சென்னை: தமிழ்நாட்டில் ஜனவரி 18 மற்றும் 19 ஆகிய தேதிகளில் 9 மாவட்டங்களில் பரவலாக கன மழை பெய்ய வாய்ப்புள்ளதாக வானிலை ஆய்வு மையம் தெரிவித்துள்ளது.

தமிழ்நாட்டில் வட கிழக்குப் பருவ மழை முடிந்து விட்டது. போதும் போதும் என்று சொல்லும் அளவுக்கு நல்ல மழைப் பொழிவை இந்தக் காலகட்டத்தில் கிட்டத்தட்ட அனைத்து மாவட்டங்களுமே சந்தித்தன. சில மாவட்டங்களில் மட்டுமே பற்றாக்குறை மழை இருந்தது.

இந்த நிலையில் ஜனவரியிலும் கூட மேலடுக்கு சுழற்சி காரணமாக ஆங்காங்கு லேசான மழை பெய்து வருகிறது. இந்தப் பின்னணியில் ஜனவரி 18 மற்றும் 19 ஆகிய தேதிகளில் தமிழ்நாட்டில் 9 மாவட்டங்களில் பரவலாக கன மழை பெய்ய வாய்ப்புள்ளதாக வானிலை மையம் தெரிவித்துள்ளது.

இதுதொடர்பாக வானிலை மையம் வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:

18ம் தேதி - கடலோர தமிழகத்தில் ஒரு சில இடங்களிலும் உள் தமிழகத்தில் ஓரிரு இடங்களிலும் புதுச்சேரி மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும்.

தஞ்சாவூர், திருவாரூர், நாகப்பட்டினம், மயிலாடுதுறை, புதுக்கோட்டை மற்றும் ராமநாதபுரம் மாவட்டங்களில் ஓரிரு இடங்களிலும் காரைக்கால் பகுதிகளிலும் கனமழை பெய்ய வாய்ப்புள்ளது.

19ம்  தேதி -  கடலோர தமிழகத்தில் அனேக இடங்களிலும் உள் தமிழகத்தில் ஒரு சில இடங்களிலும் புதுச்சேரி மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும்.

தஞ்சாவூர், திருவாரூர், நாகப்பட்டினம், மயிலாடுதுறை, புதுக்கோட்டை, ராமநாதபுரம், தூத்துக்குடி, திருநெல்வேலி மற்றும் கன்னியாகுமரி மாவட்டங்களில் ஓரிரு இடங்களிலும் காரைக்கால் பகுதிகளிலும் கனமழை பெய்ய வாய்ப்புள்ளது என்று வானிலை மையம் தெரிவித்துள்ளது.

செய்திகளை உடனுக்குடன் அறிய தென்தமிழ் வாட்ஸ் ஆப் சானலில் இணையவும்