சென்னை:பெருநகர சென்னை மாநகராட்சிப் பகுதிகளில் விதிகளை மீறி கட்டப்படும் கட்டடங்கள் மற்றும் குடியிருப்புப் பகுதிகளை வணிகப் பயன்பாட்டிற்கு மாற்றுபவர்கள் மீது கடும் நடவடிக்கை எடுக்க சென்னை மாநகராட்சி அதிரடி உத்தரவைப் பிறப்பித்துள்ளது. இதற்காக பிரத்யேக வட்டார மற்றும் மண்டல அளவிலான குழுக்கள் அமைக்கப்பட்டுள்ளன.

தீவிர கண்காணிப்பில் சென்னை மாநகராட்சி : 

சென்னையின் பல்வேறு பகுதிகளில் சமீப காலமாக திட்ட அனுமதிக்கு (Planning Permission) மாறாகவும், உரிய அனுமதியின்றியும் பல அடுக்குமாடிக் கட்டடங்கள் மற்றும் வணிக வளாகங்கள் கட்டப்பட்டு வருவதாகப் புகார்கள் எழுந்த வண்ணம் உள்ளன. அதே போல், குடியிருப்புப் பயன்பாட்டிற்காக அனுமதி பெற்றுவிட்டு, விதிகளை மீறி அவற்றை வணிக ரீதியான தேவைகளுக்கு உபயோகிக்கும் போக்கு அதிகரித்துள்ளது. இதனால் போக்குவரத்து நெரிசல், பொது மக்களுக்கான இடர்பாடுகள் மற்றும் உள்ளூர் உள்கட்டமைப்பில் பெரும் பாதிப்புகள் ஏற்படுகின்றன. இதனைக் கட்டுப்படுத்தும் நோக்கில், சென்னை மாநகராட்சி தற்போது களத்தில் இறங்கியுள்ளது. விதிமீறல்களைக் கண்டறிந்து உடனடியாக நடவடிக்கை எடுப்பதற்காக பிரத்யேகமாக வட்டார மற்றும் மண்டல அளவிலான குழுக்கள் (Regional and Zonal Committees) அமைக்கப்பட்டுள்ளன.

குழுக்களின் முக்கியப் பணிகள் மற்றும் நடவடிக்கைகள்:

இந்தக் குழுக்கள் சென்னை மாநகராட்சிக்கு உட்பட்ட அனைத்து வார்டுகளிலும் தீவிரக் கண்காணிப்புப் பணிகளை மேற்கொள்ளவுள்ளன. குறிப்பாக, அனுமதிக்கப்பட்ட வரைபடத்தை விடக் கூடுதலாகக் கட்டப்படும் தளங்கள், பக்கவாட்டு இடைவெளிகளை (Setback area) முறையாக விடாமல் கட்டப்படும் கட்டடங்கள் ஆகியவை கண்டறியப்பட்டு சீல் வைக்கப்படும்.

குடியிருப்புப் பகுதிகளாக (Residential Area) வகைப்படுத்தப்பட்ட இடங்களில், எவ்வித அனுமதியும் இன்றி வணிக நிறுவனங்கள், கடைகள் அல்லது அலுவலகங்கள் செயல்படுவது கண்டறியப்பட்டால் சட்டப்பூர்வ நடவடிக்கை பாயும். இந்தக் குழுக்கள் மாநகராட்சியின் பல்வேறு பகுதிகளுக்குச் சென்று திடீர் ஆய்வுகளை மேற்கொள்ளும். விதிகளுக்குப் புறம்பாகச் செயல்படும் கட்டடங்களின் உரிமையாளர்களுக்கு முதலில் நோட்டீஸ் அனுப்பப்படும். காலக்கெடுவிற்குள் உரிய விளக்கம் அளிக்காத பட்சத்தில், கட்டடங்களுக்குப் பூட்டுப் போட்டு சீல் வைக்கப்படும் என எச்சரிக்கப்பட்டுள்ளது.

பொதுமக்களுக்கு விடுக்கப்பட்டுள்ள வேண்டுகோள்: 

பொதுமக்கள் புதிய வீடுகள் அல்லது வணிக இடங்களை வாங்கும் போதோ அல்லது வாடகைக்கு எடுக்கும் போதோ, அக்கட்டடம் உரிய திட்ட அனுமதியுடன் தான் கட்டப்பட்டுள்ளதா என்பதை உறுதி செய்ய வேண்டும் என மாநகராட்சி அறிவுறுத்தியுள்ளது. இந்த அதிரடி நடவடிக்கையின் மூலம் சென்னையில் விதிமீறல் கட்டடங்களின் எண்ணிக்கை பெருமளவில் குறையும் என்று எதிர்பார்க்கப்படுகிறது.