மாமல்லபுரம்: சென்னையை அடுத்த வரலாற்றுச் சிறப்புமிக்க மாமல்லபுரத்தில், பாட்டாளி மக்கள் கட்சியின் (பா.ம.க.) மாநில பொதுக்குழு கூட்டம் இன்று (29.07.2026) பிரம்மாண்டமான ஏற்பாடுகளுடன் தொடங்கி நடைபெற்று வருகிறது. கட்சித் தலைவர்கள், முக்கிய நிர்வாகிகள் மற்றும் தொண்டர்கள் திரளாகக் கலந்து கொண்டுள்ள இக்கூட்டம் தமிழக அரசியலில் பெரும் எதிர்பார்ப்பை ஏற்படுத்தியுள்ளது.

பிரம்மாண்ட வரவேற்பு ஏற்பாடுகள் : 

பொதுக்குழு நடைபெறும் அரங்கின் முகப்பில் பா.ம.க.வின் கொடிகள், வண்ணமயமான தோரணங்கள் மற்றும் கட்சி மாம்பழச் சின்னம் பொறித்த பதாகைகளுடன் பிரம்மாண்ட வரவேற்பு வளைவுகள் அமைக்கப்பட்டுள்ளன. கட்சியின் மூத்த நிர்வாகிகள், இளைஞர் அணியினர் மற்றும் மாற்றுத்திறனாளித் தொண்டர்கள் உட்பட அனைத்துத் தரப்பினரும் உற்சாகத்துடன் பொதுக்குழு கூட்டத்தில் பங்கேற்று வருகின்றனர்.

அன்புமணி ராமதாஸ் தலைமையில் கூட்டம்

டாக்டர் ராமதாஸ் அரசியல் துறவறம் பூண்டுள்ளதாக அறிவித்துள்ள சூழ்நிலையில், பா.ம.க.வின் தலைவர் டாக்டர் அன்புமணி ராமதாஸின் முழுமையான தலைமையின் கீழ் இந்த மாநில பொதுக்குழு கூட்டம் கூடுகிறது. அன்புமணி ராமதாஸின் தலைமையில் நடக்கும் இந்த முக்கியக் கூட்டம், கட்சியின் எதிர்கால அரசியல் பாதையைத் தீர்மானிக்கும் கூட்டமாகப் பார்க்கப்படுகிறது. இந்த கூட்டத்தில் அன்புமணியே கட்சியின் தலைவராக தொடர்வது குறித்த தீர்மானம் நிறைவேற்றப்பட உள்ளதாக சொல்லப்படுகிறது.

கூட்டத்தின் முக்கிய நோக்கங்கள் : 

இன்றைய பொதுக்குழு கூட்டத்தில், கட்சியின் உட்கட்டமைப்பை பலப்படுத்துதல், எதிர்வரும் தேர்தல் மற்றும் அரசியல் சூழல்கள் குறித்து விரிவாக விவாதிக்கப்பட உள்ளது. மேலும், மாநிலத்தின் தற்போதைய பல்வேறு முக்கியப் பிரச்சினைகள் குறித்தும், கட்சியின் அடுத்தகட்ட களப்பணிகள் மற்றும் போராட்டங்கள் குறித்தும் முக்கியத் தீர்மானங்கள் நிறைவேற்றப்பட வாய்ப்புள்ளதாகக் கட்சி வட்டாரங்கள் தெரிவிக்கின்றன.

பொதுக்குழு நடைபெறும் மாமல்லபுரம் பகுதி முழுவதும் பா.ம.க. தொண்டர்களின் வருகையால் விழாக்கோலம் பூண்டுள்ளது. அசம்பாவிதங்கள் ஏதும் நடக்காமல் இருக்கவும், போக்குவரத்து சீராக இயக்கப்படவும் உரிய முன்னெச்சரிக்கை நடவடிக்கைகளும் பாதுகாப்பு ஏற்பாடுகளும் செய்யப்பட்டுள்ளன.