சென்னை: நடிகர் கமலஹாசனின் பெயர், புகைப்படங்கள் மற்றும் அவர் பேசிய பிரபலமான வசனங்களை  ஆகியவற்றை அவரது அனுமதியின்றி வணிக ரீதியாகப் பயன்படுத்த சென்னை உயர் நீதிமன்றம் இடைக்காலத் தடை விதித்து அதிரடி உத்தரவு பிறப்பித்துள்ளது.

திரையுலகில் 'உலகநாயகன்' என்று போற்றப்படும் நடிகரும் மக்கள் நீதி மய்யம் கட்சியின் தலைவரும், எம்.பி.,யுமான கமலஹாசன், சென்னை உயர் நீதிமன்றத்தில் உரிமையியல் வழக்கு ஒன்றைத் தாக்கல் செய்திருந்தார். அந்த மனுவில், சென்னையைச் சேர்ந்த டி ஷர்ட் தயாரிக்கும் நிறுவனமான  ‘நீயே விடை’ (Neeye Vidai) என்ற நிறுவனம், தனது அனுமதியின்றி தனது பெயர், புகைப்படங்கள், 'உலகநாயகன்' என்ற பட்டம் மற்றும் தனது படங்களில் இடம்பெற்ற பிரபலமான வசனங்கள் ஆகியவற்றை வணிக நோக்கில் பயன்படுத்துவதாகக் குறிப்பிட்டிருந்தார்.

குறிப்பிட்ட அந்த நிறுவனம், கமலஹாசனின் அடையாளங்களைப் பயன்படுத்தி டி-சர்ட்டுகள் (T-shirts), சட்டைகள் மற்றும் இதர பொருட்களைத் தயாரித்து விற்பனை செய்து வருவதாக மனுவில் சுட்டிக்காட்டப்பட்டது. ஒரு கலைஞனின் கடின உழைப்பால் உருவான பெயரையும் புகழையும், முறையான அனுமதி பெறாமல் லாபத்திற்காகப் பயன்படுத்துவது சட்டவிரோதமானது என்று வாதாடப்பட்டது. இதற்கு தடை விதிக்கவும் கோரிக்கை முன் வைக்கப்பட்டது.

நீதிமன்றத்தின் உத்தரவு: 

இந்த வழக்கை விசாரித்த சென்னை உயர் நீதிமன்றம், நடிகர் கமலஹாசனின் வாதத்தில் உள்ள நியாயத்தை ஏற்றுக்கொண்டது. அதன் அடிப்படையில், சம்பந்தப்பட்ட நிறுவனம் கமலஹாசனின் பெயர் மற்றும் உருவப்படங்களை வணிக ரீதியாகப் பயன்படுத்தத் தடை விதித்து இடைக்கால உத்தரவைப் பிறப்பித்துள்ளது. இந்த உத்தரவு, பிரபலங்களின் 'ஆளுமை உரிமையை' (Personality Rights) பாதுகாப்பதில் மிக முக்கியமான ஒன்றாகப் பார்க்கப்படுகிறது. இதன் மூலம், திரைப்பிரபலங்களின் பெயரையோ, குரலையோ அல்லது புகைப்படங்களையோ அவர்களின் அனுமதியின்றி எந்தவொரு நிறுவனமும் இனி வர்த்தக ரீதியாகப் பயன்படுத்த முடியாது என்பது உறுதி செய்யப்பட்டுள்ளது.

சமீபத்தில் இசையமைப்பாளர் இளையராஜா தனது பெயர், போட்டோ, பாடல்கள் ஆகியவற்றை தனது அனுமதி இல்லாமல் யாரும் வணிக ரீதியில் பயன்படுத்த கூடாது என கோர்ட்டை அணுகி இருந்தார். இளையராஜாவின் கோரிக்கையை ஏற்று அவரது பெயர், போட்டோ மற்றும் பாடல்களை பயன்படுத்த சென்னை ஐகோர்ட் தடை விதித்திருந்தது குறிப்பிடத்தக்கது.