சென்னை: 2026 உலகக் கோப்பை கால்பந்து திருவிழா மெக்சிகோ, கனடா மற்றும் அமெரிக்கா ஆகிய நாடுகளில் கோலாகலமாகத் தொடங்கியுள்ளது. தற்போது மெக்சிகோவில் போட்டிகள் தொடங்கியுள்ளன.

உலகெங்கிலும் உள்ள கால்பந்து ரசிகர்களின் ஒட்டுமொத்த பார்வையும் தற்போது அர்ஜென்டினா அணியின் கேப்டன் லியோனல் மெஸ்ஸியின் மீதுதான் உள்ளது.

கடந்த 2022-ஆம் ஆண்டு கத்தாரில் நடந்த வரலாற்றுச் சிறப்புமிக்க இறுதிப் போட்டியில், பிரான்ஸ் அணியை வீழ்த்தி 36 ஆண்டு கால ஏக்கத்தைத் தீர்த்து வைத்தது அர்ஜென்டினா. நடப்பு சாம்பியன் என்ற அந்தஸ்துடன், கோப்பையைத் தக்கவைத்துக் கொள்ளும் முனைப்பில் இம்முறை அர்ஜென்டினா படை களம் இறங்குகிறது. இது மெஸ்ஸியின் கடைசி உலகக் கோப்பைத் தொடராக இருக்கும் என்பதால் இதன் மீதான எதிர்பார்ப்பு விண்முட்ட உயர்ந்துள்ளது.

சமீபத்தில் ஆபர்ன் நகரில் நடைபெற்ற உலகக் கோப்பைக்கான ஆயத்தப் போட்டியில் அர்ஜென்டினா அணி 3-0 என்ற கோல் கணக்கில் ஐஸ்லாந்தை வீழ்த்தி அசத்தியது. இப்போட்டியின் இரண்டாம் பாதியில் மாற்று ஆட்டக்காரராக களம் புகுந்த மெஸ்ஸி, பெனால்டி வாய்ப்பை கோலாக மாற்றி அசத்தினார். இவருடன் வாலண்டின் பார்கோ மற்றும் தியாகோ அல்மாடா ஆகியோரும் கோல் அடித்தனர். 

முன்னதாக, ஹோண்டுராஸ் அணிக்கு எதிரான நட்புரீதியான ஆட்டத்தின் போது மெஸ்ஸியின் இடது தொடையில் ஏற்பட்ட தசை சோர்வு காரணமாக அவருக்கு ஓய்வளிக்கப்பட்டிருந்தது குறிப்பிடத்தக்கது. தற்போது அவர் முழு உடற்தகுதியுடன் விளையாடத் தயாராகிவிட்டார்.

இம்முறை அர்ஜென்டினா அணி 'ஜே' பிரிவில் அல்ஜீரியா, ஆஸ்திரியா மற்றும் ஜோர்டான் ஆகிய நாடுகளுடன் இடம்பெற்றுள்ளது.

அர்ஜென்டினாவின் முதல் போட்டி ஜூன் 17ம் தேத கன்சாஸ் சிட்டியில் நடைபெறவுள்ளது. அல்ஜீரியாவை எதிர்த்து அது மோதவுள்ளது. அடுத்த போட்டி ஆஸ்திரியாவுடன் 22ம் தேதி நடைபெறும். ஜோர்டான்- அர்ஜென்டினா போட்டி 28ம் தேதி நடைபெறவுள்ளது. கடைசி இரு போட்டிகளும் ஆர்லிங்டன் நகரில் நடைபெறும்.

அர்ஜென்டினா அணி வீரர்கள் விவரம்:

கோல்கீப்பர்கள்: எமிலியானோ மார்டினெஸ், ஜெரோனிமோ ருல்லி, ஜுவான் முஸ்ஸோ.

தடுப்பாட்ட வீரர்கள்: கோன்சலோ மான்டைல், நஹுவேல் மோலினா, லிசாண்ட்ரோ மார்டினெஸ், நிக்கோலஸ் ஓட்டமெண்டி, மார்கோஸ் செனேசி, கிறிஸ்டியன் ரொமேரோ, ஃபகுண்டோ மதினா, நிக்கோலஸ் தாக்லியாஃபிகோ.

நடுகள வீரர்கள்: லியாண்ட்ரோ பரேடெஸ், ரோட்ரிகோ டி பால், எசெக்கியல் பலாசியோஸ், என்ஸோ பெர்னாண்டஸ், அலெக்சிஸ் மேக் அலிஸ்டர், ஜியோவானி லோ செல்சோ, வாலண்டின் பார்கோ.

முன்கள வீரர்கள்: லியோனல் மெஸ்ஸி, நிக்கோலஸ் பாஸ், தியாகோ அல்மாடா.