-பாவை.பு

சென்னை:  தமிழகம் உள்ளிட்ட ஐந்து மாநில தேர்தல் தேதி அறிவிக்கப்பட்ட பிறகு, கூட்டணிக் கட்சிகள் தங்கள் தொகுதி பங்கீடு குறித்த தீவிர ஆலோசனைகளை விறுவிறுப்பாக நடத்தி வருகின்றனர். இந்த நிலையில் பாஜக போட்டியிடப் போகும் தொகுதிகள் குறித்த உத்தேசப் பட்டியல் வெளியாகி எதிர்பார்ப்பை எகிற வைத்துள்ளது.

தமிழகத்தில் வரும் ஏப்ரல் 23.04.2026 அன்று தேர்தல் நடைபெறும் என்று இந்திய தேர்தல் ஆணையம் அறிவித்த பிறகு, தமிழக அரசியல் களம் சூடுபிடித்துள்ளது.

அந்த வகையில் பாஜகவின் தொகுதி பங்கீடு குறித்து அதன் கூட்டணிக் கட்சியான அதிமுகவுடன் நேற்று முன்தினம் பேச்சுவார்த்தை நடந்தது. இதற்காகத் தமிழக தேர்தல் பொறுப்பாளரான பியூஷ் கோயல் மற்றும் தமிழக பாஜக முக்கிய நிர்வாகிகளுடன், அதிமுக பொதுச்செயலாளர் எடப்பாடி பழனிசாமி மற்றும் அக்கட்சி நிர்வாகிகள் சென்னை ராயப்பேட்டையில் உள்ள அதிமுக தலைமை அலுவலகத்தில் பேச்சுவார்த்தை நடத்தினார்கள். 

இதில் பாஜக 27 இடங்களிலும், தினகரனின்  அமமுக கட்சிக்கு 11 இடங்கள், பாமக அன்புமணிக்கு 18 இடங்கள் ஒதுக்கப்பட்டுள்ளதாகவும் அறிவிக்கப்பட்டது. பேச்சுவார்த்தையில் உடன்பாடு ஏற்பட்டதையடுத்து, ஒப்பந்தம் கையெழுத்தாகி அதை அதிகாரப்பூர்வமாக வெளியிட்டது. மேலும் பாஜக தாங்கள் களம் காண விரும்பும் உத்தேச பட்டியலையும் அமை்சர் பியூஷ் கோயல், அதிமுக பொதுச் செயலாளர் எடப்பாடி பழனிச்சாமியிடம் கொடுத்ததாகத் தகவல் வெளியாகியுள்ளது.

பாஜக போட்டியிட விரும்பும் தொகுதிகள் இதுதான் என்று ஒரு தகவல் வெளியாகியுள்ளது. அந்தத் தொகுதிகள் இவைதான்: கோவை வடக்கு, சிங்காநல்லூர், மொடக்குறிச்சி, குன்னூர், சூலூர், அந்தியூர், திருச்செங்கோடு, திருப்பூர், ராசிபுரம், வானூர், பழனி, அரவக்குறிச்சி, மதுரை தெற்கு, மயிலாடுதுறை, நாகர்கோவில், குளச்சல், விளவங்கோடு, பத்மநாபபுரம், திருநெல்வேலி, திருச்செந்தூர், சாத்தூர், வேளச்சேரி, துறைமுகம், மயிலாப்பூர், திருத்தணி, கும்பகோணம் ஆகியவையே அவை.

இதில் கூட்டணிக் கட்சிகள் ஏதாவது சில தொகுதிகளைக் கேட்கும் பட்சத்தில், மாற்றுத் தொகுதிகளையும் கொடுத்துள்ளதாகத் தெரிகிறது. அவை கே.வி.குப்பம், வாசுதேவநல்லூர், அவிநாசி, கிணத்துக்கடவு என்று சொல்லப்படுகிறது.

தொகுதிகள் குறித்து இறுதி முடிவு எடுக்க பாஜக தேசிய செயலாளர் பி.எல். சந்தோஷ் நாளை சென்னை வரவுள்ளார்.