சென்னை: தமிழ்நாட்டில் இன்று, வரும் 8, 9 மற்றும் 10 ஆகிய தேதிகளில் டெல்டா  மற்றும் தென் மாவட்டங்களில் கனமழை பெய்ய வாய்ப்பு உள்ளதால், கனமழைக்கான மஞ்சள் நிற எச்சரிக்கையை  விடுத்துள்ளது இந்திய வானிலை ஆய்வு மையம்.

தமிழ்நாட்டில் வடகிழக்கு பருவ மழை தீவிரம் அடைந்து வருவதால் கடந்த சில நாட்களாகவே பரவலாக கனமழை பெய்து வருகிறது. குறிப்பாக பகல் நேரத்தில் வெயில் அடித்தாலும் மாலை இரவு நேரங்களில் கருமேகங்கள் சூழ்ந்து மழை பெய்து வருகிறது. அந்த வரிசையில் வானிலை மையம் அறிவிப்பின்படி தேனி மாவட்டம் மற்றும் அதன் சுற்றுவட்டார பகுதிகளில் தொடர்ந்து ஐந்து நாட்களாக கன மழை பெய்து வருகிறது. அதேபோல் திருப்பூர், திண்டுக்கல், கள்ளக்குறிச்சி, நாமக்கல், திருச்செங்கோடு, தூத்துக்குடி, மற்றும் அதன் சுற்று வட்டார பகுதிகளில் இரவு நேரங்களில் தொடர்ந்து பலத்த மழை பெய்தது.

இந்த நிலையில் தென் தமிழக மற்றும் அதனை ஒட்டிய பகுதிகளின் மேல் வளிமண்டல கீழடுக்கு சுழற்சி நீடித்து வருவதால் தமிழ்நாட்டில் அடுத்த இரண்டு நாட்களுக்கு ஒரு சில இடங்களில் இடி மின்னலுடன் கூடிய லேசானது முதல் மிதமானது வரை மழை பெய்ய வாய்ப்புள்ளது. அதேபோல் 8,9 மற்றும் 10 ஆகிய தேதிகளில் டெல்டா மற்றும் தென் மாவட்டங்களில் ஒரு சில இடங்களில் கன மழை பெய்யக்கூடும் என்பதால், கன மழைக்கான மஞ்சள் நிற எச்சரிக்கை விடுத்துள்ளது இந்திய வானிலை ஆய்வு மையம்.

இன்று கனமழை: 

நெல்லை, கன்னியாகுமரி, தூத்துக்குடி, தென்காசி, ஆகிய நான்கு மாவட்டங்களில் இன்று கனமழை பெய்ய வாய்ப்புள்ளது.

 8 ஆம் தேதி கனமழை:

தஞ்சை, நாகை, மயிலாடுதுறை,  திருவாரூர், புதுக்கோட்டை, சிவகங்கை, ராமநாதபுரம், தேனி திண்டுக்கல், விருதுநகர், மதுரை, தென்காசி, நெல்லை, தூத்துக்குடி, கன்னியாகுமரி, உள்ளிட்ட 15 மாவட்டங்களில் கன மழை பெய்ய வாய்ப்புள்ளது.

ஒன்பதாம் தேதி கனமழை: 

செங்கல்பட்டு, விழுப்புரம், கடலூர், மயிலாடுதுறை, நாகப்பட்டினம், திருவாரூர், தஞ்சாவூர், புதுக்கோட்டை, சிவகங்கை,ராமநாதபுரம், தேனி திண்டுக்கல் மதுரை விருதுநகர் தென்காசி ஆகிய 15 மாவட்டங்களில் ஒரு சில இடங்களில் கன மழை பெய்ய வாய்ப்புள்ளது. 

10 ஆம் தேதி கனமழை:

திருவாரூர், மயிலாடுதுறை, நாகப்பட்டினம், தஞ்சாவூர், புதுக்கோட்டை, சிவகங்கை, மதுரை, ராமநாதபுரம், தேனி, திண்டுக்கல், விருதுநகர், தென்காசி, தூத்துக்குடி, திருநெல்வேலி, கன்னியாகுமரி,ஆகிய மாவட்டங்களில் ஒரு சில இடங்களில் கன மழை பெய்ய வாய்ப்புள்ளது.

சென்னையை பொறுத்த வரை அடுத்த 24 மணி நேரத்தில் வானம் ஓரளவு மேகமூட்டத்துடன் காணப்படும்.நகரின் ஒரு சில இடங்களில் இடி மின்னலுடன் கூடிய லேசானது முதல் மிதமானது வரை மழை பெய்ய வாய்ப்புள்ளதாகவும் தெரிவித்துள்ளது. அதேபோல் தமிழக கடலோரப் பகுதிகள் மற்றும் வங்கக்கடல் பகுதிகளில் சூறாவளி காற்று மணிக்கு 35 முதல் 45 கிலோமீட்டர் வேகத்திலும், இடையே 55 கிலோமீட்டர் வேகத்திலும் வீசக்கூடும் என்பதால் மீனவர்கள் வரும் எட்டாம் தேதி வரை கடலுக்கு செல்ல வேண்டாம் என அறிவுறுத்தப்பட்டுள்ளனர்.

செய்திகளை உடனுக்குடன் அறிய தென்தமிழ் வாட்ஸ் ஆப் சானலில் இணையவும்