- ஜெயபாரதி மதிவாணன்

சங்க இலக்கியத்தில் இடம்பெற்றுள்ள மதுரைக்காஞ்சி காட்டும் மருத நிலத்தின் வளத்தையும் அழகையும் பார்ப்போம். மாங்குடி மருதனார், மருத நிலத்தின் இயற்கை வளம், நீர்வளம், மலர்வளம், உழவர்களின் வாழ்க்கை, மீனவர்களின் தொழில் எனப் பல்வேறு கூறுகளைத் தம் பாடலில் அழகாகப் படம் பிடித்துக் காட்டுகிறார்.

மழையும் மலைவளமும்

கார்மேகங்கள் கீழ்த்திசைக் கடலிலிருந்து நீரை முகந்து கொண்டு மேற்கு நோக்கிச் செல்கின்றன. அங்குள்ள மலைகளைச் சுற்றி வளைத்துக்கொண்டு, இரவும் பகலும் முடிவடைவதை அறியாதவை போல, நாள் முழுவதும் மழையைப் பொழிகின்றன. அந்த மழைநீர் பள்ளங்களிலும் மேடுகளிலும் பெருக்கெடுத்து ஓடுகிறது. நிலத்தடியில் விளையும் கவலைக் கிழங்குகள் அழகிய குவியல்களாகக் காணப்படுகின்றன. அருவிகள் ஆர்ப்பரித்துக்கொண்டு மேலிருந்து கொட்டுகின்றன. மூங்கில் வளர்ந்த மலைச்சாரல்களில் குளிரால் யானைக் கூட்டங்கள் நடுங்கியபடி நிற்கின்றன.

ஆறுகளின் பெருக்கு

இடியுடன் கூடிய மழைமேகங்கள் வானில் பரவி மழையைப் பொழிகின்றன. மலைகளில் பெய்யும் மழையால் ஆறுகள் பெருக்கெடுத்து ஓடுகின்றன. நீரின் பெருக்கைத் தாங்க முடியாதவை போல, அவை கரைபுரண்டு பாய்ந்து இறுதியில் கடலைச் சென்றடைகின்றன.

மழையால் மண் கலந்து கலங்கிய வெள்ளம், வழியில் எதிர்ப்படும் மரங்களையும் பாறைகளையும் அடித்துக்கொண்டு செல்கிறது. அந்த வெள்ளம் குளங்களை நிரப்பி, அவற்றின் கரைகளிலும் நீர் பெருக்கெடுத்து வழியும்படி செய்கிறது. இக்காட்சிகள் மருத நிலத்தின் நீர்வளத்தையும் இயற்கையின் பேராற்றலையும் உணர்த்துகின்றன.

வயல்வளமும் மலர்வளமும்

யானைகளைக்கூட மறைக்கும் அளவுக்குக் கதிர்கள் செழித்து வளர்ந்த வயல்கள் மருத நிலத்தின் வளத்தைப் பறைசாற்றுகின்றன. அங்குள்ள குளங்களில் பலவகையான மலர்கள் நிறைந்து காணப்படுகின்றன. மேலெழுந்து நிற்கும் முட்களையுடைய தண்டுகளைக் கொண்ட தாமரை மலர்கள், கள்ளின் மணத்தை ஒத்த நறுமணம் வீசும் நெய்தல் மலர்கள், அகன்ற இதழ்கள் விரிந்து மலர்ந்த நீல நிறப் பூக்கள், மெல்லிய இலைகளைக் கொண்ட ஆம்பல் மலர்கள் எனப் பொய்கைகள் பூக்களால் நிறைந்திருக்கின்றன.

அந்த மலர்களில் வண்டுகள் தேனை உண்டு மகிழ்கின்றன. இவ்வாறு நறுமணம் கமழும் மலர்கள் நிறைந்த பொய்கைகள் மருத நிலத்துக்கு மேலும் அழகு சேர்க்கின்றன.

மீனவர்களின் தொழிலும் இயற்கை ஓசைகளும்

வளம் நிறைந்த மருத நிலத்தில் பலவிதமான ஓசைகள் ஒலிக்கின்றன. கம்புள் சேவலின் இனிய உறக்கத்தைக் கலைக்கும் வகையில் மீன்பிடிப்பவர்கள் வலைகளை வீசி, பெரிய மீன்களைப் பிடிக்கின்றனர். பிடித்த மீன்களை விலை கூறி விற்கும் மீனவர்களின் குரல்களும், மீன்களைப் பிடித்துக் குவிப்பதால் எழும் ஆரவாரமும் கேட்கின்றன.

இவற்றோடு கரும்பு ஆலைகளில் எழும் ஓசையும், களைகளைப் பறிக்கும் உழவர்கள் பாடும் பாடல்களும் இணைந்து மருத நிலத்தின் இயல்பான இசையாக ஒலிக்கின்றன. இவ்வொலிகள் அக்கால மக்களின் தொழில் வாழ்க்கையையும் அன்றாடச் செயல்பாடுகளையும் நம் கண்முன் கொண்டுவருகின்றன.

மலர்வளத்தைப் போற்றும் மதுரைக்காஞ்சி

மருத நிலத்தின் மலர்வளத்தை மாங்குடி மருதனார் பின்வரும் பாடல் வரிகளில் அழகாக எடுத்துரைக்கிறார்.

«ஆடை நிவந்த

முள் தாள் சுடர்த் தாமரை,

கள் கமழும் நறு நெய்தல்,

வள் இதழ் அவிழ் நீலம்

மெல் இலை அரி ஆம்பலொடு

வண்டு இறை கொண்ட கமழ்பூம்

பொய்கை.........»

இப்பாடல் வரிகள் தாமரை, நெய்தல், நீலம், ஆம்பல் போன்ற மலர்கள் நிறைந்த பொய்கைகளின் அழகையும் அவற்றில் தேன் உண்ணும் வண்டுகளின் இயல்பையும் நயமாக எடுத்துரைக்கின்றன.

எவ்வளவு அழகான வர்ணனை!

மாங்குடி மருதனார், தான் கண்ட இயற்கைக் காட்சிகளை வெறும் சொற்களால் விவரிக்கவில்லை; அவற்றை நம் கண்முன்னே உயிரோட்டத்துடன் காட்சிப்படுத்துகிறார். மழை பொழியும் மலைகள், கரைபுரண்டு ஓடும் ஆறுகள், செழித்த வயல்கள், மலர்கள் நிறைந்த பொய்கைகள், உழவர்களின் உழைப்பு, மீனவர்களின் ஆரவாரம் எனப் பண்டைய மருத நிலத்தின் இயற்கை வளத்தையும் மக்களின் வாழ்க்கையையும் நம் கண்களிலும் கருத்திலும் அப்படியே கொண்டுவந்து நிறுத்துகிறார்.

மதுரைக்காஞ்சியைப் படிக்கும்போது, நாம் பண்டைய மருத நிலத்துக்கே நேரில் சென்றுவிட்ட உணர்வு ஏற்படுகிறது. இதுவே சங்கப் புலவர்களின் கவித்திறனுக்கும் இயற்கையை உற்றுநோக்கும் நுண்ணுணர்வுக்கும் சிறந்த சான்றாகும்.

(நான் ஜெயபாரதி மதிவாணன் விருதுநகர்.  கர்மவீரர் காமராஜர் பிறந்த ஊரில் பிறந்து வாழ்வதில் பெருமையடைகிறேன். இல்லத்தரசி. 2000லிருந்து கொரானா வந்த 2019 வரை 10 நாட்களுக்கு ஒருமுறை நூலகத்திற்குச் சென்று சங்க இலக்கியங்களை எடுத்து வந்து ரசித்துப் படிப்பேன். 2016, 17, 18, ஆகிய மூன்று ஆண்டுகளில் இலக்கிய மன்றம் வீட்டிலேயே வைத்து நடத்தினேன். வருடத்திற்கு மூன்று முறை நடனம், நாடகம், விளையாட்டுப் போட்டிகள் நடத்தினேன். வீட்டில் இருமுறை மிகப் பழைய பொருட்களைக் காட்சிப்படுத்தி அருங்காட்சியகம் அமைத்தேன். 35 பேர் வந்து பார்த்து ரசித்தார்கள். தாங்களும் பழைய பொருட்களைப் பத்திரமாக வைக்கப் போவதாக உற்சாகமாகக் கூறினார்கள். புத்தகங்கள் படிப்பதுதான் என் பொழுதுபோக்கு. பழமை - புதுமை என்ற யுடியூப் சேனலை நடத்தி வருகிறேன்)