டெல்லி: ஜந்தர் மந்தரிலும், நாட்டிலும் நிலவும் சூழ்நிலையை தேசவிரோத சக்திகள் தங்களுக்குச் சாதகமாகப் பயன்படுத்திக் கொள்ளக் கூடாது, நாட்டின் ஒற்றுமை நிலைக்க வேண்டும், இந்தியாவின் எந்தவொரு மாணவரின் எதிர்காலமும் சட்டச் சிக்கல்களில் மாட்டிக் கொள்ளக் கூடாது, நமது குழந்தைகள் தங்களின் நேரத்தைப் படிப்பதிலும், வாழ்க்கையை உருவாக்குவதிலும் மட்டுமே கவனமாகச் செலவிட வேண்டும் என்பதைக் கருத்தில் கொண்டு, எனது ராஜினாமா கடிதத்தை மதிப்பிற்குரிய பிரதமருக்கு அனுப்பியுள்ளேன் என்று மத்திய கல்வித்துறை அமைச்சர் தர்மேந்திர பிரதான் தெரிவித்துள்ளார்.

நீட் முறைகேடுகளுக்குப் பொறுப்பேற்று அமைச்சர் தர்மேந்திர பிரதான் ராஜினாமா செய்யக் கோரி டெல்லியில் பெரும் போராட்டம் நடந்து வரும் நிலையில் தற்போது அவரது ராஜினாமா கடிதம் வந்துள்ளது.

இதுதொடர்பாக தர்மேந்திர பிரதான் வெளியிட்டுள் அறிக்கை:

நான் கடந்த 40 ஆண்டுகளுக்கும் மேலாக மாணவர்கள், ஆசிரியர்கள் மற்றும் கல்விச் சீர்திருத்தங்களுக்காக என்னை அர்ப்பணித்துள்ளேன். ஒரு பலமான, அனைவரையும் உள்ளடக்கிய, தொலைநோக்கு பார்வை கொண்ட கல்வி முறைதான் ஒரு பலமான நாட்டின் அடித்தளம் என்பதில் எனக்கு எப்போதும் முழு நம்பிக்கை உண்டு.

நாட்டின் இளைஞர்களின் ஆசைகள், உணர்வுகள் மற்றும் அவர்களின் நியாயமான எதிர்பார்ப்புகளை நான் பெரிதும் மதிக்கிறேன். இந்தியாவின் இளைய தலைமுறையின் கனவுகளை நனவாக்குவது நம் அனைவரின் அரசியல் மற்றும் சமூக வாழ்வின் நன்னெறி லட்சியமாகும். மரியாதைக்குரிய பிரதமரின் தொலைநோக்கு தலைமையின்கீழ் நாட்டிற்கு சேவை செய்ய எனக்கு கிடைத்த வாய்ப்பிற்காக பிரதமருக்கு என் நன்றியைத் தெரிவித்துக் கொள்கிறேன்.

ஆனால், மே 3, 2026 அன்று நடந்த நீட்-யூஜி (NEET-UG) தேர்வில் முறைகேடுகள் கண்டறியப்பட்டன. இந்திய அரசு உடனடியாக இதில் தலையிட்டு, விசாரணையை சிபிஐ-யிடம் (CBI) ஒப்படைத்தது. தேர்வை ரத்து செய்து, மறுதேர்வுக்கான தேதியையும் அறிவித்தது. அத்துடன், அடுத்த ஆண்டிலிருந்து இத்தேர்வை கணினி வழித் தேர்வாக (Computer-Based Test - CBT) நடத்தவும் முடிவு செய்யப்பட்டது.

இந்தக் காலத்தில், 20 லட்சத்திற்கும் அதிகமான மாணவர்களுக்குத் தேர்வைச் சீராக நடத்துவதே நமது முக்கிய முன்னுரிமையாக இருந்தது. இதற்காக "அரசின் முழுமையான ஒருங்கிணைந்த அணுகுமுறை" (Whole of Government Approach) மூலம் பணிகள் மேற்கொள்ளப்பட்டன. இதில் இந்திய அரசுடன் மாநில அரசுகளும், குறிப்பாக மாவட்ட நிர்வாகமும் முக்கியப் பங்கு வகித்தன. மாணவர்களும், பெற்றோர்களும் அளித்த ஒத்துழைப்புடன் ஜூன் 21, 2026 அன்று இத்தேர்வு வெற்றிகரமாக நடந்து முடிந்தது.

முதல் நாளிலிருந்தே இதற்கு நான் பொறுப்பேற்றேன்; இந்தச் சூழ்நிலையை விட்டு நான் விலகவில்லை. தேர்வு மாஃபியாக்களால் (முறைகேடு செய்பவர்களால்) எந்தவொரு திறமையான மாணவனின் எதிர்காலமும் பாழாகக் கூடாது, எந்தவொரு மாணவருக்கும் அநீதி இழைக்கப்படக் கூடாது என்பதில் நான் உறுதியாக இருந்தேன்.

ஜூலை 16 அன்று வெளியிடப்பட்ட நீட்-யூஜி முடிவுகள் திருப்திகரமாக இருந்தன. இதில் ஏழ்மையான பின்னணியைச் சேர்ந்த பல திறமையான மாணவர்களுக்கும் வெற்றி கிடைத்தது.

இருப்பினும், இந்த நேரத்தில் பல மாணவர்களைத் தவறாக வழிநடத்தப் பொறுப்பான பதவிகளில் இருப்பவர்கள் முற்பட்டது மனதிற்கு மிகுந்த வேதனையளித்தது.

நமது ஜனநாயகத்தின் மீது எப்போதும் அசையாத நம்பிக்கை கொண்டவன் நான். இளைஞர்களின் ஆசைகள், கனவுகள் மற்றும் எதிர்பார்ப்புகளை நான் பெரிதும் மதிக்கிறேன். அவர்கள் இந்தியாவின் எதிர்காலம் மட்டுமல்ல, ஒரு புதிய மற்றும் வளர்ந்த இந்தியாவை உருவாக்குபவர்களும், சிற்பிகளும் ஆவார்கள்.

கடந்த 10 நாட்களில் நடந்த சம்பவங்களைப் பார்த்து எனது மனம் வேதனையடைந்துள்ளது. இது எனது தனிப்பட்ட நற்பெயர் பற்றிய விஷயம் அல்ல.

இந்தியாவின் இளைஞர் சக்தியே இந்த நாட்டின் உண்மையான பலம். நாட்டின் இளைஞர் சக்தியை எந்தக் குழப்பத்திலும் சிக்க விடமாட்டோம் என்பதே எனது லட்சியம்.

ஜந்தர் மந்தரிலும், நாட்டிலும் நிலவும் இந்தச் சூழ்நிலையை தேசவிரோத சக்திகள் தங்களுக்குச் சாதகமாகப் பயன்படுத்திக் கொள்ளக் கூடாது, நாட்டின் ஒற்றுமை நிலைக்க வேண்டும், இந்தியாவின் எந்தவொரு மாணவரின் எதிர்காலமும் சட்டச் சிக்கல்களில் மாட்டிக் கொள்ளக் கூடாது, நமது குழந்தைகள் தங்களின் நேரத்தைப் படிப்பதிலும், வாழ்க்கையை உருவாக்குவதிலும் மட்டுமே கவனமாகச் செலவிட வேண்டும் என்பதைக் கருத்தில் கொண்டு, எனது ராஜினாமா கடிதத்தை மதிப்பிற்குரிய பிரதமருக்கு அனுப்பியுள்ளேன்.

மதிப்பிற்குரிய பிரதமரின் வழிகாட்டுதல், நம்பிக்கை மற்றும் தொடர்ச்சியான ஆதரவிற்கு எனது மனமார்ந்த நன்றியைத் தெரிவித்துக் கொள்கிறேன். அதேபோல், எனது அமைச்சரவை சக ஊழியர்கள், அமைச்சக அதிகாரிகள், ஊழியர்கள் மற்றும் என்னுடன் இணைந்து பணியாற்றும் பாக்கியம் பெற்ற அனைவருக்கும் என் நன்றியைத் தெரிவித்துக் கொள்கிறேன். நாட்டுக்குச் சேவை செய்வதே எனது வாழ்வின் முதன்மை முன்னுரிமை. இதற்காக நான் எப்போதும் என்னை அர்ப்பணிப்பேன்.

ஸ்ரீ ஜகந்நாதரின் ஆசியோடு, எதிர்காலத்திலும் பாரத மாதா, ஒடிசா மக்கள் மற்றும் இளைஞர்களின் ஆசைகளை நிறைவேற்ற அனைத்து வழிகளிலும் என்னை அர்ப்பணிப்பேன் என்று அவர் தெரிவித்துள்ளார்.