சென்னை : நடிகர் அஜித் குமார், தற்போது பந்தய உலகில் தனது ஆர்வத்தை பின்பற்றி பாராட்டுக்களைப் பெற்று வருகிறார். அவர் மலேசியாவில் சர்வதேச பந்தயத் தொடரில் பங்கேற்று வருகிறார். அஜித் குமாரின் அசாதாரணமான செயல்பாடு ரசிகர்களையும் மோட்டார் ஸ்போர்ட்ஸ் ஆர்வலர்களையும் உற்சாகப்படுத்தியுள்ளது. இந்த சுவாரஸ்யமான சமயத்தில், அஜித் ரசிகர்களுக்கு குட்நியூஸ் ஒன்றை சொல்லி உள்ளார், பிரபல டைரக்டர் ஒருவர். 

அஜித் குமாரின் கார் ரேஸ் வாழ்க்கையை அப்படியே படமாக்க திட்டமிட்டிருக்கிறார்களாம். 'தெய்வத் திருமகள்' மற்றும் 'தலைவா' போன்ற படங்களை இயக்கிய இயக்குநர் ஏ.எல். விஜய் தான் அஜித்தின் இந்த படத்தை இயக்க போகிறாராம். சமீபத்தில் அவர் அளித்த பேட்டி ஒன்றில் இதை அவரே உறுதி செய்துள்ளார். இது குறித்து அவர் கூறுகையில், படம் பற்றி நான் சொன்ன போது அஜித் சார், 'என் உலகத்திற்கு உங்களை வரவேற்கிறேன்' என்றார்."  "பந்தயத்தின் முடிவில் நீங்கள் உயிருடன் வெளியே வர வேண்டும்" என்று அஜித் சார் என்னிடம் கூறினார். ஆனால் அஜித்தை வைத்து ஏ.எல்.விஜய் இயக்க போவது படமா அல்லது ஆவணப்படமா என்பதை அவர் உறுதிப்படுத்தவில்லை.

மோட்டார் ஸ்போர்ட்ஸ் உலகத்தைப் பற்றிய தனது புரிதலைப் பற்றி மேலும் பேசிய அவர், "அவரை நேரடியாக களத்தில் பார்த்த பிறகு, என் மனதில் அவருக்கு இருந்த மரியாதை அதிகரித்தது. அஜித் சார் இந்த விளையாட்டிற்கு நிறைய பங்களிக்கிறார். அவர் இந்தியாவில் ஒரு மோட்டார் ஸ்போர்ட்ஸ் ஐகானாக இருப்பார். இந்த திட்டத்தை படமாக்குவது ஒரு புதிய அனுபவம், ஆனால் நாம் இங்கு காண்பது மிகவும் சவாலானது. அஜித் சாரைப் பார்த்தபோது, அவர் ஓய்வெடுப்பதாகத் தோன்றியது, ஆனால் உண்மையில் அவர் அப்படி இல்லை, அவர் பந்தயத்தைப் பற்றிதான் யோசித்துக் கொண்டிருந்தார். காகிதங்களை எடுத்து குப்பைத் தொட்டியில் போடுவதை நான் பார்த்தேன்... அவருடைய பணிவு அப்படியானது." என்றார்.

இதற்கிடையில், அஜித் குமாரின் அடுத்த படத்திற்கு தற்காலிகமாக 'AK64' என்று பெயரிடப்பட்டுள்ளது. இந்த படத்தின் முன் தயாரிப்பு பணிகள், ஆதிக் ரவிச்சந்திரன் இயக்கத்தில் வேகமாக நடைபெற்று வருகின்றன. பிப்ரவரி 2026 இல் படப்பிடிப்பு துவங்கும் என்று எதிர்பார்க்கப்படுகிறது. அதிகாரப்பூர்வ அறிவிப்பு விரைவில் வெளியாகும். ஏகே 64 படத்திற்கு பிறகு, அஜித்-ஏ.எல்.விஜய் இனியும் படத்தின் பணிகள் துவங்கப்படும் என எதிர்பார்க்கப்படுகிறது. இது ஏகே 65 ஆக கூட இருக்கலாம் என சொல்லப்படுகிறது. எது எப்படியோ, அஜித்தின் கார் ரேஸ் வாழ்க்கை பற்றிய இந்த படம் வெளியாகும் போது அஜித் பற்றி பலரும் அறியாத பல சுவாரஸ்ய விஷயங்கள் வெளியுலகிற்கு தெரிய வரும் என எதிர்பார்க்கலாம்.