சென்னை:   ஒரே நாடு ஒரே தேர்தல் என்பது இந்தியாவின் பல்வேறுபட்ட தேர்தல் முறையின் சிக்கல்களைப் புறக்கணித்து, கூட்டாட்சித் தன்மையைக் குறைத்து மதிப்பிடுவதற்கு உட்படுத்தும் ஒரு நடைமுறைச் சாத்தியமற்ற கருத்தாகும் என முதல்வர் மு.க.ஸ்டாலின் தெரிவித்துள்ளார்.

கடந்த ஆண்டு செப்டம்பர் மாதம் ஒரே நாடு ஒரே தேர்தல் தொடர்பாக ஆய்வு செய்து அறிக்கை தர முன்னாள் குடியரசுத் தலைவர் ராம்நாத் கோவிந்த் தலைமையில் சிறப்பு குழு ஒன்றை மத்திய அரசு அமைத்தது. இந்த திட்டத்திற்கான கருத்து கேட்பு கூட்டங்கள் நடைபெற்றது. அதனைத் தொடர்ந்து 18 ஆயிரத்து 626 பக்கங்கள் கொண்ட அறிக்கையை குடியரசுத் தலைவர் திரெளபதி முர்முவிடம் அந்த குழு சமர்ப்பித்தது. 

இதனையடுத்து, ஒரே நாடு ஒரே தேர்தல் திட்டத்திற்கு நேற்று மத்திய அமைச்சரவை ஒப்புதல் அளித்திருந்தது. இதற்கு காங்கிரஸ் உள்ளிட்ட கட்சிகள் கண்டனம் எதிர்ப்பு தெரிவித்துள்ளன. முதல்வர் மு.க.ஸ்டாலினும் தற்போது இந்தத் திட்டத்தை எதிர்த்து அறிக்கை வெளியிட்டுள்ளார். அதில் அவர் கூறியிருப்பதாவது: 

ஒரே நாடு ஒரே தேர்தல் முறை என்பது இந்தியாவின் பல்வேறுபட்ட தேர்தல் முறையின் சிக்கல்களை புறக்கணித்து கூட்டாட்சித் தன்மையைக் குறைத்து மதிப்பிடுவதற்கு உட்படுத்தும் ஒரு நடைமுறை சாத்தியமற்ற கருத்தாகும். சுழற்சி முறையிலான தேர்தல்கள், பிராந்திய பிரச்சனைகள் மற்றும் நிர்வாக முன்னுரிமைகள் ஆகியவற்றில் உள்ள மிகப்பெரிய வேறுபாடுகளை கருத்தில் கொண்டு இது நடைமுறை ரீதியாக சாத்தியமற்றது.

இந்தத் திட்டம் ஆட்சியின் இயல்பான போக்கைச் சீர்குலைத்து, அனைத்து அலுவலக விதிமுறைகளில் உண்மையற்ற சீரமைப்புக்கு வழிவகுக்கும். இந்த முழு திட்டமும் பாஜகவை திருப்திப்படுத்தும் நடவடிக்கைதான். ஆனால், அவர்களால் அதை ஒருபோதும் செயல்படுத்த முடியாது. இந்தியாவின் ஜனநாயகத்தை ஒரு கட்சியின் பேராசைக்கு ஏற்ப வளைக்க முடியாது. இந்த திசை திருப்பல் தந்திரங்களில் சக்தியை வீணாக்காமல், வேலை இல்லா திண்டாட்டம், விலைவாசி உயர்வு மற்றும் மாநிலங்களுக்கு வளங்களை சமமாக விநியோகித்தல் போன்ற அழுத்தமான பிரச்சனைகளை மத்திய அரசு தீர்க்க வேண்டும் என தெரிவித்துள்ளார்.

செய்திகளை உடனுக்குடன் அறிய தென்தமிழ் வாட்ஸ் ஆப் சானலில் இணையவும்