டெஹ்ரான்: மத்திய கிழக்கு பிராந்தியத்தில் அமெரிக்கா மற்றும் ஈரான் படைகளுக்கு இடையே போர் தீவிரமடைந்து வரும் நிலையில், ஜோர்டானில் நிலைநிறுத்தப்பட்டிருந்த அமெரிக்காவின் பல போர் விமானங்கள் மற்றும் எரிபொருள் நிரப்பும் விமானங்களை ஏவுகணை மற்றும் ட்ரோன் தாக்குதல்கள் மூலம் அழித்துள்ளதாக ஈரான் நாட்டின் இஸ்லாமிய புரட்சிகர காவல்படை (IRGC) தெரிவித்துள்ளது.

ஈரானிய அரசு ஊடகங்கள் வெளியிட்டுள்ள தகவலின்படி, ஜோர்டானில் உள்ள அல்-அஸ்ராக் என்ற அமெரிக்க வான்படை தளத்தை குறிவைத்து இந்த தாக்குதல் நடத்தப்பட்டுள்ளது. இதில் அமெரிக்காவின் பல போர் விமானங்கள் முற்றிலும் அழிக்கப்பட்டதாகவும், மேலும் பல விமானங்களுக்கு கடுமையான சேதம் விளைவிக்கப்பட்டதாகவும் ஈரான் கூறியுள்ளது. 

அமெரிக்காவின் அதிநவீன MQ-9 ரீப்பர் (Reaper) ரக ஆளில்லா ட்ரோன் விமானங்களையும் வீழ்த்தியுள்ளதாக ஈரான் ராணுவம் கூறியுள்ளது. ஈரானுக்கு எதிராகச் செய்யப்படும் எந்தவொரு அச்சுறுத்தலும் பதிலடி கொடுக்கப்படாமல் போகாது என்றும் அவர்கள் எச்சரித்துள்ளனர்.

மறுக்கும் ஜோர்டான் மற்றும் அமெரிக்கா:

ஈரானின் இந்த அதிரடித் தகவலை ஜோர்டான் ராணுவம் மறுத்துள்ளது. ஈரான் தரப்பிலிருந்து ஜோர்டான் எல்லையை நோக்கி ஏவப்பட்ட 8 ஏவுகணைகளை தங்களின் வான் பாதுகாப்பு அமைப்புகள் நடுவானிலேயே சுட்டு வீழ்த்தியதாக ஜோர்டான் பாதுகாப்புப் படை தெரிவித்துள்ளது. இந்தத் தாக்குதல்களால் தங்களுக்கு எந்தவித உயிர்ச்சேதமோ அல்லது பொருள் சேதமோ ஏற்படவில்லை என்றும் அவர்கள் குறிப்பிட்டுள்ளனர்.

மறுபுறம், ஏகாதிபத்திய அச்சுறுத்தல்களுக்கு எதிராக ஹார்முஸ் ஜலசந்திப் பகுதியில் அமெரிக்கா தங்களின் கடற்படை முற்றுகையை பலப்படுத்தியுள்ளதுடன், ஈரானின் ராணுவ நிலைகளைக் குறிவைத்து தொடர் வான்வழித் தாக்குதல்களை நடத்தி வருகிறது. இரு நாடுகளுக்கும் இடையே போர் பதற்றம் நாளுக்கு நாள் உச்சக்கட்டத்தை எட்டி வருகிறது.