வாஷிங்டன்: மத்திய கிழக்கில் கடந்த ஒரு மாதமாக நீடித்து வரும் பதற்றமான சூழலுக்கு முற்றுப்புள்ளி வைக்கும் வகையில், ஈரான் மீதான ராணுவ நடவடிக்கைகளை இன்னும் இரண்டு முதல் மூன்று வாரங்களில் முடிவுக்குக் கொண்டு வர வாய்ப்புள்ளதாக அமெரிக்க அதிபர் டொனால்ட் டிரம்ப் தெரிவித்துள்ளார்.

வெள்ளை மாளிகையில் செய்தியாளர்களிடம் பேசிய டிரம்ப், "நாங்கள் மிக விரைவில் அங்கிருந்து வெளியேறப் போகிறோம். இது இன்னும் இரண்டு வாரங்கள் அல்லது மூன்று வாரங்களில் நடக்கலாம்" என்று குறிப்பிட்டுள்ளார். ஈரானுடனான இந்தப் போர் உலகளாவிய எரிசக்தி சந்தையில் பெரும் பாதிப்பை ஏற்படுத்தியுள்ள நிலையில், டிரம்பின் இந்த அறிவிப்பு சர்வதேச அளவில் முக்கியத்துவம் பெறுகிறது.

"ஒப்பந்தம் அவசியமில்லை" - டிரம்ப் அதிரடி

ஈரானுடன் ஒரு முறையான ராஜதந்திர உடன்படிக்கை அல்லது ஒப்பந்தம் ஏற்பட்டால் மட்டுமே போர் நிறுத்தப்படும் என்ற கருத்தை டிரம்ப் நிராகரித்துள்ளார். "ஈரான் என்னுடன் ஒப்பந்தம் செய்து கொள்ள வேண்டும் என்ற அவசியம் இல்லை. அவர்களின் அணு ஆயுதக் கனவைச் சிதைத்து, மீண்டும் அவர்களைப் பழைய கற்காலத்திற்கே கொண்டு செல்வது தான் எங்கள் இலக்கு. அவர்கள் மீண்டும் அணு ஆயுதங்களை உருவாக்க முடியாத நிலையை எட்டியதும், நாங்கள் அங்கிருந்து வெளியேறுவோம்" என்று அவர் திட்டவட்டமாகத் தெரிவித்துள்ளார்.

ஹார்முஸ் ஜலசந்தியும் உலக நாடுகளும் :

உலகளாவிய கச்சா எண்ணெய் போக்குவரத்தில் முக்கியப் பங்கு வகிக்கும் ஹார்முஸ் ஜலசந்தியைப் பாதுகாக்கும் பொறுப்பை இனி அமெரிக்கா ஏற்காது என்றும் டிரம்ப் சூசகமாகத் தெரிவித்துள்ளார். "அந்தப் பாதையைப் பயன்படுத்தும் பிரான்ஸ் போன்ற பிற நாடுகள் அதன் பாதுகாப்பை உறுதி செய்து கொள்ளட்டும். இதற்காக அமெரிக்கா தனது வளங்களை வீணாக்க வேண்டிய அவசியமில்லை" என்று அவர் கூறினார். மத்திய கிழக்கில் அமெரிக்காவின் நீண்ட கால ராணுவத் தலையீடுகளைக் குறைக்கும் டிரம்பின் கொள்கையின் ஒரு பகுதியாகவே இது பார்க்கப்படுகிறது.

ஈரானின் எச்சரிக்கை :

அமெரிக்காவின் இந்த அறிவிப்புகளுக்கு இடையே, ஈரான் தனது பதிலடியைத் தீவிரப்படுத்தப் போவதாக எச்சரித்துள்ளது. ஈரானின் புரட்சிகர பாதுகாப்புப் படை (Revolutionary Guards), அமெரிக்காவின் முன்னணி தொழில்நுட்ப நிறுவனங்களான மைக்ரோசாப்ட், கூகுள், ஆப்பிள், டெஸ்லா மற்றும் போயிங் உள்ளிட்ட 18 நிறுவனங்களை இலக்கு வைக்கப் போவதாக மிரட்டல் விடுத்துள்ளது. தங்களின் நிலப்பரப்பில் அமெரிக்கா நடத்திய தாக்குதல்களுக்கு இதுவே தகுந்த பதிலடியாக இருக்கும் என்று ஈரான் தெரிவித்துள்ளது.

முக்கிய உரையாற்றுகிறார் டிரம்ப் :

ஈரான் விவகாரம் தொடர்பாக இன்று இரவு 9 மணியளவில் (இந்திய நேரப்படி வியாழக்கிழமை காலை 6:30 மணி) அதிபர் டிரம்ப் நாட்டு மக்களுக்கு உரையாற்ற உள்ளார். இந்த உரையில் போரை முடிவுக்குக் கொண்டு வருவது குறித்த அதிகாரப்பூர்வமான காலக்கெடு மற்றும் அடுத்தகட்ட நடவடிக்கைகள் குறித்த அறிவிப்புகள் வெளியாகும் என எதிர்பார்க்கப்படுகிறது. அமெரிக்காவின் இந்த விலகல் அறிவிப்பு உலக சந்தையில் கச்சா எண்ணெய் விலையைச் சீராக்குமா அல்லது ஈரான் - இஸ்ரேல் இடையேயான மோதலை வேறு தளத்திற்குக் கொண்டு செல்லுமா என்பதைப் பொறுத்திருந்துதான் பார்க்க வேண்டும்.