புதுடெல்லி: இந்தியாவின் 2026-27 நிதியாண்டிற்கான மத்திய பட்ஜெட் வரும் பிப்ரவரி 1, 2026 அன்று தாக்கல் செய்யப்பட உள்ளது. வழக்கமாக வார நாட்களில் தாக்கல் செய்யப்படும் பட்ஜெட், இந்த முறை ஞாயிற்றுக்கிழமை வருவதால், அன்றைய தினமே தாக்கல் செய்யப்படுமா அல்லது மாற்றப்படுமா என்ற எதிர்பார்ப்பு நிலவுகிறது. இருப்பினும், நாடாளுமன்ற மரபுகளின்படி பிப்ரவரி 1-ம் தேதியே பட்ஜெட் தாக்கல் செய்யப்பட அதிக வாய்ப்புள்ளதாகத் தெரிகிறது.

வரலாற்று முக்கியத்துவம் வாய்ந்த 9-வது பட்ஜெட் :

நிதியமைச்சர் நிர்மலா சீதாராமன் இந்த பட்ஜெட்டைத் தாக்கல் செய்யும் பட்சத்தில், இது அவர் தாக்கல் செய்யும் தொடர்ச்சியான 9-வது பட்ஜெட் என்ற வரலாற்றுச் சாதனையைப் படைக்கும். இதற்கு முன்னதாக மொரார்ஜி தேசாய் அதிக பட்ஜெட்டுகளைத் தாக்கல் செய்த சாதனையை படைத்துள்ளார். நிர்மலா சீதாராமன் ஏற்கனவே தொடர்ச்சியாக 8 முறை பட்ஜெட் தாக்கல் செய்து சாதனை படைத்துள்ள நிலையில், இது அவருக்கு மற்றுமொரு மைல்கல்லாக அமையும்.

ஞாயிற்றுக்கிழமை பட்ஜெட் தாக்கல் - பின்னணி என்ன?

2017-ம் ஆண்டு முதல், பிப்ரவரி 1-ம் தேதியே பட்ஜெட் தாக்கல் செய்யும் முறையை மோடி அரசு பின்பற்றி வருகிறது. புதிய நிதியாண்டு தொடங்கும் ஏப்ரல் 1-க்குள் அனைத்து நடைமுறைகளையும் முடிக்க இந்தத் தேதி மாற்றம் உதவியது. 2026 பிப்ரவரி 1 ஞாயிற்றுக்கிழமை என்பதால், நாடாளுமன்றத்திற்கு விடுமுறை அளிக்கப்படாமல் பட்ஜெட் கூட்டத்தொடர் நடைபெற வாய்ப்புள்ளது. இதற்கு முன்பு 2015 மற்றும் 2020 ஆண்டுகளில் சனிக்கிழமைகளில் பட்ஜெட் தாக்கல் செய்யப்பட்டுள்ளது குறிப்பிடத்தக்கது.

மக்களின் எதிர்பார்ப்புகள் : 

- வருமான வரி: நடுத்தர வர்க்கத்தினர் வருமான வரி உச்சவரம்பில் மேலும் தளர்வுகளை எதிர்பார்க்கின்றனர். (கடந்த பட்ஜெட்டில் 12 லட்சம் வரை சலுகை அளிக்கப்பட்டது குறிப்பிடத்தக்கது).

- பொருளாதார வளர்ச்சி: உலகளாவிய பொருளாதார சூழலுக்கு மத்தியில் இந்தியாவின் ஜிடிபி வளர்ச்சியை ஊக்குவிக்கும் திட்டங்கள் எதிர்பார்க்கப்படுகின்றன.

- வேலைவாய்ப்பு மற்றும் விவசாயம்: இளைஞர்களுக்கான வேலைவாய்ப்பு உருவாக்கம் மற்றும் விவசாயிகளுக்கான சிறப்புத் திட்டங்கள் குறித்து அறிவிப்புகள் வெளியாகலாம்.

தேர்தலுக்கான அறிவிப்புகள் வருமா?

இந்த ஆண்டு தமிழகம், கேரளா, மேற்குவங்கம் உள்ளிட்ட மாநிலங்களில் சட்டசபை தேர்தல் நடைபெற உள்ளது. இந்த மூன்று மாநிலங்களுமே பாஜக., காலூன்ற தீவிரம் காட்டும் மாநிலங்கள் என்பதால் இம்மாநில மக்களை கவரும் வகையிலான புதிய அறிவிப்புக்கள் பட்ஜெட்டில் வெளியிடப்படுவதற்கான வாய்ப்புகள் அதிகம் உள்ளது என எதிர்பார்க்கப்படுகிறது.

நாடாளுமன்ற விவகாரங்கள் துறை அமைச்சர் கிரண் ரிஜிஜு கூறுகையில், பட்ஜெட் தாக்கல் குறித்த இறுதி முடிவை நாடாளுமன்ற விவகாரங்களுக்கான அமைச்சரவைக் குழு (CCPA) சரியான நேரத்தில் எடுக்கும் என்று தெரிவித்துள்ளார்.