சென்னை: "தமிழக மண் மீதும், மக்கள் மீதும் மாறாத பெருமதிப்பும் அன்பும் கொண்டவர் முதலமைச்சர் விஜய். அவரது தலைமையில் தமிழகத்தில் தற்போது நடைபெற்று வருவது ஒரு 'அன்பு சாம்ராஜ்யம்'; இதனை யாராலும் அசைக்கவோ, வீழ்த்தவோ முடியாது" என்று தமிழக மருத்துவ மற்றும் மக்கள் நல்வாழ்வுத் துறை அமைச்சர் அருண்ராஜ் நெகிழ்ச்சியுடன் தெரிவித்துள்ளார்.

தமிழக அரசின் மருத்துவத் துறை சார்பில் உதவி மருத்துவ அலுவலர்கள் மற்றும் சுகாதார ஆய்வாளர்களுக்குப் பணி நியமன ஆணைகள் வழங்கும் விழா இன்று நடைபெற்றது. முதல்வர் விஜய் தலைமையில் நடைபெற்ற இவ்விழாவில் பணி நியமன ஆணைகளை முதல்வர் வழங்கினார்.

இந்த விழாவில் கலந்து கொண்டு, புதிய பணியாளர்களுக்கு ஆணைகளை வழங்கிப் பேசிய மருத்துவத் துறை அமைச்சர் அருண்ராஜ், முதலமைச்சர் விஜய்யின் மக்கள் நலன் சார்ந்த தொலைநோக்குப் பார்வையையும், அவரது நிர்வாகத் திறனையும் வெகுவாகப் பாராட்டிப் பேசினார். இந்த விழாவில் நலன் TN என்ற சேவை துவங்கி வைக்கப்பட்டுள்ளது.

விழா மேடையில் அமைச்சர் அருண்ராஜ் பேசியதாவது: "தமிழக மக்கள் கடந்த சட்டமன்றத் தேர்தலில் தவெக (தமிழக வெற்றிக் கழகம்) தலைமைக்கு மிகப்பெரிய வெற்றியைத் தேடித்தந்து, தலைவர் விஜய்யை முதலமைச்சராக அரியணையில் அமர்த்தியுள்ளனர். ஆட்சிப் பொறுப்பேற்றது முதல் ஒட்டுமொத்த அரசு இயந்திரமும் மக்கள் நலனை மட்டுமே முன்னிறுத்திச் செயல்பட்டு வருகிறது. குறிப்பாக, மருத்துவத் துறையில் உள்ள காலிப் பணியிடங்கள் அதிவேகமாக நிரப்பப்பட்டு வருகின்றன.

எங்களது முதலமைச்சர் விஜய், இந்த மண் மீதும், இங்குள்ள கோடிக்கணக்கான மக்கள் மீதும் அளவுகடந்த மாறாத அன்பைக் கொண்டவர். அதனால் தான், ஏழை எளிய மக்களுக்கான மருத்துவக் கட்டமைப்பு வசதிகளை மேம்படுத்துவதில் அவர் தீவிரக் கவனம் செலுத்தி வருகிறார். தமிழ்நாட்டில் தற்போது நடைபெற்று வருவது வெறும் அரசியல் ஆட்சி அல்ல; இது தூய்மையான 'அன்பு சாம்ராஜ்யம்'. மக்களின் பேராதரவோடு நடக்கும் இந்த அன்பு ஆட்சியை எந்தவொரு சக்தியாலும் அசைக்க முடியாது" என்று அவர் அதிரடியாகக் குறிப்பிட்டார்.

மருத்துவத் துறை அமைச்சரின் இந்த உணர்ச்சிப்பூர்வமான பேச்சைக் கேட்டதும், விழாவில் பங்கேற்ற இளைஞர்களும், புதிய பணியாளர்களும் பலத்த கைதட்டல் மற்றும் விசில்களுடன் தங்களது வரவேற்பைத் தெரிவித்தனர். அரசுத் துறைகளில் நிலவி வந்த முந்தைய குறைபாடுகளைக் களைந்து, தற்போதைய புதிய அரசு அனைத்துத் துறைகளிலும் வியக்கத்தக்க மாற்றங்களைக் கொண்டு வந்துள்ளதாக அரசு தரப்பில் பெருமிதம் தெரிவிக்கப்பட்டுள்ளது.