நகைப்பிரியர்களுக்கு குட் நியூஸ்....தங்கம் மற்றும் வெள்ளி விலை அதிரடி சரிவு

Dec 30, 2025,05:24 PM IST

சென்னை: கடந்த சில நாட்களாக வரலாறு காணாத உச்சத்தைத் தொட்டு வந்த தங்கம் மற்றும் வெள்ளி விலை, இன்று (டிசம்பர் 30, 2025) அதிரடியாகச் சரிந்துள்ளது. தொடர்ச்சியாக இரண்டாவது நாளாக விலை குறைந்துள்ளதால், நகை வாங்கத் திட்டமிட்டுள்ள பொதுமக்கள் பெரும் நிம்மதி அடைந்துள்ளனர்.

இன்றைய தங்கம் மற்றும் வெள்ளி விலை நிலவரம்:

ஆபரணத் தங்கம் (22K)1 கிராம் ரூ.12,600, ஆபரணத் தங்கம் (22K)1 சவரன் ரூ.1,00,800. தூய தங்கம் (24K)1 கிராம் ரூ.13,745. வெள்ளி 1 கிராம் ரூ.258,பார் வெள்ளி 1 கிலோ ரூ.2,58,000.

நேற்று (டிசம்பர் 29) சவரனுக்கு ரூ.640 குறைந்திருந்த நிலையில், இன்று மேலும் ரூ.3,360 சரிந்துள்ளது. கடந்த இரண்டு நாட்களில் மட்டும் தங்கம் விலை சவரனுக்கு ரூ.4,000 வரை குறைந்துள்ளதால், நகை கடைகளில் மக்கள் கூட்டம் அதிகரிக்கத் தொடங்கியுள்ளது. வெள்ளியின் விலையும் இன்று மிகக் கடுமையாகக் குறைந்துள்ளது. ஒரு கிலோ வெள்ளி இன்று ரூ. 23,000 வரை சரிந்து பெரும் ஆச்சரியத்தை ஏற்படுத்தியுள்ளது.

சர்வதேச சந்தையில் ஏற்பட்டுள்ள மாற்றங்கள் மற்றும் முதலீட்டாளர்கள் லாபத்தை ஈட்டுவதற்காகத் தங்கத்தை விற்பனை செய்வது (Profit Booking) போன்ற காரணங்களால் இந்த விலை சரிவு ஏற்பட்டுள்ளதாகப் பொருளாதார வல்லுநர்கள் தெரிவிக்கின்றனர். உலகளாவிய பொருளாதார சூழல்கள் சீரடையும் பட்சத்தில் இந்த சரிவு மேலும் தொடர வாய்ப்புள்ளதாகக் கூறப்படுகிறது.