உலகின் மிகவும் இளம் வயது அதிபராகப் போகும் வங்கதேசத்தின் ஷிரின் ஷர்மின் செளத்ரி!

Jan 27, 2023,01:29 PM IST

டாக்கா: வங்கதேசத்தின் அடுத்த அதிபராக அந்த நாட்டு நாடாளுமன்ற பெண் சபாநாயகர் ஷிரின் ஷர்மின் செளத்ரி உருவெடுப்பார் என்று கூறப்படுகிறது. அப்படி அவர் அதிபர் ஆனால், உலகிலேயே மிகவும் இளம் வயது அதிபராகவும் அவர் சாதனை படைப்பார்.

வங்கதேச அதிபராக ஷிரின் ஆனால், அந்த நாட்டின் முதல் பெண் அதிபர் என்ற பெருமையையும் வரலாற்றையும் அவர் படைப்பார். தற்போது அந்த நாட்டின் பிரதமராக ஷேக் ஹசீனா உள்ளார். ஷிரின் அதிபரானால், ஒரே நேரத்தில் பிரதமர் மற்றும் அதிபர் இருவரும் பெண்களாக இருக்கும் நாடாகவும் வங்கதேசம் உருவெடுக்கும்.

ஷேக் ஹசீனா 2009ம் ஆண்டு ஆட்சியைப் பிடித்தார். அவரது அமைச்சரவையில் பலரும் பெண்கள்தான். உள்துறை அமைச்சராக சஹாரா கதுன் இருக்கிறார். வெளியுறவுத்துறை அமைச்சராக திபு மோனி உள்ளார். இவர் கல்வி அமைச்சராகவும் செயல்படுகிறார். இவர் இஸ்லாமிய பழமைவாதத்தை எதிர்த்து துணிகரமாக செயல்படக் கூடியவரும் கூட.

வங்கதேச ஜனாதிபதி தேர்தல் பிப்ரவரி 18ம் தேதி நடத்தப்படும் என்று தேர்தல் ஆணையம் ஏற்கனவே அறிவித்துள்ளது. தற்போது ஜனாதிபதி அப்துல் ஹமீத் விலகியதும் ஜனவரி 23ம் தேதி முதல் பிப்ரவரி 23ம் தேதிக்குள் தேர்தல் நடைபெறும் என்று ஏற்கனவே தேரத்தல் ஆணையம் அறிவித்திருந்தது.

ஷிரின் ஷர்மின் பெயரை இன்னும் ஆளும் அவாமி லீக் கட்சி முறைப்படி அறிவிக்கவில்லை. ஆனால் அவரைத்தான் ஆளும் கட்சி வேட்பாளராக அறிவிக்கும் என்று எதிர்பார்க்கப்படுகிறது.