ஜெட்டா: சவூதி அரேபியாவின் ஜெட்டா நகரில் இன்று நடைபெறும் ஐபிஎல் 2025 வீரர்கள் மெகா ஏலத்தில் 577 வீரர்கள் ஏலம் விடப்படவுள்ளனர். இதில் யார் அதிக விலைக்கு ஏலம் போகப் போகிறார் என்ற பெரும் எதிர்பார்ப்பில் ரசிகர்கள் காத்துள்ளனர்.

ஐபிஎல் 2025 தொடருக்கான ஏற்பாடுகளை முடுக்கி விட்டுள்ளது பிசிசிஐ. முதலில் வீரர்கள் தக்கவைப்பு நடைபெற்றது. இதைத் தொடர்ந்து தற்போது வீரர்கள் ஏலம் நடைபெறவுள்ளது. சவூதி அரேபியாவின் ஜெட்டா நகரில் இதற்கான ஏலம் இன்றும் நாளையும் நடைபெறவுள்ளது.

முதலில் 574 வீரர்கள் ஏலம் விடப்படுவதாக இருந்தது. பின்னர் இங்கிலாந்து பந்து வீச்சாளர் ஜோப்ரா ஆர்ச்சர், அமெரிக்க வீரர் செளரப் நேத்ராவல்கர், மும்பை விக்கெட் கீப்பர் ஹர்டிக் தாமூர் ஆகியோரும் சேர்க்கப்பட்டு தற்போது 577 பேர் ஏலம் விடப்படவுள்ளனர்.

அணி வாரியாக வீரர்கள் காலியிடங்கள்

சென்னை சூப்பர் கிங்ஸ் அணியைப் பொறுத்தவரை 7 வெளிநாட்டு வீரர்கள் உள்பட 21 பேரை லத்தில் எடுக்க முடியும். அவர்கள் வசம் ரூ. 55 கோடி நிதி கையிருப்பில் உள்ளது. மற்ற அணிகளில் உள்ள காலியிடங்கள் வருமாறு

1. பஞ்சாப் கிங்ஸ் (ரூ. 110.5 கோடி, 8 வெளிநாட்டினர் உள்பட 23 வீரர்கள்)
2. ராயல் சேலஞ்சர்ஸ் பெங்களூரு (ரூ. 83 கோடி, 8 வெளிநாட்டினர் உள்பட 22 வீரர்கள்)
3. டெல்லி கேபிடல்ஸ் (ரூ. 73 கோடி, 7 வெளிநாட்டு வீரர்கள் உள்பட 21 பேர்)
4. லக்னோ சூப்பர் ஜெயன்ட்ஸ் (ரூ. 69 கோடி, 7 வெளிநாட்டினர் உள்பட 20 வீரர்கள்)
5. குஜராத் டைட்டன்ஸ் (ரூ. 69 கோடி, 7 வெளிநாட்டினர் உள்பட 20 வீரர்கள்)
6. கொல்கத்தா நைட் ரைடர்ஸ் (ரூ. 51 கோடி, 6 வெளிநாட்டினர் உள்பட 19 வீரர்கள்)
7. மும்பை இந்தியன்ஸ் (ரூ. 45 கோடி, 7 வெளிநாட்டினர் உள்பட 20 வீரர்கள்)
8. சன்ரைசர்ஸ் ஹைதராபாத் (ரூ. 45 கோடி, 5 வெளிநாட்டினர் உள்பட 20 வீரர்கள்)
9. ராஜஸ்தான் ராயல்ஸ் (ரூ. 41 கோடி, 7 வெளிநாட்டினர் உள்பட 19 வீரர்கள்)

அதிக வயதான வீரர்.. குறைந்த வயது வீரர்

ஏலப் பட்டியலில் மிக அதிக வயதான வீரராக இங்கிலாந்து வீரர் ஜேம்ஸ் ஆண்டர்சன் இடம் பெற்றுள்ளார். இவருக்கு 42 வயதாகிறது. இங்கிலாந்து அணியில் முக்கிய வீரராக வலம் வந்தவர் ஜேம்ஸ் ஆண்டர்சன். 704 டெஸ்ட் விக்கெட்கள், 1126 முதல் வகுப்பு விக்கெட்களை வைத்துள்ளார். டி20 போட்டிகளில் 41 விக்கெட் சாய்த்துள்ளார். கடைசியாக 2014ம் ஆண்டு டி20 போட்டியில் ஆடியுள்ளார். இவரை சென்னை சூப்பர் கிங்ஸ் அணி ஏலத்தில் எடுக்கலாம் என்ற எதிர்பார்ப்பு உள்ளது.

மிகவும் இளம் வயது வீரர் என்ற பெருமை 13 வயதேயான வைபவ் சூர்யவன்ஷிக்குக் கிடைத்துள்ளது. பீகாரைச் சேர்ந்த இந்த வீரர், ரஞ்சி டிராபி போட்டியில் 12 வயதிலேயே அறிமுகமாகி அனைவரையும் ஆச்சரியப்படுத்தியவர். 5 முதல் தர போட்டிகளில் 10 இன்னிங்ஸ்களில் ஆடி 100 ரன்களை மட்டுமே இவர் எடுத்துள்ளார். ஆனால் 19 வயதுக்குட்பட்ட இந்திய அணியில் இடம் பிடித்து ஆஸ்திரேலியா அணிக்கு எதிரான நான்கு நாள் போட்டிகளில் விளையாடி கவனம் ஈர்த்தவர். சென்னையில் நடந்த போட்டியில் 58 பந்துகளில் சதம் அடித்து அசத்தியுள்ளார். அதேபோல பீகாரில் நடந்த யு 19 ஒரு நாள் போட்டித் தொடரில் முச்சதம் போட்டு அசத்தியவர். அதிரடி வீரராக வலம் வரும் இவர் பெரும் எதிர்பார்ப்புகளை ஏற்படுத்தியுள்ளார்.

யாருக்கு செம கிராக்கி?

இந்திய வீரர் ரிஷாப் பந்த் மீதுதான் அதிக அளவிலான எதிர்பார்ப்பு உள்ளது. இவர்தான் அதிக விலைக்கு ஏலம் போவார் என்ற எதிர்பார்ப்பும் உள்ளது. அதேபோல ஜோஸ் பட்லர், ஷ்ரேயாஸ் ஐயர், காகிசோ ரபடா, மிட்சல் ஸ்டார்க், முகம்மது சமி ஆகியோர் மீதும் பெரும் எதிர்பார்ப்பு காணப்படுகிறது.

டி. நடராஜனை சென்னை சூப்பர் கிங்ஸ் ஏலத்தில் எடுக்க வாய்ப்புள்ளதாக சொல்லப்படுகிறது. அஸ்வின் எந்த அணிக்குப் போகப் போகிறார் என்று தெரியவில்லை.

தக்க வைக்கப்பட்ட வீரர்கள் பட்டியல்

அணி வாரியாக தக்க வைக்கப்பட்ட வீரர்கள் பட்டியல் பார்ப்போம்.

1. சென்னை சூப்பர் கிங்ஸ் (தோனி, ருத்துராஜ் கெய்க்வாட், ரவீந்திர ஜடேஜா, சிவம் துபே, மதீஷா பதிரனா)
2. மும்பை இந்தியன்ஸ் (ஜஸ்ப்ரீத் பும்ரா, சூர்ய குமார் யாதவு், ஹர்டிக் பான்ட்யா, ரோஹித் சர்மா, திலக் வர்மா)
3. ராயல் சேலஞ்சர்ஸ் பெங்களூரு (விராட் கோலி, ரஜத் படிதர், யாஷ் தயாள்)
4. சன்ரைசர்ஸ் ஹைதராபாத் (பாட் கமின்ஸ், அபிஷேக் சர்மா, நிதிஷ் குமார் ரெட்டி, ஹென்ரிச் கிளாசன், டிரவிஸ் ஹெட்)
5. கொல்கத்தா நைட் ரைடர்ஸ் (ரிங்கு சிங், வருண் சக்ரவர்த்தி, சுனில் நரீன், ஆண்ட்ரே ரஸ்ஸல், ஹர்ஷித் ராணா, ரமந்தீப் சிங்)
6. பஞ்சாப் கிங்ஸ் (சஷாங்க் சிங், பிரப்சிம்ரன்சிங்)
7. டெல்லி கேபிடல்ஸ் (அக்ஷார் படேல், குல்தீப் யாதவ், டிரிஸ்டான் ஸ்டப்ஸ், அபிஷேக் போரல்)
8. ராஜஸ்தான் ராயல்ஸ் (சஞ்சு சாம்சன், யஷஸ்வி ஜெய்ஸ்வால், ரியான் பராக், துருவ் ஜூரல், சிம்ரன் ஹெட்மயர், சந்தீப் சர்மா)
9. குஜராத் டைட்டன்ஸ் (ரஷீத் கான், சுப்மன் கில், சாய் சுதர்ஷன், ராகுல் தேவசியா, ஷாருக் கான்)
10. லக்னோ சூப்பர் ஜெயன்ட்ஸ் (நிக்கோலஸ் பூரன், ரவி பிஷ்னோய், மயங்க் யாதவ், மோஷின் கான், ஆயுஷ் படோனி)

செய்திகளை உடனுக்குடன் அறிய தென்தமிழ் வாட்ஸ் ஆப் சானலில் இணையவும்