- சு.தா.அறிவழகன்

மனித குலத்தின் வரலாற்றை நாம் திரும்பிப் பார்க்கும்போது, அறியாமையின் இருளைப் போக்கி, நாகரிகத்தின் பாதையை ஒளிமயமாக்கியதில் அறிவியலின் பங்கு பொன்னெழுதர்களால் பொறிக்கத்தக்கது. எல்லைகளையும், மொழிகளையும், இனங்களையும் கடந்த மனிதகுலத்தின் பொதுவான சொத்து எதுவென்றால் அது அறிவியல் சிந்தனை மட்டுமே. 

மனிதன் பகுத்தறிந்து செயல்பட ஆரம்பித்தபோது அவனுடன் அறிவியலும் கை கோர்த்துக் கொண்டது. இரண்டும் இணைந்தபோது மனிதனின் வளர்ச்சி பிரமாண்டத்தைத் தொட்டது. அதன் பிறகு நடந்தது வரலாறு.

ஒவ்வொரு ஆண்டும் நவம்பர் 10-ஆம் நாள் கடைபிடிக்கப்படும் 'அமைதி மற்றும் வளர்ச்சிக்கான உலக அறிவியல் தினம்' (World Science Day for Peace and Development), அறிவியலை வெறும் ஆய்வுக் கூடங்களுக்குள் முடக்கிவிடாமல், அது ஒட்டுமொத்த உலகளாவிய அமைதிக்கும், நிலையான வளர்ச்சிக்கும் எவ்வாறு பாலமாக அமைகிறது என்பதை நமக்கு ஆழமாக உணர்த்துகிறது.

இன்றைய உலகச் சூழலில், போர் மேகங்கள், காலநிலை மாற்ற அச்சுறுத்தல்கள், வறுமை போன்ற சவால்கள் மனிதகுலத்தை அச்சுறுத்திக் கொண்டிருக்கின்றன. இந்த இக்கட்டான தருணத்தில்தான், அறிவியலின் உண்மையான நோக்கம் என்னவென்பதை நாம் சிந்திக்க வேண்டியுள்ளது. அறிவியல் என்பது அழிவுக்கான ஆயுதங்களை உருவாக்குவதற்கோ அல்லது நாடுகளுக்கு இடையே பிளவுகளை ஏற்படுத்துவதற்கோ அல்ல; மாறாக, மனிதர்களின் துயர்களைத் துடைக்கவும், இந்த அழகிய பூமிப் பந்தை நாம் வாழ உகந்த இடமாக மாற்றவுமே பயன்பட வேண்டும்.

ஐக்கிய நாடுகள் சபையின் யுனெஸ்கோ (UNESCO) அமைப்பு, அறிவியல் மற்றும் சமூகம் ஆகியவற்றுக்கு இடையேயான உறவை வலுப்படுத்துவதையும், சாமானிய மக்களுக்கும் அறிவியலின் பலன்கள் போய்ச் சேர்வதை உறுதி செய்வதையும் இத்தினத்தின் முக்கிய நோக்கங்களாக முன்வைக்கிறது. அறிவியல் கண்டுபிடிப்புகள் ஆய்வுக் கூடங்களை விட்டுவெளியேறி, ஏழை எளிய மக்களின் குடிநீர் தேவையைப் பூர்த்தி செய்யும்போது, சுகாதாரத்தை மேம்படுத்தும்போது, மற்றும் பசுமையான பூமியை எதிர்கால சந்ததிக்கு உறுதி செய்யும்போதுதான் அது உண்மையான வளர்ச்சியை எட்டுகிறது.

அறிவியல் என்பது வெறும் தொழில்நுட்ப முன்னேற்றம் மட்டுமல்ல; அது ஒரு மனநிலை. பாகுபாடற்ற தேடல், உண்மையை ஏற்றுக்கொள்ளும் பக்குவம், மற்றும் ஆதாரங்களின் அடிப்படையில் சிந்திக்கும் தன்மை ஆகியவைதான் அறிவியலின் அடிநாதம். இத்தகைய அறிவியல் மனப்பான்மை சமூகத்தில் ஆழமாக வேரூன்றும்போது, அங்கு மூடநம்பிக்கைகளும் வெறுப்புணர்வும் தானாகவே அகன்றுவிடும். 

நாடுகளுக்கு இடையே கருத்து வேறுபாடுகள் எழும்போது, அறிவியல் ராஜதந்திரம் (Science Diplomacy) எல்லைகளைக் கடந்து நாடுகளை ஒற்றுமைப்படுத்த உதவுகிறது. பருவநிலை மாற்றம், தொற்றுநோய்கள் போன்ற உலகளாவிய பிரச்சினைகளை ஒரு நாட்டால் தனித்து எதிர் கொள்ள முடியாது; அதற்கு உலகளாவிய விஞ்ஞானக் கூட்டுமுயற்சி அவசியமாகிறது.

இன்றைய இளைஞர்களும் மாணவர்களும் வெறும் தொழில்நுட்பப் பயனாளர்களாக மட்டும் இருக்கக் கூடாது; அறிவியலின் வழிநின்று சிந்திக்கும் படைப்பாளர்களாக மாற வேண்டும். பள்ளிக் கூடங்களிலும் கல்லூரிகளிலும் வளர்க்கப்படும் அறிவியல் ஆர்வம், நாளைய சமுதாயத்தின் மாற்றத்திற்கான விதையாகும்.

அறிவியல் மனிதனை விண்வெளிக்கு அழைத்துச் சென்றுள்ளது; அணுவின் ஆற்றலைத் திறந்து காட்டியுள்ளது. ஆனால், அந்த ஆற்றல் மனித குலத்தின் அழிவுக்கல்ல, அடிமைத்தனங்களை வீழ்த்தி அமைதியையும் சமத்துவத்தையும் நிலைநாட்டுவதற்கே பயன்படுத்தப்பட வேண்டும். இந்த நன்னாளில், அறிவியலை மனிதகுலத்தின் ஒட்டுமொத்த நலனுக்காகவும், நிலையான உலகளாவிய அமைதிக்காகவும் அர்ப்பணிப்போம் என உறுதி ஏற்போம்.

அறிவியலால் இணைவோம்.. அமைதியால் வளம் பெறுவோம்!