சென்னை: சர்வதேச பொருளாதாரச் சூழல்களின் எதிரொலியாக, இந்திய வரலாற்றிலேயே இல்லாத அளவிற்கு அமெரிக்க டாலருக்கு நிகரான இந்திய ரூபாயின் மதிப்பு மிகக் கடுமையான வீழ்ச்சியைச் சந்தித்துள்ளது.

இன்றைய வர்த்தக நேர முடிவில், ஒரு டாலருக்கு நிகரான ரூபாயின் மதிப்பு 96.11 ஆகக் குறைந்து அதிர்ச்சியை ஏற்படுத்தியுள்ளது. இந்திய வரலாற்றில் ரூபாயின் மதிப்பு இந்த அளவிற்கு சரிவைச் சந்திப்பது இதுவே முதல்முறை என்று பொருளாதார வல்லுநர்கள் கவலை தெரிவித்துள்ளனர்.

ரூபாய் மதிப்பு வீழ்ச்சிக்கான முக்கிய காரணங்கள் :

சர்வதேச சந்தையில் ஏற்பட்டுள்ள திடீர் மாற்றங்களே இந்த வரலாறு காணாத சரிவுக்கு முக்கியக் காரணமாகப் பார்க்கப்படுகிறது. சர்வதேச சந்தையில் கச்சா எண்ணெயின் விலை தொடர்ந்து அதிகரித்து வருகிறது. இந்தியா தனது தேவையில் 80%-க்கும் அதிகமான கச்சா எண்ணெயை இறக்குமதி செய்வதால், டாலருக்கான தேவை அதிகரித்து ரூபாய் மதிப்பில் பெரும் அழுத்தத்தை ஏற்படுத்தியுள்ளது.

இந்திய பங்குச்சந்தையில் கடந்த சில நாட்களாக பெரும் ஏற்ற இறக்கம் நிலவி வருகிறது. இதனால் பாதுகாப்பற்ற சூழலை உணர்ந்த அந்நிய நிறுவன முதலீட்டாளர்கள் தங்களது முதலீடுகளைத் தொடர்ந்து வெளியேற்றி வருகின்றனர்.

பொருளாதாரத்தில் ஏற்படும் தாக்கங்கள் :

ரூபாயின் மதிப்பு தொடர்ந்து சரிந்து வருவதால், நாட்டின் இறக்குமதி செலவுகள் கணிசமாக அதிகரிக்கும். குறிப்பாக, கச்சா எண்ணெய் இறக்குமதி விலை உயர்வதால் உள்நாட்டில் பெட்ரோல், டீசல் விலைகள் உயரக்கூடும். இது ஒட்டுமொத்த அத்தியாவசியப் பொருட்களின் விலைவாசி உயர்வுக்கு (Inflation) வழிவகுக்கும் என அஞ்சப்படுகிறது.

ஏற்கனவே கடந்த நிதியாண்டில் யாருக்கும் கணிக்க முடியாத அளவிற்கு 8 சதவீதத்திற்கு அதிகமாக பணவீக்கம் அதிகரித்துள்ளதாக மத்திய அரசு வெளியிட்டுள்ள புள்ளிவிபரம் தெரிவிக்கிறது. இதனால் வெளிநாடுகளில் படிக்கும் இந்திய மாணவர்களின் கல்விச் செலவு மற்றும் வெளிநாட்டுச் சுற்றுலா செல்பவர்களின் செலவுகளும் கணிசமாக அதிகரிக்க வாய்ப்புள்ளது.

அடுத்தகட்ட நடவடிக்கை என்ன?

ரூபாயின் மதிப்பை நிலைநிறுத்தவும், மேலும் சரிவடையாமல் தடுக்கவும் இந்திய ரிசர்வ் வங்கி பொதுச்சந்தையில் டாலர்களை விற்பனை செய்வது போன்ற அதிரடி நடவடிக்கைகளில் இறங்கக்கூடும் என்று வர்த்தக வட்டாரங்கள் எதிர்பார்க்கின்றன. 

எனினும், சர்வதேச சந்தையில் கச்சா எண்ணெய் விலை கட்டுக்குள் வந்தால் மட்டுமே ரூபாயின் மதிப்பு மீண்டும் பழைய நிலைக்குத் திரும்ப வாய்ப்புள்ளதாகக் கூறப்படுகிறது. மாறிவரும் இந்த உலகளாவிய பொருளாதாரச் சூழலால் இந்திய வர்த்தகச் சந்தை தற்போது பெரும் தத்தளிப்பான நிலையை எதிர்கொண்டுள்ளது.