உடல் நலத்திற்கு மிக முக்கியமான உறுப்பு கல்லீரல். இது செரிமானம், சக்தியை சேமித்தல், நச்சுக்களை நீக்குதல் போன்ற பல வேலைகளை செய்கிறது. கல்லீரலை சுத்தமாகவும், நோய்கள் இல்லாமலும் வைத்துக்கொள்வது நாம் சாப்பிடும் உணவைப் பொறுத்தது. ஆல்கஹால் கல்லீரலுக்கு கெடுதல் என்று பொதுவாக நம்பப்படுகிறது. அது உண்மைதான். ஆனால், அதை மட்டும் கவனித்தால் போதாது. நாம் தினமும் சாப்பிடும் சில உணவுகளும் கல்லீரலுக்கு கெடுதல் விளைவிக்கின்றன.
ஹார்வர்ட் மற்றும் ஸ்டான்போர்ட் பல்கலைக்கழகங்களைச் சேர்ந்த டாக்டர்கள், கல்லீரலுக்கு மோசமான மூன்று உணவுகளைப் பற்றி கூறியுள்ளார். அவை என்னவென்றால், பிரக்டோஸ், தாவர எண்ணெய் மற்றும் பழச்சாறுகள். இந்த உணவுகளைத் தவிர்ப்பதன் மூலம் கல்லீரலை ஆரோக்கியமாக வைத்துக்கொள்ளலாம் என்று அவர் கூறுகிறார்.
பிரக்டோஸ் என்பது பழங்களில் இயற்கையாக இருக்கும் ஒரு வகை சர்க்கரை. ஆனால், இது பெரும்பாலும் பதப்படுத்தப்பட்ட உணவுகள் மற்றும் இனிப்பு பானங்களில் சேர்க்கப்படுகிறது. சோடாக்கள், மிட்டாய்கள், பேக்கரி பொருட்கள் மற்றும் பல பாக்கெட் தின்பண்டங்களில் பிரக்டோஸ் அதிகம் உள்ளது.
சர்க்கரையை உடல் உடனடியாக ஆற்றலுக்காக பயன்படுத்துகிறது. ஆனால், அதிகப்படியான சர்க்கரையை உட்கொள்ளும்போது கல்லீரல் அதை கொழுப்பாக மாற்றுகிறது. இந்த கொழுப்பு கல்லீரல் செல்களில் சேர்கிறது. நாளடைவில், இது ஆல்கஹால் அல்லாத கொழுப்பு கல்லீரல் நோய் (NLFD) ஏற்பட வழிவகுக்கிறது. இந்த நிலை கல்லீரலில் வீக்கம் மற்றும் வடுவை ஏற்படுத்துகிறது.
அதிக பிரக்டோஸ் உட்கொள்வதால், கல்லீரல் இன்சுலினை எதிர்க்கத் தொடங்குகிறது. இன்சுலின் என்பது இரத்த சர்க்கரை அளவை கட்டுப்படுத்தும் ஹார்மோன். இதனால், டைப் 2 நீரிழிவு நோய் உருவாகிறது. இது கல்லீரல் ஆரோக்கியத்தை மேலும் கெடுக்கிறது. சர்க்கரை கல்லீரலை பாதிக்கும்போது சில அறிகுறிகள் தோன்றும். அவை சோர்வு, வயிற்று அசௌகரியம், காரணமில்லாத எடை இழப்பு, அடர் நிற சிறுநீர், தோல் மற்றும் கண்கள் மஞ்சள் நிறமாக மாறுதல், இனிப்பு சாப்பிட வேண்டும் என்ற ஆசை போன்றவை.
டாக்டர்கள் கூறுகையில், சோயா எண்ணெய், மக்காச்சோளம் எண்ணெய், சூரியகாந்தி எண்ணெய் மற்றும் கனோலா எண்ணெய் போன்ற தாவர எண்ணெய்கள் பதப்படுத்தப்பட்ட உணவுகள் மற்றும் உணவகங்களில் அதிகமாக பயன்படுத்தப்படுகின்றன. இந்த எண்ணெய்களில் ஒமேகா-6 கொழுப்பு அமிலங்கள் அதிகம் உள்ளன. இது உடலில் ஒமேகா-3 கொழுப்பு அமிலங்களுடன் சமநிலையை குலைக்கிறது. இதனால் நாள்பட்ட வீக்கம் ஏற்படுகிறது. இது இதய பிரச்சினைகள், டைப் 2 நீரிழிவு நோய் மற்றும் கீல்வாதம் உட்பட பல நோய்களுக்கு முக்கிய காரணம். மேலும், இது கல்லீரல் பாதிப்பை நிரந்தரமாக்குகிறது.
இந்த எண்ணெய்களை பதப்படுத்தும் போது சத்துக்கள் நீக்கப்படுகின்றன. தீங்கு விளைவிக்கும் பொருட்கள் சேர்க்கப்படுகின்றன. எண்ணெயை சூடாக்கும்போது, குறிப்பாக மீண்டும் மீண்டும் சூடாக்கும்போது, அதன் தரம் குறைந்து கல்லீரலை பாதிக்கும் நச்சு பொருட்கள் உருவாகின்றன.
பல மருத்துவர்கள் தாவர எண்ணெய்கள் குறித்து கவலை தெரிவித்துள்ளனர். ஏனெனில் அவற்றில் லினோலிக் அமிலம் உள்ளது. இது அரச்சிடோனிக் அமிலமாக மாறுகிறது. இது வீக்கத்தை உண்டாக்கும் மூலக்கூறு என்று அறியப்படுகிறது.
பழங்கள் சாப்பிடுவது உடல் நலத்திற்கு நல்லது. ஆனால், பழச்சாறு குடிப்பதால் இரத்த சர்க்கரை அளவு திடீரென அதிகரிக்கும். இது இன்சுலின் அளவை அதிகரிக்கிறது. இதனால் கொழுப்பு சேமிப்பு அதிகமாகி கொழுப்பு கல்லீரல் நோய் ஏற்படும் அபாயம் உள்ளது. பல பழச்சாறுகளில் அதிக சர்க்கரை சேர்க்கப்படுகிறது. இது பிரச்சினையை இன்னும் மோசமாக்குகிறது.
பழச்சாறுகளில் நார்ச்சத்து மற்றும் பிற நன்மை பயக்கும் பொருட்கள் குறைவாக உள்ளன. ஆனால், சர்க்கரை அதிகமாக உள்ளது. இது கல்லீரல் ஆரோக்கியத்திற்கு தீங்கு விளைவிக்கும் என்று டாக்டர் சேத்தி கூறுகிறார். நீங்கள் பழச்சாறு குடிக்க விரும்பினால், வீட்டில் தயாரித்து சர்க்கரை சேர்க்காமல் குடிக்கலாம்.
எனவே, கல்லீரலை ஆரோக்கியமாக வைத்துக்கொள்ள பிரக்டோஸ், தாவர எண்ணெய் மற்றும் பழச்சாறுகளைத் தவிர்க்கவும். ஆரோக்கியமான உணவுகளை உட்கொள்ளவும்.
{{comments.comment}}