- கவிஞர் மு. ரம்யா ஆனந்த்

இருபதில் இருந்த கனவுகளுக்கும்,

முப்பதில் வந்த நிஜங்களுக்கும்,

இடையில்தான் எத்தனை போராட்டங்கள்...

இதயத்தில் மட்டும் எத்தனை மாற்றங்கள்!

எல்லோரும் நம்மவர் என்ற எண்ணம் மாறியது,

எதிர்பார்ப்புகள் குறைந்து அனுபவம் கூடியது!

சிரித்த முகங்கள் எல்லாம் சொந்தமில்லை,

சேர்ந்து நடந்தவர்கள் எல்லாம் நிரந்தரமில்லை!

அன்பைக் கொடுத்தால் மட்டும் போதாது,

அதன் அருமை அறிபவரும் வேண்டும்;

உறவைக் காத்தால் மட்டும் போதாது,

உணர்வைப் புரிபவரும் வேண்டும்!

வாதம் செய்வதைவிட மௌனம் சிறந்தது,

சில நேரம் விலகுவதே நிம்மதி நிறைந்தது!

பணத்தின் மதிப்பும் புரியத் தொடங்கியது,

பாசத்தின் உண்மையும் தெரியத் தொடங்கியது!

அழகான முகத்தைவிட ஆரோக்கியம் முக்கியம்,

ஆடம்பர வாழ்வைவிட அமைதியே இனிமை!

பிறர் பாராட்ட வாழ்வது தேவையில்லை,

நம் மனம் பாராட்ட வாழ்வதே தொல்லையில்லை!

தோல்வி வந்தால் துவண்டு போவதில்லை,

தாமதமான வெற்றி தோல்வியாவதில்லை!

நேற்றைய கவலை இன்று தேவையில்லை,

நாளைய பயத்திற்கு இன்றே இடமில்லை!

எல்லோருக்கும் பிடித்தவராய் இருக்க முடியாது,

எல்லா நேரமும் நல்லவராய் நடிக்கவும் முடியாது!

காலம் கற்றுத்தந்த பாடங்கள் ஏராளம்,

காயங்கள் கொடுத்தது வாழ்க்கையின் ஞானம்!

இப்போது புரிகிறது...

வாழ்க்கை என்பது ஓடிக்கொண்டே இருப்பதல்ல,

ஓய்ந்து நம்மை உணர்ந்து கொள்வதும்தான்!

வயது முப்பதைத் தொட்டுவிட்டது,

மனம் பல பாடங்களைக் கற்றுவிட்டது!

இனி யாருக்காகவும் என்னை இழக்க மாட்டேன்,

என் மகிழ்ச்சியை நானே தொலைக்க மாட்டேன்!

முப்பது என்பது முடிவல்ல...

முதிர்ச்சியின் தொடக்கம்!

வயது என்பது வெறும் எண்ணிக்கை...

வாழ்க்கைப் புரிதலே உண்மையான வளர்ச்சி! 

(கவிஞர் மு. ரம்யா ஆனந்த், D.T.Ed., M.A., M.Ed. கல்வித் தகுதிகளைப் பெற்றவர். கல்வித்துறையில் ஆர்வம் கொண்டவர். ஆசிரியர் பணிக்கான போட்டித் தேர்வுகளுக்குத் தயாராகி வருவதுடன், பெண்களின் உணர்வுகள், வாழ்க்கை அனுபவங்கள், தன்னம்பிக்கை மற்றும் மனித உறவுகளை மையமாகக் கொண்டு கவிதைகள் எழுதுவதிலும் ஆர்வம் கொண்டவர். தனது எழுத்துகளின் மூலம் வாசகர்களின் மனதில் நல்ல சிந்தனைகளையும் நம்பிக்கையையும் விதைப்பதை விரும்புகிறார்)