நற்காலை பொழுது!

Su.tha Arivalagan

May 25, 2026,04:52 PM IST

- சசிகலா விஸ்வநாதன்

புலர்ந்தும் புலராத

காலைப் பொழுது

விடிவெள்ளி மயங்கி

விரியும் சூரியன்

சற்றே தாமதமாக வரட்டுமே...

இன்று ஒரு நாள்!

அதிகாலை சாரலின் ஓசை;

சலங்கை ஒலி போல்

இளங்காற்றில் சாமரம் வீசும் தென்னை;

பவளமல்லியின் வாசம்;

படுக்கையின் கதகதப்பு;

போர்வையின் இருட்டிலும்;

தேன்சிட்டுக்குருவியின்

கொஞ்சும் கீச்சலின் இனிமை தடைபட்டது.

ஸ்டீஃபனின் சீட்டி ஒலியுடன்

செய்தி தாள் விழும் ஒலி;

தொடர்ந்து

பால் பாக்கெட் விழும் சப்தம்;

முன் வாயில் கேட்

'க்றீச்' ஒலி

கெங்கம்மாவின் வருகை.

"ஏங்க! " அவளின் குரல்;

காஃபி ரெடி

காலை புலர்ந்ததை அறிவித்ததாகி விட்டது.

அப்படியும்....

கண்மூடி படுத்திருந்தவன்

நெஞ்சின் மேல் இதமாக

பூனைக்குட்டி போல், விழுந்த மகள் கழுத்தைக் கட்டி;

கன்னத்தில் முத்தமிட;

நற்காலை பொழுது

நன்றே விடிந்தது!

(சசிகலா விஸ்வநாதன் - தடய அறிவியல் துறையில் உதவி இயக்குநராக பணி நிறைவில் இருக்கும் முதியவள். அதிகம் அறியப்படாத நான்; இரண்டு வருடங்களாக ஓய்வு நேரத்தில் கவிதைகளும் சிறுகதைகளும் எழுதிக்கொண்டு இருக்கிறேன் . எனது கதைகளும், கவிதைகளும் ,தமிழ் நெஞ்சம்; வானமே எல்லை; கொலுசு;மலர் வனம்; சக்தி பெண்ணிதழ்; ஆகியவற்றில் வெளியாகின்றன. புஸ்தகா நிறுவனம் மூலம் இது வரை நான்கு கதை தொகுப்புகளை வெளியிட்டுள்ளேன்)