- ஜோபிரபா
ஒரு கேள்வி…
ஒரு சோதனை…
ஒரு சொல்லின் பிறப்பு...
(1950–1970)
அத்தியாயம் 2-ல் நாம் ஒரு கேள்வியுடன் நிறுத்தினோம்: “ஒரு இயந்திரம் உண்மையாக சிந்திக்க முடியுமா?” அந்த கேள்வி வெறும் தத்துவப் பிரச்சினையாக இருந்தது. ஆனால் ஒருவரின் கையில் அது அறிவியல் பிரச்சினையாக மாறியது.
Alan Turing – கேள்வியை ஆய்வாக மாற்றியவர்
Alan Turing – கேள்வியைச் சோதனையாக மாற்றியவர்
Alan Turing தனது புகழ்பெற்ற கட்டுரையான “Computer Machinery and Intelligence” ஐ வெளியிட்டார். அவர் நேரடியாக “இயந்திரம் சிந்திக்குமா?” என்று விவாதிக்கவில்லை. அவர் சற்றே வேறொரு வழியில் சென்றார். “ஒரு இயந்திரம் மனிதனைப் போல பதிலளிக்க முடியுமா?” இதற்காக அவர் முன்மொழிந்த சோதனைதான் Imitation Game.
பின்னர் உலகம் அதை “Turing Test” என்று அழைத்தது.
இமிடேஷன் கேம் – அது என்ன?
இந்த சோதனை மிகவும் எளிமையானது. ஆனால் அதன் தாக்கம் ஆழமானது.
மூன்று பங்கேற்பாளர்கள்:
1. கேள்விகள் கேட்பவர்
2. ஒரு மனிதர்
3. ஒரு இயந்திரம்
அவர்கள் ஒருவரையும் நேரில் பார்க்க மாட்டார்கள். அனைத்து தொடர்பும் எழுத்து வழியாக மட்டும். கேள்வி கேட்பவர் இருவரிடமும் கேள்விகள் கேட்பார். பின்னர் யார் மனிதர், யார் இயந்திரம் என்று கண்டுபிடிக்க முயல்வார்.
வெற்றி எப்போது?
கேள்வி கேட்பவரால் நிச்சயமாக வேறுபடுத்த முடியாவிட்டால் — அப்படியானால் இயந்திரம் மனிதனைப் போல “நடித்து” வெற்றி பெற்றதாக கருதப்படும்.
டூரிங்கின் கருத்து மிகவும் நடைமுறைபூர்வமானது: “சிந்தனை என்றால் என்ன?” என்று விவாதிப்பதை விட, “மனிதனைப் போல நடந்து காட்ட முடியுமா?” என்று பார்ப்போம்.
இது ஏன் புரட்சிகரமானது?
இந்த ஒரு யோசனை AI-யை தத்துவ விவாதத்திலிருந்து அறிவியல் ஆய்வாக மாற்றியது. சிந்தனை ஒரு மர்மம் அல்ல.
அது சோதிக்கக்கூடிய ஒன்று. அதன் பின்னர் மொழி புரிதல், உரையாடல் அமைப்புகள், அறிவாற்றல் மாதிரிகள் —
அனைத்தும் இந்த சிந்தனையின் தாக்கத்தில் வளர்ந்தன.
1966-ல் உருவான ELIZA பலருக்கு மனிதருடன் பேசுகிறோம் என்ற உணர்வைத் தந்தது. அது டூரிங்கின் சோதனை எவ்வளவு ஆழமானது என்பதை நினைவூட்டியது.
டூரிங் தத்துவத்தைத் தவிர்த்து, அதை அளவிடக்கூடிய சோதனையாக மாற்றினார். இது தான் திருப்புமுனை.
சிந்தனை என்றால் என்ன? என்று கேட்பதிலிருந்து, “சிந்தனை இருப்பதை எப்படி கண்டறிவது?” என்று கேட்கும் நிலைக்கு AI வந்தது.
இங்கே தான் முக்கியமான மாற்றம் நிகழ்ந்தது: ஒரு தத்துவக் கேள்வி
→ ஒரு சோதனை
→ ஒரு ஆராய்ச்சி துறை
அத்தியாயம் 2-ல் பார்த்த கேள்வி இப்போது ஆய்வறைக்குள் நுழைந்தது. அதன் அடுத்த கட்டம் — ஒரு சொல்லின் பிறப்பு.
1956 – ஒரு சொல்லின் பிறப்பு
1956 ஜூலை. Dartmouth Summer Research Project on Artificial Intelligence ஒரு சிறிய ஆராய்ச்சி முகாம். ஆனால் அதன் தாக்கம் மிகப்பெரியது.
அங்கே John McCarthy ஒரு புதிய சொல்லை உருவாக்கினார்: Artificial Intelligence - அவர் சொன்ன வரையறை எளிமையானது: “நுண்ணறிவுள்ள இயந்திரங்களை உருவாக்கும் அறிவியல்.”
இதோ முக்கிய வேறுபாடு:
டூரிங் → கேள்வியை அறிவியல் வடிவில் அமைத்தார்
மெக்கார்த்தி → அந்த முயற்சிக்கு பெயர் வைத்தார்
அந்த நாளிலிருந்து AI ஒரு சிந்தனை மட்டும் இல்லை. ஒரு துறை.
ஆரம்ப நம்பிக்கை – வேகமான கனவு
அந்த காலத்திலிருந்த விஞ்ஞானிகள் மிகுந்த நம்பிக்கையுடன் இருந்தனர்.
“மனித நுண்ணறிவுக்கு இணையான இயந்திரம் ஒரு சில ஆண்டுகளுக்குள் உருவாகிவிடும்”
என்று அவர்கள் உறுதியாக கூறினர்.
அது வெறும் கனவு அல்ல, அவர்களின் அறிவியல் நம்பிக்கை. ஆனால் நிஜம் மெதுவாக நகர்ந்தது. எதிர்பார்ப்பு வேகமாக ஓடியது. பின்னர் நடந்தது:
அதிக எதிர்பார்ப்பு → மெதுவான முன்னேற்றம் → ஏமாற்றம் → நிதி குறைவு
இந்த வரலாறு நமக்கு ஒரு பாடம் சொல்கிறது: தொழில்நுட்ப வளர்ச்சி எப்போதும் நேர்கோட்டாக இல்லை. அது அலைபோல் உயர்ந்து–தாழ்கிறது.
இந்த இடைவெளிதான் பின்னர் “AI குளிர்காலங்களுக்கு” வழிவகுத்தது.
அந்த காலத்தின் முக்கிய முகங்கள்
Marvin Minsky
MIT-இல் AI ஆய்வகத்தை உருவாக்கினார். கணினியில் “பொது அறிவு” சேர்க்க முயன்றார்.
Allen Newell மற்றும் Herbert A. Simon
Logic Theorist – கணித தேற்றங்களை நிரூபித்த நிரல்.
General Problem Solver – மனிதன் பிரச்சினையை எப்படி தீர்க்கிறான் என்பதை மாதிரியாக்கிய முயற்சி.
Arthur Samuel
1959-ல் “Machine Learning” என்ற சொல்லை பயன்படுத்தினார். அவர் உருவாக்கிய செக்கர்ஸ் நிரல் தானாகவே விளையாட கற்றுக்கொண்டது.
இந்த அத்தியாயம் சொல்லுவது…
அத்தியாயம் 2-ல் நாம் ஒரு கேள்வியின் ஆழத்தில் சென்றோம். “சிந்தனை என்றால் என்ன?” என்று தேடினோம்.
இந்த அத்தியாயத்தில், அந்த கேள்வி ஆய்வறைக்குள் நுழைந்தது. அது விவாதத்திலிருந்து பரிசோதனையாக மாறியது.
ஒரு கேள்வி - ஒரு சோதனையாக வடிவம் பெற்றது.
அந்த சோதனை - ஒரு புதிய சொல்லை உருவாக்கியது.
அந்த சொல் - ஒரு முழு துறையாக வளரத் தொடங்கியது.
AI-யின் பிறப்பு - ஒரு இயந்திரத்தின் தொடக்கம் அல்ல. ஒரு சிந்தனை அறிவியலின் மொழியில் பேசத் தொடங்கிய தருணம்.
அடுத்த அத்தியாயத்தில், இந்த உற்சாகமான தொடக்கம் எப்படி திடீரென மந்தமான காலமாக மாறியது என்பதைப் பார்க்கலாம்.
ஒவ்வொரு புரட்சிக்கும் ஒரு வசந்தகாலமும் இருக்கும். ஒரு குளிர்காலமும் இருக்கும். பயணம் இன்னும் முடிவடையவில்லை…
தொடரும்...
(திருவாரூர் அரசுப் பள்ளி ஆசிரியர்
ஜோபிரபா என்கிற ச.பிரபாகரன், திருவாரூர் புத்தகத் திருவிழா இலச்சினையை வடிவமைத்தவர். தேனி புத்தகத் திருவிழா ஸ்லோகன் போட்டி மற்றும் 'விஞ்ஞான துளிர்' இதழின் கட்டுரையாளர். மேலும், தமிழ்நாடு அரசின் 'போதையில்லா தமிழ்நாடு', 'சமத்துவம் காண்போம்', 'என் பள்ளி என் பெருமை' போன்ற பல்வேறு போட்டிகளில் வெற்றி பெற்றவர்)
முந்தைய அத்தியாயங்கள்: 1 2
{{comments.comment}}