தாணுமாலயன் (இயற்கையை போதிக்கும் ஆசான்)

Su.tha Arivalagan

Sep 05, 2026,02:20 PM IST

- சசிகலா விஸ்வநாதன்

நீராழி கரையில்,

எண்திசை தெய்வமென

விரிந்த மலராசனத்தில்

அலர் அரவிந்த கரங்கள்;

சிறு உந்திச் சுழலாழி;

அகன்ற மார்பில்

அணி மணிகளுடன்:

முப்புரி நூலும், கங்கணமும்,;

மேல் கை வளைப்பும்;

உயர்த்திய இரு கரங்களில்

சங்கமும், பத்மமும்,

செவ்வாழை பூ நேர்

சங்கு கழுத்தும்;

அதை அணி செய்யும்

கண்டிகையும்;

என் மன்றாடல் கேட்கும்

மகர குழையுடை

நீள் செவியும்;

அருள் பொழி மலர் முகம்

ஒரு மூன்றில்,

பூத்த குமிண் புன்னகையும்;

மோன தவத்தில் அமைந்த

இரு மூன்று கண் மலரும்,

வில்லென வளை

புருவ மத்தியில் நம்

அம்பென எழும்பும்

கூர் நுதல் திலகமும்;

உச்சியில் ஒருங்கும்

மும்முடி மகுடமும்;

காட்டுவெதெல்லாம்; ஒன்றே!

இயற்கையைத் தொழு.!

இயற்கையை நேசி!

இயற்கையை பணிந்து கல்!

இயற்கையிடம் அமைதி கொள்!

காற்றிலும் கனலிலும்

அனலிலும் புனலிலும்

மண்ணிலும் விண்ணிலும்- விரி

வானிலும் விசும்பிலும்

நானும் நீயும்

அறியும் செறிவறிவு

வேறெங்கும் நான் காணேனே

(சசிகலா விஸ்வநாதன் - தடய அறிவியல் துறையில் உதவி இயக்குநராக பணி நிறைவில் இருக்கும் முதியவள். அதிகம் அறியப்படாத நான்; இரண்டு வருடங்களாக ஓய்வு நேரத்தில் கவிதைகளும் சிறுகதைகளும் எழுதிக்கொண்டு இருக்கிறேன். எனது கதைகளும், கவிதைகளும், தமிழ் நெஞ்சம்; வானமே எல்லை; கொலுசு, மலர் வனம், சக்தி பெண்ணிதழ்; ஆகியவற்றில் வெளியாகின்றன. புஸ்தகா நிறுவனம் மூலம் இது வரை நான்கு கதை தொகுப்புகளை வெளியிட்டுள்ளேன்)