ரியோ டி ஜெனிரோ: 2026 ஃபிஃபா உலகக்கோப்பை கால்பந்து தொடரின் காலிறுதிக்கு முந்தைய சுற்றில் நார்வே அணியிடம் 2-1 என்ற கணக்கில் பிரேசில் அதிர்ச்சித் தோல்வியடைந்து வெளியேறியுள்ளது. 

இந்தத் தோல்வியின் ரணம் ஆறுவதற்கு முன்பே, பிரேசில் ரசிகர்களின் நெஞ்சில் பேரிடியாக இறங்கியுள்ளது நட்சத்திர வீரர் நெய்மர் ஜூனியரின் சர்வதேச ஓய்வு அறிவிப்பு.

தன்னுடைய 16 ஆண்டுகால சர்வதேச கால்பந்து வாழ்க்கைக்கு முற்றுப்புள்ளி வைப்பதாக நெய்மர் அதிகாரப்பூர்வமாக அறிவித்துள்ளார். முன்னதாக பிரேசில் தோல்வியைத் தாங்க முடியாமல் மைதானத்தில் கூடியிருந்த ரசிகர்கள் கதறி அழுதனர். அதேபோல நெய்மரும் குமுறிக் குமுறி அழுத காட்சி ரசிகர்களை மேலும் சோகத்தில் மூழ்கடித்தது.

நெய்மரின் சர்வதேச கால்பந்து பயணம் ஒரு சுவாரசியமான வட்டப்பாதையை நிறைவு செய்துள்ளது. 2010ஆம் ஆண்டில் நியூ ஜெர்சியில் உள்ள மெட்லைஃப் மைதானத்தில்தான் பிரேசில் அணிக்காக நெய்மர் தனது சர்வதேச அறிமுகத்தைப் பெற்றார். தற்செயலாக, நார்வேக்கு எதிரான இந்த உலகக்கோப்பை வாழ்வா-சாவா போட்டியும் அதே மெட்லைஃப் மைதானத்தில்தான் நடந்தது.

போட்டியின் கூடுதல் நேரத்தில் நெய்மர் பெனால்டி மூலம் ஒரு கோல் அடித்த போதிலும், அது பிரேசிலின் தோல்வியைத் தடுக்க போதுமானதாக இல்லை. தனது அறிமுக மைதானத்திலேயே, கண்ணீருடன் சர்வதேசப் போட்டிகளுக்கு நெய்மர் விடைபெற்றுள்ளார். இருப்பினும், அவர் சாண்டோஸ் கிளப் அணிக்காக தொடர்ந்து விளையாடுவார் எனத் தெரிவிக்கப்பட்டுள்ளது.

பிரேசில் கால்பந்து வரலாற்றில் லெஜண்ட் பீலேவின் சாதனையை முறியடித்து, அந்த நாட்டின் வரலாற்றிலேயே அதிக கோல்கள் அடித்த வீரர் என்ற பெருமை நெய்மருக்கு உண்டு. அதேசமயம், புள்ளிவிவரங்களின்படி நெய்மர் பிரேசிலின் மிகச்சிறந்த வீரராக இருந்தாலும், 'நெய்மர் சகாப்தத்தில்' பிரேசிலால் ஒரு உலகக்கோப்பையைக் கூட வெல்ல முடியாமல் போனது அவரது வாழ்க்கையின் பெரும் குறையாகவே பார்க்கப்படும்.

இந்தத் தோல்வியின் மூலம் உலகக்கோப்பைகளில் ஐரோப்பிய அணிகளுக்கு எதிராக பிரேசில் சந்தித்து வரும் பலவீனமான சாதனை தொடர்கிறது. 2002ஆம் ஆண்டு உலகக்கோப்பை இறுதிப்போட்டியில் ஜெர்மனியை வீழ்த்தியதற்குப் பிறகு, உலகக்கோப்பையின் நாக்-அவுட் சுற்றுகளில் ஒரு ஐரோப்பிய அணியைக்கூட பிரேசிலால் வீழ்த்த முடியவில்லை.

நார்வே அணிக்கு எதிரான இந்த ஆட்டத்தில், நட்சத்திர வீரர் எர்லிங் ஹாலாண்ட் கடைசி நிமிடங்களில் இரண்டு அதிரடி கோல்களை அடித்து பிரேசிலின் கனவை சுக்குநூறாக்கினார். பிரேசில் அணியின் உலகக்கோப்பைக்கான காத்திருப்பு இப்போது கால் நூற்றாண்டைத் (25 ஆண்டுகள்) தாண்டப் போகிறது.

பிரேசில் அணியின் பயிற்சியாளர் கார்லோ அன்செலோட்டி இந்தத் தோல்வி குறித்துப் பேசுகையில் "இது ஒரு முடிவல்ல, மாறாக பிரேசில் கால்பந்தின் புதிய சுழற்சியின் தொடக்கம். இந்தத் தோல்வியின் வலியை நாம் எதிர்காலத்திற்கான எரிபொருளாக மாற்ற வேண்டும். இந்த அணியால் இறுதிவரை போராடியிருக்க முடியும், ஆனால் துரதிர்ஷ்டவசமாக வாய்ப்பு கைநழுவிவிட்டது."

அன்செலோட்டிக்கு 2030 உலகக்கோப்பை வரை ஒப்பந்தம் இருப்பதால், அவர் உடனடியாக பதவியிலிருந்து விலகும் எண்ணம் இல்லை என்பதைத் தெளிவுபடுத்தியுள்ளார்.

நெய்மர் என்ற அசாத்திய திறமைசாலியின் சர்வதேச சகாப்தம் முடிவுக்கு வந்துள்ளது. பிரேசில் அணிக்கு அவர் தந்த ஆட்டமும், மேஜிக் தருணங்களும் என்றும் மறக்க முடியாதவை. ஆனால், நெய்மர் இல்லாத பிரேசில் அணி, அன்செலோட்டியின் கீழ் இளம்படையுடன் 2030 உலகக்கோப்பையை எப்படிக் கட்டமைக்கப் போகிறது என்பதைப் பொறுத்திருந்துதான் பார்க்க வேண்டும்.