சென்னை: தமிழ்நாட்டின் ஒட்டுமொத்த வளர்ச்சியையும், மக்கள் நலனையும் மையமாகக் கொண்டு ஆட்சியில் அமர்ந்த மூன்றே மாதங்களில் அனைவரும் பாராட்டும் வகையில் 2026 – 2027ஆம் ஆண்டிற்கான திருத்திய நிதிநிலை அறிக்கை மற்றும் வேளாண் நிதிநிலை அறிக்கை தாக்கல் செய்யப்பட்டுள்ளதற்கு முதலமைச்சர் விஜய் தங்களது அரசு சார்பில் வாழ்த்துகளையும் பாராட்டுதலையும் தெரிவித்துள்ளார்.

அமைச்சர்களுக்கு மனமார்ந்த வாழ்த்துக்கள்:

இது குறித்து முதலமைச்சர் விஜய் வெளியிட்டுள்ள வாழ்த்துச் செய்தியில்: “தமிழ்நாட்டின் வளர்ச்சியை முதன்மை இலக்காகவும், ஏழை எளிய மற்றும் அனைத்துத் தரப்பு மக்களின் நலனை மையமாகவும் கொண்டு நமது அரசு ஆட்சிப் பொறுப்பேற்ற மூன்றே மாதங்களில், அனைவரும் பாராட்டும் வகையில் 2026 - 2027ஆம் ஆண்டிற்கான திருத்திய நிதிநிலை அறிக்கையைத் தாக்கல் செய்துள்ள நிதி, திட்டம் மற்றும் வளர்ச்சித்துறை அமைச்சர் நெ.மரிய வில்சன் அவர்களுக்கும்;

அதேபோல், மாநிலத்தின் முதுகெலும்பாகத் திகழும் விவசாயிகளின் நலன் காக்கும் வகையில் வேளாண்மை நிதிநிலை அறிக்கையைத் தாக்கல் செய்துள்ள வேளாண்மை - உழவர் நலத்துறை அமைச்சர் ர.வினோத் ஆகிய இருவருக்கும் எனது மனமார்ந்த வாழ்த்துகளையும் பாராட்டுகளையும் தெரிவித்துக் கொள்கிறேன்” எனக் குறிப்பிட்டுள்ளார்.

புதிய நம்பிக்கையளிக்கும் வரவு செலவுத் திட்டம்:

தாக்கல் செய்யப்பட்டுள்ள இந்தத் திருத்திய நிதிநிலை அறிக்கை குறித்து மேலும் குறிப்பிட்ட முதலமைச்சர், “தொலைநோக்குப் பார்வையுடன் கூடிய இந்த திருத்திய நிதிநிலை அறிக்கையானது, சமூகத்தின் அனைத்துத் தரப்பு மக்களின் முன்னேற்றத்திற்கும், வாழ்வியல் உயர்விற்கும் ஒரு புதிய நம்பிக்கையை அளிக்கும் வகையில் சிறப்புடன் அமைந்துள்ளது” என்று தெரிவித்துள்ளார்.

விவசாயிகளின் வாழ்வாதாரம் வலுப்படும்:

வேளாண் நிதிநிலை அறிக்கை குறித்துப் பேசிய அவர், “தமிழ்நாட்டின் வேளாண் துறை வளர்ச்சியோடு மட்டுமல்லாமல், மாநிலத்தின் அனைத்துத் தரப்பு விவசாயிகளின் நலனையும், அவர்களது வாழ்வாதாரத்தையும் மேலும் வலுப்படுத்தும் வகையில் இந்த வேளாண்மை நிதிநிலை அறிக்கை மிகச் சிறப்பாக வடிவமைக்கப்பட்டுள்ளது” எனக் பாராட்டியுள்ளார். “நமது அரசின் இந்த வெற்றிப் பயணம் மக்கள் சேவையில் தொடர்ந்து தடையின்றி தொடரட்டும்!” என்று கூறி முதலமைச்சர் விஜய் தனது வாழ்த்துரையை நிறைவு செய்துள்ளார்.

புதிய அரசு பொறுப்பேற்ற குறுகிய காலத்தில், தொலைநோக்குத் திட்டங்களுடன் கூடிய வரவு செலவு அறிக்கைகள் தாக்கல் செய்யப்பட்டுள்ளது மக்கள் மற்றும் அரசியல் வட்டாரங்களில் பெரும் வரவேற்பைப் பெற்றுள்ளது.