அவளின் நேசம்!

Nov 20, 2026,11:19 AM IST

- "சொல்லருவி" ரஞ்சிதா மணியரசன்


மண்பூசப்பட்ட 

கூரைவேய்ந்த வீடு,

தரையெல்லாம்

சாணம் மொழுகி,

விறகு அடுப்பினையும்

வழித்து விட்டிருக்கிறாள் நல்லி....


நல்ல மாநிறமான 

மேனியாம்...

அமாவாசை இருட்டென,

கூந்தலும் உலாவி

கிடக்கும் கணுக்கால்வரை,

இரண்டு பானை

உயரம் தான்...


நல்லகுணக்காரி

நாவினிக்கும்

பேச்சுக்காரி...





கண்டாங்கி சேலையில

அம்மன் செலையாட்டம்

இருப்பா....


நெத்தியில 

குங்குமத்த

அடர்த்தியா வச்சிருப்பா...


குடிசையானாலும்

கோயிலப்போல

பராமரிப்பா...

மரிக்கொழுந்தும்,

மல்லிகைப்பூவும்

அலாதியாய்

விரும்பும்...

நேசக்காரி...


அதிகாலை முதல்

அந்திமாலை வரை

அவ மாமனுக்கு 

சரியா.. வயல்காட்டுல

வலைய வருவா....


கட்டின புருசன்

பனைமர ஒசரமா...

கருப்பசாமி கணக்கா...


அடைகாக்கும்

கோழிபோல அத்தனை பாசம் அவுகமேல...


வெள்ளென வீடு சேர்ந்ததும்..

அலுப்பே இல்லாம

சேலைய தூக்கி சொருகிக்கிட்டு...

சக்கரமாய் வேலைய

துரிதமா முடிப்பா....


அத்தனை வலியும்

மயிலிறகு போல

காத்துல பறக்கும்...

அவ கையால சோறு

திண்ணா....

அவதான் என் மகராசி..


என்னாச்சுனு விளங்கல...

எனக்கு முன்ன போய் சேர்ந்துட்டா...

பூவும் பொட்டுமா

மங்கலமா...

என் உசுரான நல்லி...


இப்பவும்

வீடு வழிக்கிறா...


அவ போயி

பதினாறுவருசமாச்சி....


(ரஞ்சிதா மணியரசன், M.A.,B.Ed..,Eng, கவிஞர், ஆசிரியர் என பன்முகம் கொண்ட படைப்பாளி, நாமக்கல்லைச் சேர்ந்தவர்)

செய்திகளை உடனுக்குடன் அறிய தென்தமிழ் வாட்ஸ் ஆப் சானலில் இணையவும்

அதிகம் பார்க்கும் செய்திகள்