- மஞ்சுளா தேவி

சென்னை: முன்னணி கதாபாத்திரங்களில் விதார்த் மற்றும் யோகி பாபு நடித்த குய்கோ திரைப்படம் வருகின்ற நவம்பர் 24ஆம் தேதி வெளிவர உள்ளது. இப்படத்திற்கு யு சான்றிதழ் தரப்பட்டுள்ளதாக அறிவித்துள்ளனர்.

கதாசிரியராக வலம் வரும் அருள் செழியன் முதல் முதலாக குய்கோ படத்தின் மூலம் இயக்குனராக அறிமுகமாகிறார். இவர் ஏற்கனவே விஜய் சேதுபதி நடித்த ஆண்டவன் கட்டளை படத்திற்கு கதை ஆசிரியராக பணியாற்றியவர். இப்படத்தை ஏ எஸ் டி பிலிம்ஸ் எல் எல் பி தயாரித்துள்ளது. ராஜேஷ் யாதவ் ஒளிப்பதிவு செய்ய, அந்தோணி தாசன் இசையமைத்து உள்ளார்.

சிறந்த காமெடி நடிகராக வலம் வரும் யோகி பாபு மற்றும் நடிகர் விதார்த் முன்னணி கதாபாத்திரத்திலும், ஸ்ரீ பிரியங்கா, துர்கா, இளவரசு, முத்துக்குமார் ஆகியோர் பலர் நடித்துள்ளனர்.

இப்படத்தின் கதையைப் பற்றி இயக்குனர் கூறுகையில், யோகி பாபு வளைகுடா நாட்டில் ஒட்டகம் மேய்ப்பவர். எதார்த்தமாக இவருடைய தாய் தவறி விடுகிறார். தன் தாயைக் காண வருவதற்கு சில நாட்கள் ஆகும் என்ற நிலையில் நடிகர் விதார்த் ஃப்ரீசர் பாக்ஸை அந்த கிராமத்திற்கு கொண்டு வருகிறார். அப்போது ஊர் மக்களுக்கும், விதார்த்துக்கும் இடையே சில பிரச்சனைகள் ஏற்படுகிறது. 

அந்தப் பிரச்சினையை எப்படி தீர்க்கிறார்கள் என்பதுதான் இப்படத்தின் கதையாக உள்ளது. முதலில் இப்படத்திற்கு குடியிருந்த கோவில் என்ற பெயர் பொருத்தமாக இருந்தது. பின்னர் இதனை சுருக்கி குய்கோ என்று பெயர் மாற்றம் செய்தோம் என்று கூறினார்.

இந்நிலையில் இப்படத்தில் ஏ சிவப்பழகி என்ற பாடல் இரண்டு நாட்களுக்கு முன்புதான்  வெளிவந்தது. இப்பாடல்  ரசிகர்களிடையே நல்ல வரவேற்பை பெற்றது. குடும்பத்துடன் அனைவரும் கண்டு களிக்கும் விதமாக  இப்படத்திற்கு யு சான்றிதழ் வழங்கப்பட்டுள்ளது. 

குய்கோ படம் நவம்பர் 24ஆம் தேதி வெளிவரும் நிலையில், விக்ரம் நடித்த துருவ நட்சத்திரம் மற்றும் சந்தானம் நடித்த 80ஸ் பில்டப் படமும் அந்த நாளில் தான் வெளிவர இருக்கிறது என்பது நினைவிருக்கலாம். மக்கள் மற்றும் ரசிகர்கள் சார்பாக அனைத்து படங்களும் வெற்றி பெற வாழ்த்துக்கள்..!!

இதற்கிடையே, இப்படத்தின் டிரைலரை நடிகர் விஜய் சேதுபதி தனது சமூக வலைத்தள பக்கத்தில் இன்று வெளியிட்டார்.