காலை எழுந்தவுடன் கை, கால் விரல்களில் அதிக விறைப்புத் தன்மை, கடுமையான மூட்டு வலி, அன்றாட வேலைகளைக் கூட செய்ய முடியாத சோர்வு—இவை அனைத்தும் வெறும் ‘வயதான காலத்தில் வரும் வலி’ அல்ல. இது ‘முடக்கு வாதம்’ எனப்படும் ருமாட்டாய்டு ஆர்த்ரிடிஸ் (Rheumatoid Arthritis) நோயின் முக்கிய அறிகுறிகளாக இருக்கலாம். 

ஆண்களை விட பெண்களை 3 மடங்கு அதிகமாக தாக்கும் இந்த நோய் பற்றிய விழிப்புணர்வு, ஒவ்வொரு பெண்ணுக்கும் மிக மிக அவசியம்.

முடக்கு வாதம் என்றால் என்ன?

முடக்கு வாதம் என்பது சாதாரண மூட்டுத் தேய்மானம் (Osteoarthritis) அல்ல. இது ஒரு ஆட்டோ இம்யூன் நோய் (Autoimmune Disease). நமது உடலின் நோய் எதிர்ப்பு மண்டலம் (Immune System), கிருமிகளிடமிருந்து நம்மைக் காப்பதற்குப் பதிலாக, தவறாக நமது சொந்த மூட்டுகளின் மெல்லிய சவ்வுப் படலத்தைத் (Synovium) தாக்குகிறது. இதனால் மூட்டுகளில் வீக்கம், வலி ஏற்பட்டு, நாளடைவில் எலும்புகளும் குருத்தெலும்புகளும் சேதமடைகின்றன.

பெண்களை அதிகம் தாக்குவது ஏன்?

மருத்துவ ஆய்வுகளின்படி, ஆண்களை விட பெண்களுக்கு இந்த நோய் வருவதற்கான வாய்ப்பு மிக அதிகம். 

இதற்கு முக்கியக் காரணங்களாக சிலவற்றை டாக்டர்கள் சொல்கிறார்கள்.

ஈஸ்ட்ரோஜன் (Estrogen) மற்றும் புரோஜெஸ்ட்டிரோன் (Progesterone) போன்ற பெண் ஹார்மோன்களின் அளவு மாறுபடும் போது நோய் எதிர்ப்பு மண்டலத்தில் மாற்றங்கள் ஏற்படுகின்றன.

பொதுவாக 30 முதல் 50 வயதுக்குட்பட்ட பெண்களை இது அதிகம் தாக்குகிறது. பிரசவத்திற்குப் பிறகும், மாதவிடாய் நின்ற பிறகும் (Menopause) இதன் தாக்கம் அதிகரிக்கலாம்.

குடும்பத்தில் யாருக்கேனும் இந்த நோய் இருந்தால், அடுத்த தலைமுறை பெண்களுக்கு வர வாய்ப்புள்ளது.  மன அழுத்தம், அதிக உடல் எடை மற்றும் புகைபிடித்தல் (அல்லது புகைப்போர் அருகில் இருக்கும் சூழல் -Passive Smokers) ஆபத்தை உயர்த்துகிறது.

முக்கிய அறிகுறிகள்:

1. காலை நேர விறைப்பு (Morning Stiffness): காலையில் தூங்கி எழுந்தவுடன் கை, கால் விரல்கள் மற்றும் மூட்டுகள் மிகவும் விறைப்பாக (Stiff) இருக்கும்.இந்த விறைப்புத் தன்மை 30 நிமிடங்கள் முதல் 1 மணி நேரம் வரை அல்லது அதற்கு மேலாகவும் நீடிக்கும். அசையும்போது அல்லது வேலை செய்யத் தொடங்கும்போது வலி லேசாகக் குறையலாம்.

2. சமச்சீரான மூட்டு வீக்கம் மற்றும் வலி (Symmetrical Joint Swelling): உடலின் இரண்டு பக்கங்களிலும் உள்ள ஒரே மூட்டுகள் ஒரே நேரத்தில் பாதிக்கப்படும்.  (எடுத்துக்காட்டாக: வலது கையின் கைவிரல் மூட்டு வலித்தால், இடது கையின் அதே மூட்டிலும் வலி மற்றும் வீக்கம் இருக்கும்).தொட்டுப் பார்த்தால் மூட்டுகள் கதகதப்பாகவும் (Warmth), சிவந்தும், மென்மையாகவும் (Tenderness) இருக்கும்.

3. சிறிய மூட்டுகளில் ஆரம்பிக்கும் பாதிப்பு: ஆரம்ப கட்டத்தில் கை விரல்கள், மணிக்கட்டு (Wrist), மற்றும் கால் விரல்கள் போன்ற சிறிய மூட்டுகளில்தான் வலி தோன்றும். நோய் முற்றிய பிறகுதான் முழங்கால், தோள்பட்டை, கழுத்து மற்றும் இடுப்பு போன்ற பெரிய மூட்டுகளுக்குப் பரவும்.

4. உடல் சார்ந்த பொதுவான அறிகுறிகள் (Systemic Symptoms): இது வெறும் மூட்டை மட்டும் பாதிக்கும் நோய் அல்ல என்பதால், உடல் முழுவதும் சில மாற்றங்கள் ஏற்படும். ஓய்வெடுத்தாலும் தீராத கடுமையான உடல் சோர்வு மற்றும் பலவீனம். உடலில் அழற்சி (Inflammation) இருப்பதால் தொடர்ந்து லேசான காய்ச்சல் உணர்வு இருக்கும். உணவு உண்பதில் நாட்டம் குறைந்து, உடல் எடை குறையக்கூடும்.

5. மூட்டு முடிச்சுகள் (Rheumatoid Nodules): நோய் தீவிரமடையும் போது, முழங்கை அல்லது விரல்களின் தோல் பகுதிக்கு அடியில் சிறிய, கடினமான உருண்டைகள் அல்லது வீக்கங்கள் (Nodules) உருவாகலாம்.

ஆரம்ப கட்டத்திலேயே இந்த அறிகுறிகளைக் கண்டறிந்து ருமாட்டாலஜிஸ்ட் (Rheumatologist) மருத்துவரிடம் பரிசோதனை செய்து கொண்டால், மூட்டுகள் நிரந்தரமாக உருக்குலைவதையும் (Deformity) ஊனமாவதையும் முழுமையாகத் தடுக்க முடியும்.

உங்களுக்கு இந்த அறிகுறிகள் இருந்தால், உடனே ஒரு ருமாட்டாலஜிஸ்ட் (Rheumatology Specialist) மருத்துவரை அணுக வேண்டும்.

1. பரிசோதனைகள்

இரத்தப் பரிசோதனை: RA Factor, Anti-CCP, ESR மற்றும் CRP பரிசோதனைகள் வீக்கத்தின் அளவைக் கண்டறிய உதவும்.

எக்ஸ்-ரே மற்றும் எம்.ஆர்.ஐ (X-ray / MRI): மூட்டுகளில் ஏற்பட்டுள்ள சேதத்தின் அளவைக் கணக்கிடப் பயன்படும்.

2. மருத்துவ சிகிச்சைகள்

DMARDs (Disease-Modifying Antirrheumatic Drugs): நோயின் தீவிரத்தைக் குறைத்து, மூட்டுகள் சேதமடைவதைத் தடுக்கும் முதன்மை மருந்துகள்.

Biologics: நவீன மருத்துவ முறைகள் மூலம் நோய் எதிர்ப்பு மண்டலத்தின் தவறான தாக்குதலைக் கட்டுப்படுத்துதல்.

3. வாழ்க்கை முறை மாற்றங்கள்

நடைபயிற்சி, நீச்சல் மற்றும் யோகா போன்றவை மூட்டுகளின் நெகிழ்வுத்தன்மையை அதிகரிக்கும்.

ஒமேகா-3 கொழுப்பு அமிலம் நிறைந்த உணவுகள் (மீன், நட்ஸ்), காய்கறிகள் மற்றும் ஆண்டி-ஆக்ஸிடன்ட் நிறைந்த உணவுகளைச் சேர்க்க வேண்டும்.

விழிப்புணர்வே முதல் படி!

"வலிதானே, தானாகச் சரியாகிவிடும்" என்று பெண்கள் தங்களின் ஆரோக்கியத்தைப் புறக்கணிப்பதே நோய் முற்றுவதற்குக் முக்கியக் காரணம். ஆரம்பத்திலேயே கண்டறிந்து தொடர் சிகிச்சை எடுத்தால், முடக்கு வாதம் இருந்தாலும் இயல்பான, சுறுசுறுப்பான வாழ்க்கையை வாழ முடியும்!