடைந்துள்ளனர். தணிக்கைச் சான்றிதழ் கிடைப்பதில் தாமதம் ஏற்பட்டால், அது படத்தின் வெளியீட்டுத் தேதியையும் பாதிக்கக்கூடும் என்ற அச்சம் நிலவுகிறது. எனினும், படக்குழு தரப்பிலிருந்து இது தற்காலிகமான தாமதம் தான் என்றும், அடுத்த சில நாட்களில் மறுஆய்வு நடைபெறும் என்றும் நம்பிக்கை தெரிவிக்கப்பட்டுள்ளது.

விஜய் முழுநேர அரசியலில் களமிறங்கியுள்ள சூழலில், இந்தப் படத்தின் தலைப்பான ‘ஜனநாயகன்’ என்பது மிகுந்த முக்கியத்துவம் பெறுகிறது. படத்தில் இடம்பெற்றுள்ள காட்சிகள் தற்போதைய அரசியல் சூழலை பிரதிபலிக்கும் வகையில் இருப்பதால், தணிக்கைக் குழுவின் ஒவ்வொரு நகர்வும் உன்னிப்பாகக் கவனிக்கப்பட்டு வருகிறது. உடல்நலம் பாதிக்கப்பட்ட உறுப்பினர் குணமடைந்தவுடன் அல்லது மாற்று ஏற்பாடுகள் செய்யப்பட்டவுடன் மறுஆய்வுக்கான அடுத்த தேதி அறிவிக்கப்படும். பெரும்பாலும் இந்த வார இறுதிக்குள் ‘ஜனநாயகன்’ படத்தின் தணிக்கை முடிவுகள் வெளியாகும் என எதிர்பார்க்கப்படுகிறது.