டெல்லி: இந்தியா மீண்டும் சாம்பியனாக மாறுமா? 2025 சாம்பியன்ஸ் கோப்பை இந்திய அணிக்கு கிடைக்குமா.. இதுதான் கிரிக்கெட் ரசிகர்களின் ஏகோபித்த எதிர்பார்ப்பாக உள்ளது.

இதில் என்ன சந்தேகம். இந்திய அணி சூப்பராக இருக்கிறது. கண்டிப்பாக கப்பு நமக்குத்தான் பிகிலு என்று ரசிகர்கள் அடித்துச் சொன்னாலும் கூட, அது அவ்வளவு எளிதாக இருக்காது. பெரும் சவாலாகவே இருக்கும். 

12 வருடங்களுக்குப் பிறகு இந்த கோப்பையை மீண்டும் கைப்பற்றுவதற்கான வாய்ப்பு இந்தியாவுக்கு கிடைத்துள்ளது. ஆனால், பல வலுவான அணிகளுடன் மோத வேண்டிய நிலைமையை நாம் மறந்து விடக் கூடாது. பாகிஸ்தானில் வைத்து அந்த அணியை நியூசிலாந்து அணி சம்ஹாரம் செய்துள்ளதை அனைவரும் கவனிக்க வேண்டும்.

இந்திய அணியின் பலம்

இந்தியாவிடம் அனுபவம் வாய்ந்த வீரர்கள் பலர் உள்ளனர். ரோஹித் சர்மா & விராட் கோலி – அணிக்கு வலு சேர்க்கும் முக்கிய ஆட்டக்காரர்கள். அதிக அனுபவம் பெற்றிருக்கும் இவர்களின் நீட்டான ஆட்டம் நம்மை வெற்றிக்கு அழைத்து செல்லலாம்.

கேஎல் ராகுல் & ஹார்திக் பாண்ட்யா – இருவரும் மிடில் ஓவர்களில் ஆட்டத்தை கட்டுப்படுத்துவதில் நிபுணர்கள். ஹார்திக் பாண்ட்யா பந்துவீச்சிலும் முக்கிய பங்கு வகிப்பார் என்று நம்பலாம்.

வலுவான பந்துவீச்சாளர்கள்

இந்திய அணியின் நம்பிக்கை நட்சத்திரமாக திகழ்வது மொஹம்மது ஷமி – அணியின் முதன்மை வேகப்பந்து வீச்சாளர். புதிய பந்திலும், பழைய பந்திலும் தாக்கம் செலுத்தக்கூடியவர். இன்றைக்கு வங்கதேசத்திற்கு எதிரான போட்டியிலும் பட்டையைக் கிளப்பி.. நான் வந்துட்டேன்னு சொல்லு என்று கலக்கிக் கொண்டுள்ளார்.

அர்ஷ்தீப் சிங் & முகேஷ் குமார் – பும்ரா இல்லாத குறையை இவர்கள் நிரப்ப வேண்டும், நிரப்புவார்கள் என்று நம்புவோம். 

குல்தீப் யாதவ் & ரவீந்திர ஜடேஜா – இடது கை சுழற்பந்து வீச்சாளர்கள், மீடியம்-பேஸ் மற்றும் ஸ்பின் ஆட்டத்தை சமநிலையில் வைத்திருப்பார்கள். இவர்களிடம் முக்கிய விக்கெட்கள் வீழ்ந்தால் நாம நிச்சயம் கெத்து காட்ட முடியும்.

இந்திய அணிக்கு உள்ள சவால்கள்

பும்ரா இல்லாதது முக்கியமான பின்னடைவு. இந்தியாவின் மிக முக்கியமான பந்து வீச்சாளர் ஜஸ்ப்ரீத் பும்ரா இல்லாதது அணிக்கு பெரிய சிரமமாக இருக்கும். பும்ராவின் மாற்றாக யாரையும் சொல்ல முடியாது. இந்த இடத்தில்தான் ஷமியின் பங்களிப்பு முக்கியமானதாக இருக்கும். அவர் ஓரளவுக்கு பும்ராவின் இடத்தை நிரப்ப முடியும். 

2025 சாம்பியன்ஸ் கோப்பை துபாயில் நடைபெறுகிறது. பாகிஸ்தான், ஆஸ்திரேலியா, தென்னாப்பிரிக்கா போன்ற அணிகள் இந்த மைதானங்களில் சிறப்பாக விளையாடக்கூடியவை. இந்திய வீரர்கள் வறண்ட பந்துகளுக்கு ஏற்ப உடனடியாக தங்களை மாற்றிக்கொள்ள வேண்டும். அதேசமயம், துபாயில் இந்தியா பெரிய அளவில் தோல்வியே கண்டதில்லை என்பது நமக்கு சாதகமானது.

கடந்த சில ஆண்டுகளில், இந்தியா முக்கிய இறுதிப்போட்டிகளில் தோல்வி கண்டிருக்கிறது. அது கவலைக்குரியதாக உள்ளது. 2017 சாம்பியன்ஸ் கோப்பை, 2019 உலகக்கோப்பை, 2023 உலகக்கோப்பை – மூன்றிலும் இந்தியா இறுதிப் போட்டிகளில் தோல்வியை சந்தித்தது. இதுதான் நமக்கு பாதகமாக உள்ளது. இந்த சாம்பியன்ஸ் டிராபி தொடரில் இறுதிப் போட்டிக்கு இந்தியா தகுதி பெற்றால் துபாயில் போட்டி நடைபெறும் என்பதால், எந்தவிதமான பின்னடைவும் இல்லாமல் இந்தியா இறுதிப் போட்டியைக் குறி வைத்து விளையாடினாலே போதும்.

இந்தியா வெற்றி பெற என்ன செய்ய வேண்டும்?

- துவக்க ஆட்டக்காரர்கள் நல்ல தொடக்கத்தை தர வேண்டும் – ரோஹித் & சுப்மன் கில் மொத்த போட்டிகளிலும் நன்றாக ஆட வேண்டும்.

-  பந்துவீச்சில் தொடக்க ஓவர்களிலேயே விக்கெட்டுகளை வீழ்த்த வேண்டும் – ஷமி & அர்ஷ்தீப் தங்களது ஆதிக்கத்தை ஆணித்தரமாக நிரூபிக்க வேண்டும்.

- பிரஷருக்குள் வீரர்கள இருக்கக் கூடாது. ஹார்திக் பாண்ட்யா, கேஎல் ராகுல், ஜடேஜா போன்ற வீரர்கள் மிகுந்த நிதானத்துடன் செயல்பட வேண்டும்.

- பந்துவீச்சில் தட்பவெப்ப நிலை முக்கியப் பங்காற்றும். துபாயில் வறண்ட சூழல் நிலவும். எனவே அதற்கேற்ப ஜடேஜா, குல்தீப் போன்ற சுழற்பந்து வீச்சாளர்களின் பங்களிப்பு இருக்க வேண்டும்.

இந்திய அணிக்கு மிகுந்த திறமை மற்றும் அனுபவம் உள்ளது. ஆனால், கடைசி கட்டங்களில் அணியின் செயல்திறன் மிக முக்கியமானது. அங்கு சொதப்பாமல் இருக்க வேண்டியது அவசியம். இந்தியா கடந்த 12 ஆண்டுகளாக எந்த ICC டிராபியும் வெல்லாத நிலையில் உள்ளது. இந்த முறை அதை மாற்றுமா? என்ற எதிர்பார்ப்பு ரசிகர்களிடம் அதிகமாகவே உள்ளது.